നാം ഈ മഹത്വത്തെ കാണുന്നുവെങ്കിൽ, ആ മഹിമധനത്തെ വേണ്ടവിധം ഉരിയാടുവാൻ നമുക്ക് ഭാഷാപരിമിതി ഉണ്ടെങ്കിൽപ്പോലും നാം അതിനെ അറിയുവാൻ ഇടയാകും. ഈ ധനത്തിൽ ദിവ്യ ജീവനും, ദിവ്യസ്വഭാവവും, അഭിഷേകവും, സർവവും-ഉൾക്കൊള്ളുന്ന ആത്മാവും ഉൾപ്പെടുന്നു. നീതി, നീതീകരണം, വിശുദ്ധി, വിശുദ്ധീകരണം, രൂപാന്തരണം, തേജസ്സ്‌ക്കരണം, ആശ്വാസം, ദിവ്യ സാന്നിധ്യം എന്നിവയും ഈ ധനത്തിന്റെ മറ്റ് വശങ്ങളാണ്. മുഴുവൻ ധനത്തെയും ഒരു പട്ടികയിൽ ഉൾപ്പെടുത്തുക അസാധ്യമാണ്. അവ എണ്ണത്തിന് അപ്പുറമാണ്. നാം ദൈവത്തിന്റെ പുത്രന്മാരും അവകാശികളും, ക്രിസ്തുവിന്റെ കൂട്ടാളികളും, പുരോഹിതന്മാരും രാജാക്കന്മാരും ആയതുകൊണ്ട് നമുക്കുള്ളതായ മഹത്വത്തിന്റെ, നിസ്തുലമായ മഹത്വത്തിന്റെ ധനമാണിത്. മഹിമാധനത്തിന്റെ താക്കോൽ ക്രിസ്തു തന്നെയാണ്. ക്രിസ്തു കേവലം നമ്മുടെ ഇടയിൽ മാത്രമല്ല; അവൻ നമ്മുടെയുള്ളിലുമുണ്ട് എന്ന് കൊലൊ 1:27 സൂചിപ്പിക്കുന്നു. നമ്മെ സംബന്ധിച്ചിടത്തോളം ക്രിസ്തു വസ്തുനിഷ്ഠനായവൻ മാത്രമല്ല, നമ്മിൽ വസിക്കുന്ന വ്യക്തിനിഷ്ഠനായവൻ കൂടിയാണ്. ക്രിസ്തു നമ്മിൽ ഉൾവസിക്കുന്നത് എത്ര വലിയ മഹത്വമാണ്! ക്രിസ്തുവിൽ വിശ്വസിക്കുന്നവർ എന്ന നിലയിൽ, ഈ മർമത്തിന്റെ മഹിമാധനം എന്തെന്ന് നാം അറിയുന്നു. അത്തരമൊരു മഹിമാധനത്തിലെ ഇനങ്ങളെ നമുക്ക് തീർക്കുവാനാവില്ല. നമ്മുടെ ഓഹരിയായ ഈ മഹിമാധനത്തിൽ ബൈബിളിലെ സകല അനുഗ്രഹങ്ങളും ഉൾപ്പെട്ടിരിക്കുന്നു. ഈ മഹത്വം ജാതികളുടെ ഇടയിലുള്ള മർമത്തിന്റെ മഹത്വമാണ്, ഈ മർമം നമ്മിലുള്ള ക്രിസ്തുവാണ്. നമുക്കുള്ളിൽ വസിക്കുന്ന ക്രിസ്തു എണ്ണമറ്റ ധനത്താൽ നിറഞ്ഞ മഹത്വമേറിയ മർമമാണ്.