ദൈവം നമുക്ക് എന്താണെന്നതും ക്രിസ്തുവിൽ ദൈവം നമുക്ക് എന്ത് നൽകുന്നുവെന്നതുമാണ് ദൈവത്തിന്റെ കൃപ. വാസ്തവത്തിൽ, കൃപ എന്നത് ക്രിസ്തു താൻതന്നെയാണ്. യോഹന്നാന്റെ സുവിശേഷം ഒന്നാം അധ്യായത്തിൽ, ദൈവത്തോടുകൂടെ ആയിരുന്നതും ദൈവമായിരുന്നതുമായ വചനം ജഡമായി തീർന്നു, കൃപയും സത്യവും നിറഞ്ഞവനായി നമ്മുടെ ഇടയിൽ കൂടാരമടിച്ചു എന്ന് നമ്മോട് പറഞ്ഞിരിക്കുന്നു (വാ. 1, 14). ഇവിടെ സത്യം എന്നാൽ യാഥാർഥ്യം എന്നാണ് അർത്ഥമാക്കുന്നത്. സത്യത്തിലുള്ള ദൈവത്തിന്റെ കൃപയെ അറിയുക എന്നത് അതിനെ കേവലം വചനത്തിലോ മാനസികമായി ഉപദേശത്തിലോ അറിയുന്നതല്ല, മറിച്ച് അതിന്റെ യാഥാർഥ്യത്തിൽ അനുഭവപരമായി അറിയുന്നതാണ്. സത്യം എന്നത് യാഥാർഥ്യമായ ക്രിസ്തുവും, കൃപ എന്നത് നമ്മുടെ ആസ്വാദനമായ ക്രിസ്തുവുമാണ്. നാം ക്രിസ്തുവിനെ അനുഭവമാക്കുകയും അവനെ ആസ്വദിക്കുകയും ചെയ്യുമ്പോൾ, സത്യമായ ക്രിസ്തു നമ്മുടെ കൃപയായിത്തീരുന്നു. സുവിശേഷം നമ്മിൽ വളരുന്നതും ഫലം കായ്ക്കുന്നതും നാം ക്രിസ്തുവിനെ ആസ്വദിക്കുന്നതിലൂടെയും അവനെ നമ്മുടെ കൃപയായി അനുഭവമാക്കുന്നതിലൂടെയുമാണ്. "സത്യത്തിലുള്ള" എന്ന വാക്കിനെ അറിയുക എന്നതിനെ വിശേഷിപ്പിക്കുന്ന ഒരു പദമായി നാം എടുത്താൽ, കൃപയെക്കുറിച്ചുള്ള നമ്മുടെ അറിവ് ഉപദേശത്തിലല്ല, മറിച്ച് യാഥാർഥ്യത്തിലായിരിക്കണം എന്ന് നമുക്ക് കാണുവാൻ കഴിയും. ഇതിനർത്ഥം കൃപയായ ക്രിസ്തുവിനെ നാം അറിയുന്നത് യാഥാർഥ്യത്തിലായിരിക്കണം എന്നാണ്. സുവിശേഷത്തിൽ ക്രിസ്തു സത്യമായും കൃപയായും നമ്മിലേക്ക് പകരപ്പെടുകയും നിവേശിപ്പിക്കപ്പെടുകയും ചെയ്യുന്നു. നമ്മുടെ യാഥാർഥ്യമായി നമുക്ക് ക്രിസ്തുവുണ്ട്, ഈ യാഥാർഥ്യം നമ്മുടെ ആസ്വാദനമാണ്. സത്യമായും കൃപയായും നാം അനുഭവമാക്കുന്ന ക്രിസ്തുവിനാൽ നാം ജീവിക്കുമ്പോൾ, സ്വർഗത്തിൽ നാം നമുക്കായി പ്രത്യാശ സ്വരൂപിച്ചുവെക്കുന്നു.