ക്രിസ്തുവിനെയും സഭയെയും സംബന്ധിച്ച മർമം പുതിയനിയമ യുഗത്തിൽ ക്രിസ്തുവിൽ വിശ്വസിക്കുന്നവരായ വിശുദ്ധന്മാർക്ക് വെളിവാക്കപ്പെട്ടതുവരെ അത് പൂർവകാല നിത്യത മുതൽ എല്ലാ കാലങ്ങളിലും മറയ്ക്കപ്പെട്ടിരുന്നു. വാക്യം 26-ൽ മർമം അപ്പൊസ്തലന്മാർക്കാണ് വെളിവാക്കപ്പെട്ടതെന്ന് അപ്പൊസ്തലനായ പൗലൊസ് പറയുന്നില്ല, മറിച്ച് വിശുദ്ധന്മാർക്ക് വെളിവാക്കപ്പെട്ടുവെന്നാണ് അവൻ പറയുന്നത് എന്നത് പ്രധാനമാണ്. മതപരമായ പാരമ്പര്യങ്ങളുടെ സ്വാധീനം നിമിത്തം, ദൈവത്തിന്റെ വ്യവസ്ഥ പോലുള്ള കാര്യങ്ങൾ സാധാരണക്കാർ എന്ന് വിളിക്കപ്പെടുന്നവർക്ക് മനസ്സിലാക്കുവാൻ കഴിയില്ലെന്ന് പലരും വിശ്വസിക്കുന്നു. എന്നാൽ ക്രിസ്തുവിൽ വിശ്വസിക്കുന്ന എല്ലാ വിശുദ്ധന്മാർക്കും ഈ മർമം വെളിവാക്കപ്പെട്ടതിനായ് നാം കർത്താവിന് എത്രയധികം നന്ദി പറയുന്നു! നമ്മുടെ ഇടയിലുള്ള ഏറ്റവും ഇളയവർക്ക് പോലും ഈ മർമം കാണുവാനുള്ള സ്ഥാനവും അത് കാണുവാനുള്ള വിശേഷാവകാശവും ഉണ്ട്. ആദാമിനോ, നോഹെയ്‌ക്കോ, അബ്രാഹാമിനോ, മോശെയ്‌ക്കോ അല്ലെങ്കിൽ യെശയ്യാവു, യിരെമ്യാവു, സെഖർയ്യാവു തുടങ്ങിയ പ്രവാചകന്മാർക്കോ വെളിപ്പെടാത്ത ഒന്ന് കാണുവാനുള്ള വിശേഷാവകാശം നമുക്കുണ്ട്. പൂർത്തിയാക്കപ്പെട്ട ദൈവവചനം നമുക്ക് അറിയുവാൻ കഴിയുന്നതിനാൽ കർത്താവിനെ സ്തുതിക്കുക! ഇന്ന് നാം ദൈവത്തിന്റെ മർമം എന്ന നിലയിൽ ക്രിസ്തുവിലും, ക്രിസ്തുവിന്റെ മർമം എന്ന നിലയിൽ സഭയിലും നമ്മുടെ ശ്രദ്ധ കേന്ദ്രീകരിക്കുന്നു. ദൈവത്തിന്റെ മർമം എന്ന നിലയിൽ, സർവവും-ഉൾക്കൊള്ളുന്നവനായ ക്രിസ്തു ദൈവത്തിന്റെ ദേഹരൂപവും അതുപോലെതന്നെ ജീവൻ-നൽകുന്ന ആത്മാവുമാണ്. ക്രിസ്തുവിന്റെ മർമം എന്ന നിലയിൽ, സഭ ക്രിസ്തുവിന്റെ ശരീരവും, അവന്റെ നിറവും, ക്രിസ്തുവിന്റെ പൂർണ്ണമായ ആവിഷ്കാരം ആയിരിക്കുവാനുള്ള പുതു മനുഷ്യനും ആണ്. വിശുദ്ധന്മാർക്ക് വെളിവാക്കപ്പെട്ട മർമം ഇതാണ്.