നാം സഭായോഗങ്ങളെ ഉപേക്ഷിക്കുവാൻ പാടില്ലാത്തത് എന്തുകൊണ്ട്? കാരണം, സഭായോഗങ്ങളിലൂടെയാണ് ദൈവം തന്റെ കൃപ നമുക്ക് പകരുന്നത്. മനുഷ്യനോടുള്ള ദൈവത്തിന്റെ കൃപയെ വ്യക്തിപരം എന്നും സംഘാതം എന്നും രണ്ട് വിഭാഗങ്ങളായി തിരിക്കാം. ദൈവം നമുക്ക് വ്യക്തിപരമായ കൃപ മാത്രമല്ല സംഘാതമായ കൃപയും നൽകുന്നു. ഈ സംഘാതമായ കൃപ സഭാകൂടിവരവുകളിൽ അല്ലെങ്കിൽ യോഗങ്ങളിൽ മാത്രമേ കാണുവാൻ കഴിയൂ. ഒരുവന് വീട്ടിൽ തനിച്ച് പ്രാർത്ഥിക്കുവാൻ പഠിക്കാം; അത്തരം പ്രാർത്ഥനകൾ ദൈവം കേൾക്കുന്നു എന്നതിൽ സംശയമില്ല. വ്യക്തിപരമായ പ്രാർത്ഥനകൾക്ക് ദൈവം ഉത്തരം നൽകുന്നു. എങ്കിലും, മറ്റൊരുതരം പ്രാർത്ഥന കൂടിയുണ്ട്. ഈ രണ്ടാമത്തെ തരം പ്രാർത്ഥനയ്ക്ക് ഉത്തരം ലഭിക്കണമെങ്കിൽ, അത് യോഗങ്ങളിൽ, അതായത് രണ്ടോ മൂന്നോ പേർ കർത്താവിന്റെ നാമത്തിലേക്കു കൂട്ടിച്ചേർക്കപ്പെടുന്ന തത്ത്വത്തിൽ പ്രാർത്ഥിക്കണം. പല വലിയ കാര്യങ്ങൾക്കും ദൈവം ഉത്തരം നൽകുന്നതിന് മുമ്പ് യോഗങ്ങളിൽ വെച്ച് അവയ്ക്കായി പ്രാർത്ഥിക്കണം. ദൈവത്തിന്റെ സംഘാതമായ കൃപ യോഗങ്ങളിലൂടെ മാത്രമേ മനുഷ്യനിലേക്ക് വരുന്നുള്ളൂ. ഒരുവൻ തനിച്ച് പ്രാർത്ഥിക്കുന്നത് മതിയാകുമെന്നും അവന് സ്വയം ദൈവത്തിന്റെ കരുണ തേടാമെന്നും നിങ്ങൾ ചിന്തിച്ചേക്കാം. എന്നാൽ വ്യക്തിപരമായ പ്രാർത്ഥനകൾ മാത്രം ഫലിക്കില്ല എന്ന് പലരുടെയും അനുഭവം നമ്മോട് പറയുന്നു.രണ്ടോ മൂന്നോ പേർ പ്രാർത്ഥിക്കുകയോ അല്ലെങ്കിൽ എല്ലാ സഹോദരീസഹോദരന്മാരും ഒന്നിച്ച് ചേർന്ന് പ്രാർത്ഥിക്കുകയോ ചെയ്യാതെ ദൈവം ഉത്തരം നൽകില്ല എന്ന് തോന്നുന്നു. അതിനാൽ, പ്രാർത്ഥനകൾക്ക് നമുക്ക് രണ്ടുതരം ഉത്തരങ്ങളുണ്ട്: ഒന്ന് വ്യക്തിപരമായ പ്രാർത്ഥനകൾക്കുള്ള ഉത്തരവും, മറ്റൊന്ന് സഭയുടെ പ്രാർത്ഥനകൾക്കുള്ള ഉത്തരവുമാണ്. നാം മറ്റുള്ളവരോടൊപ്പം കൂടിവരുന്നില്ലെങ്കിൽ, ചില പ്രാർത്ഥനകൾക്ക് ഉത്തരം ലഭിക്കുകയില്ല.