ദിവസവും മൂന്നുനേരം താൻ ദൈവത്തോട് പ്രാർത്ഥിച്ചു എന്ന് ദാവീദ് ഒരു സങ്കീർത്തനത്തിൽ പറയുന്നു. എന്നാൽ മറ്റൊരു സങ്കീർത്തനത്തിൽ, താൻ ഒരു ദിവസം ഏഴുപ്രാവശ്യം ദൈവത്തെ സ്തുതിച്ചു എന്ന് അവൻ പറയുന്നു. സ്തുതിക്കുന്നതിന്റെ പ്രാധാന്യം തിരിച്ചറിഞ്ഞപ്പോൾ ദാവീദ് പരിശുദ്ധാത്മാവിനാൽ പ്രചോദിതനായി. അവൻ ദിവസവും മൂന്നുനേരം മാത്രം പ്രാർത്ഥിച്ചു, എന്നാൽ അവൻ ഏഴുപ്രാവശ്യം സ്തുതിച്ചു. സങ്കീർത്തനപുസ്തകം സ്തുതികളാൽ നിറഞ്ഞിരിക്കുന്നു. സങ്കീർത്തനപുസ്തകം യഥാർത്ഥത്തിൽ പഴയ നിയമത്തിലെ ഒരു സ്തുതിപുസ്തകമാണ്. പല സ്തുതികളും സങ്കീർത്തനങ്ങളിൽ നിന്നാണ് ഉദ്ധരിച്ചിരിക്കുന്നത്. എന്നിരുന്നാലും, സങ്കീർത്തനങ്ങളിൽ സ്തുതികളുടെ അധ്യായങ്ങൾ മാത്രമല്ല, കഷ്ടതകളുടെ അധ്യായങ്ങളും അടങ്ങിയിരിക്കുന്നു. പരീക്ഷണാത്മകമായ സാഹചര്യങ്ങളിലൂടെ നയിക്കപ്പെട്ടവരും തങ്ങളുടെ അനുഭൂതികൾ മുറിപ്പെട്ടവരുമാണ് സ്തുതിക്കുന്നവർ എന്ന് തന്റെ ജനം അറിയുവാൻ ദൈവം ആഗ്രഹിക്കുന്നു. ഇരുളിന്റെ നിഴലുകളിലൂടെ ദൈവത്താൽ നയിക്കപ്പെട്ട മനുഷ്യരെ ഈ സങ്കീർത്തനങ്ങൾ നമുക്ക് കാണിച്ചുതരുന്നു. അവർ തിരസ്ക്കരിക്കപ്പെടുകയും ദുഷിക്കപ്പെടുകയും പീഡിപ്പിക്കപ്പെടുകയും ചെയ്യപ്പെട്ടിരുന്നു. സ്തുതിയുടെ വാക്കുകൾ എല്ലായ്‌പ്പോഴും സുഗമമായി യാത്ര ചെയ്യുന്നവരുടെ വായകളിൽ നിന്നല്ല വരുന്നത്. അവ ശിക്ഷണത്തിനും പരീക്ഷണത്തിനും കീഴിലുള്ളവരിൽ നിന്നാണ് ഏറ്റവുമധികം വരുന്നത്. സങ്കീർത്തനങ്ങളിൽ നമുക്ക് ഏറ്റവും മുറിപ്പെട്ട അനുഭൂതികളെ സ്പർശിക്കുവാൻ കഴിയും, അതുപോലെതന്നെ സങ്കീർത്തനങ്ങളിൽ തന്നെ നമുക്ക് ഏറ്റവും മഹത്തായതും ഉന്നതവുമായ സ്തുതികളും കണ്ടെത്തുവാൻ കഴിയും. തന്റെ ജനത്തിൽ സ്തുതികൾ ഉളവാക്കുവാൻ ദൈവം പല കഷ്ടതകളും പ്രയാസങ്ങളും ദൂഷണങ്ങളും ഉപയോഗിക്കുന്നു. പ്രയാസകരമായ സാഹചര്യങ്ങളിലൂടെ കർത്താവിനു മുമ്പാകെ സ്തുതിക്കുന്ന വ്യക്തികളായിത്തീരുന്നത് പഠിക്കുവാൻ അവൻ അവരെ ഇടയാക്കുന്നു.