നാല് സുവിശേഷങ്ങൾ അനുസരിച്ച്, കർത്താവായ യേശു ക്രൂശിൽ ആയിരുന്നത് കൃത്യം ആറ് മണിക്കൂർ ആയിരുന്നു. ആദ്യത്തെ മൂന്ന് മണിക്കൂറിൽ, മനുഷ്യർ അവനോട് വളരെയധികം അനീതിപരമായ കാര്യങ്ങൾ ചെയ്തു. അവർ അവനെ പീഡിപ്പിക്കുകയും പരിഹസിക്കുകയും ചെയ്തു. എന്നാൽ ആറാം മണി നേരം, അതായത് ഉച്ചയ്ക്ക് പന്ത്രണ്ടു മണിക്ക്, ദൈവം കടന്നുവന്നു, ഒൻപതാം മണി നേരം വരെ, അതായത് വൈകുന്നേരം മൂന്ന് മണി വരെ, സകല ദേശത്തിന്മേലും ഇരുട്ട് ഉണ്ടായി. ഈ ഇരുട്ട് ദൈവം ചെയ്തതായിരുന്നു. കർത്താവ് മനുഷ്യൻ്റെ പീഡനം സഹിക്കുമ്പോൾ, ദൈവം അവനോടുകൂടെ ഉണ്ടായിരുന്നു, അവൻ ദൈവത്തിൻ്റെ സാന്നിധ്യം ആസ്വദിച്ചു. എന്നാൽ അവസാനത്തെ മൂന്ന് മണിക്കൂറിൻ്റെ ഒടുവിൽ, ദൈവം അവനെ കൈവിട്ടു, ഇരുട്ട് കടന്നു വന്നു. ഇത് സഹിക്കാൻ കഴിയാതെ, കർത്താവ് ഉച്ചത്തിൽ നിലവിളിച്ചു, "എൻ്റെ ദൈവമേ, എൻ്റെ ദൈവമേ, എന്നെ കൈവിട്ടതെന്ത്?" അവൻ നമ്മുടെ പാപങ്ങൾ വഹിക്കുന്ന നമ്മുടെ പകരക്കാരനായതു കൊണ്ടാണ് ദൈവം അവനെ കൈവിട്ടത്. ഈ സമയത്താണ് ദൈവം നമ്മുടെ പാപങ്ങൾ അവന്റെമേൽ ഇട്ടത് എന്ന് യെശയ്യാവ് 53 വെളിപ്പെടുത്തുന്നു. ഉച്ചയ്ക്ക് പന്ത്രണ്ടു മണി മുതൽ വൈകുന്നേരം മൂന്ന് മണി വരെയുള്ള ഈ മൂന്ന് മണിക്കൂറിൽ നീതിമാനായ ദൈവം നമ്മുടെ എല്ലാ പാപങ്ങളും ഈ പകരക്കാരന്റെമേൽ ഇടുകയും നമ്മുടെ പാപങ്ങൾക്കുവേണ്ടി അവനെ നീതിപരമായി ന്യായം വിധിക്കുകയും ചെയ്തു. ഈ മണിക്കൂറുകളിൽ അവൻ ക്രൂശിൽ ഒരു പാപിയായിരുന്നതു കൊണ്ട് ദൈവം അവനെ കൈവിട്ടു; അവൻ പാപമാക്കപ്പെടുക പോലും ചെയ്തു. ഒരു വശത്ത്, കർത്താവ് നമ്മുടെ പാപങ്ങൾ വഹിച്ചു; മറുവശത്ത്, അവൻ നമുക്കുവേണ്ടി പാപമാക്കപ്പെട്ടു. അതുകൊണ്ട്, ദൈവം അവനെ ന്യായം വിധിച്ചു. ഇത് സമ്പൂർണ്ണമായും നീതിയുടെ ഒരു കാര്യമായിരുന്നു.