നാം എല്ലാവരും മറ്റുള്ളവരോട് ക്ഷമിക്കുവാൻ പഠിക്കേണ്ടതുണ്ട്, ഇത് നമ്മളിൽ ആരും ആസ്വദിക്കുന്ന ഒരു കാര്യമല്ല. നമ്മുടെ ഹൃദയത്തിന്റെ ആഴത്തിൽ, നാം മറ്റുള്ളവരോട് ക്ഷമിക്കുവാൻ ആഗ്രഹിക്കുന്നില്ല. ബൈബിളനുസരിച്ച്, ക്ഷമിക്കുക എന്നാൽ മറക്കുക എന്നാണ്. നമ്മെ സംബന്ധിച്ചിടത്തോളം, ഒരാളോട് ക്ഷമിക്കുക എന്നത്, ആ പ്രത്യേക അപരാധത്തെക്കുറിച്ച് നാം ശ്രദ്ധിക്കുന്നില്ല എന്നാണ് അർത്ഥമാക്കുന്നത്. എന്നിരുന്നാലും, നാം അത് ഇപ്പോഴും ഓർക്കുന്നു. നമുക്കെതിരെ ഉള്ള ഒരു അപരാധം മറക്കുവാൻ എത്ര ബുദ്ധിമുട്ടാണ്! കർത്താവിന്റെ മനസ്സലിവുകളും കൃപയും ഇല്ലെങ്കിൽ, നിത്യതയിൽ പോലും നാം മറ്റുള്ളവരുടെ അപരാധങ്ങൾ ഓർക്കും. എന്നാൽ ദൈവം ക്ഷമിക്കുമ്പോൾ, അവൻ മറക്കുന്നു. എബ്രായർ 10:17 പറയുന്നു: "അവരുടെ പാപങ്ങളും അധർമങ്ങളും ഇനിമേൽ ഒരുവിധത്തിലും ഞാൻ ഓർക്കുകയില്ല." ഒന്നിനോട് പൂർണ്ണമായി ക്ഷമിക്കുക എന്നാൽ അത് മറക്കുക എന്നാണ്. നമ്മുടെ സ്വർഗ്ഗസ്ഥനായ പിതാവ് നമ്മെ കണക്കാക്കുന്നത് നാം ഒരിക്കലും പാപം ചെയ്തിട്ടില്ല എന്നപോലെയാണ്, കാരണം അവൻ നമ്മുടെ പാപങ്ങൾ ക്ഷമിക്കുകയും മറക്കുകയും ചെയ്തിരിക്കുന്നു. എന്നാൽ നാം ഒരു അപരാധം ക്ഷമിക്കുമ്പോൾ, നാം പലപ്പോഴും മറ്റുള്ളവരെ അതിനെക്കുറിച്ച് ഓർമ്മിപ്പിക്കാറുണ്ട്. ഉദാഹരണത്തിന്, ഒരു സഹോദരി പറഞ്ഞേക്കാം: "മൂപ്പന്മാർ എന്നോട് വളരെ മോശമായി ഇടപെട്ടു; എന്നിരുന്നാലും, ഞാൻ അവരോട് ക്ഷമിച്ചിരിക്കുന്നു. എന്നാൽ എന്താണ് സംഭവിച്ചതെന്ന് ഞാൻ നിങ്ങളോട് അല്പം പറയുവാൻ ആഗ്രഹിക്കുന്നു." യഥാർത്ഥ പാപക്ഷമ എന്നാൽ നാം അപരാധം മറക്കുന്നു എന്നാണ്.