പ്രാർത്ഥനയെക്കുറിച്ച് ശ്രദ്ധിക്കേണ്ട മറ്റൊരു കാര്യം, നാം പ്രാർത്ഥനയിൽ ഉറ്റിരിക്കണം എന്നും പ്രാർത്ഥിക്കുന്നത് ഒരിക്കലും നിർത്തരുത് എന്നുമാണ്. ചില പ്രാർത്ഥനകൾക്ക് സ്ഥിരോത്സാഹം ആവശ്യമാണ്. കർത്താവിനെ അസഹ്യപ്പെടുത്തുകയും ഉത്തരം നൽകുവാൻ അവനെ നിർബന്ധിക്കുകയും ചെയ്യുന്ന അത്രത്തോളം ഒരാൾ പ്രാർത്ഥിക്കണം. ലൂക്കൊ 18 [1-8] നാം വീണ്ടും വീണ്ടും ചോദിക്കണം എന്ന് പറയുന്നു. ഒരു ദിവസം അവൻ നമ്മുടെ പ്രാർത്ഥനയ്ക്ക് ഉത്തരം നൽകുവാൻ നിർബന്ധിതനാകുന്നതുവരെ കർത്താവിനോട് നിരന്തരം പ്രാർത്ഥിക്കുവാനുള്ള വിശ്വാസം നമുക്കുണ്ടാകണം. പല പ്രാർത്ഥനകളും അസ്ഥിരമായ പ്രാർത്ഥനകളാണ്. ഒരാൾക്ക് ഒന്നോ രണ്ടോ ദിവസം പ്രാർത്ഥിക്കുവാൻ കഴിഞ്ഞേക്കും. എന്നാൽ മൂന്ന് മാസം കഴിയുമ്പോൾ, അവൻ അത് പൂർണ്ണമായും മറന്നുപോകുന്നു. ചിലർക്ക് ഒരു കാര്യത്തെക്കുറിച്ച് ഒരു തവണ മാത്രമേ പ്രാർത്ഥിക്കുവാൻ കഴിയൂ. അവർക്ക് അതിനായി രണ്ടാം തവണ പ്രാർത്ഥിക്കുവാൻ പോലും കഴിയില്ല. തങ്ങൾ ചോദിക്കുന്നത് ലഭിക്കുന്നുണ്ടോ എന്ന് അത്തരക്കാർ അല്പം പോലും ശ്രദ്ധിക്കുന്നില്ല. ഒരാൾക്ക് യഥാർത്ഥമായ ഒരു ആവശ്യമുണ്ടെങ്കിൽ മാത്രമേ അവൻ നിരന്തരം പ്രാർത്ഥിക്കുകയുള്ളൂ. സാഹചര്യങ്ങളാൽ സമ്മർദ്ദത്തിലാകുമ്പോഴും ആവശ്യങ്ങളാൽ നയിക്കപ്പെടുമ്പോഴും മാത്രമേ ഒരാൾ നിരന്തരം പ്രാർത്ഥിക്കുന്നുള്ളൂ. നിങ്ങൾക്ക് എന്തെങ്കിലും ചോദിക്കണമെന്നുണ്ടെങ്കിൽ, അതിനായി നിങ്ങൾ ദൈവത്തെ ശല്യപ്പെടുത്തണം. നിങ്ങൾക്കത് യഥാർത്ഥത്തിൽ വേണമെന്നുണ്ടെങ്കിൽ, ദൈവം നിങ്ങളുടെ അപേക്ഷ കേൾക്കുന്നതുവരെ നിങ്ങൾ നിരന്തരം ചോദിക്കണം. നിങ്ങളുടെ പ്രാർത്ഥനയ്ക്ക് ഉത്തരം നൽകുകയല്ലാതെ ദൈവത്തിന് മറ്റൊന്നും ചെയ്യുവാൻ കഴിയാത്ത വിധത്തിൽ നിങ്ങൾ ചോദിക്കണം. ദൈവം നിങ്ങൾക്ക് ഉത്തരം നൽകുവാൻ നിർബന്ധിതനാകുന്നതുവരെ നിങ്ങൾ ചോദിക്കണം.