പ്രസംഗകർ സുവിശേഷത്തിന് മാതൃകയായിരുന്നതുകൊണ്ട്, വിശ്വാസികൾ അവരുടെ അനുകാരികളായിത്തീർന്നു. ഇത് പിന്നീട് കർത്താവിനെ തങ്ങളുടെ മാതൃകയായി സ്വീകരിച്ചുകൊണ്ട് അവനെ പിന്തുടരുവാൻ വിശ്വാസികളെ നയിച്ചു (മത്താ. 11:29). പുതിയ വിശ്വാസികൾ എന്ന നിലയിൽ തെസ്സലൊനീക്യർ ആദ്യം അപ്പൊസ്തലന്മാരുടെ അനുകാരികളായിത്തീരുകയും, പിന്നീട് അവർ കർത്താവിന്റെ അനുകാരികളായിത്തീരുകയും ചെയ്തു. മറ്റുള്ളവർക്ക് നാം ഒരു ദൃഷ്ടാന്തം, ഒരു മാതൃകയായിരിക്കണം എന്ന് ഇത് സൂചിപ്പിക്കുന്നു. വിശ്വാസികൾ കർത്താവിനെയല്ല ആദ്യം കാണുന്നത്; അവർ നമ്മെയാണ് ആദ്യം കാണുന്നത്. നാം ശരിയായ ഒരു മാതൃകയല്ലെങ്കിൽ, മറ്റുള്ളവർക്ക് കർത്താവിനെ കാണുക ബുദ്ധിമുട്ടായിരിക്കും. നാം കർത്താവിന്റെ പ്രതിനിധികൾ ആയതുകൊണ്ട്, നാം ശരിയായ ഒരു മാതൃകയായിരിക്കണം. അപ്പോൾ മറ്റുള്ളവർക്ക് നമ്മെ അനുകരിച്ചുകൊണ്ട് കർത്താവിനെ അനുകരിക്കുവാൻ കഴിയും. ഇതിനർത്ഥം നമ്മിലൂടെ അവർ അവനെ അനുകരിക്കുന്നു എന്നാണ്. 7, 8 വാക്യങ്ങളിൽ പൗലോസ് പറയുന്നു, "അങ്ങനെ മക്കെദോന്യയിലും അഖായയിലും, വിശ്വസിക്കുന്ന എല്ലാവർക്കും നിങ്ങൾ ഒരു മാതൃകയായിത്തീർന്നു. നിങ്ങളിൽ നിന്ന് കർത്താവിന്റെ വചനം മുഴങ്ങിച്ചെന്നു; മക്കെദോന്യയിലും അഖായയിലും മാത്രമല്ല, എല്ലായിടത്തും ദൈവത്തോടുള്ള നിങ്ങളുടെ വിശ്വാസം പുറപ്പെട്ടുചെന്നു, അതുകൊണ്ട് ഞങ്ങൾക്ക് ഒന്നും പറയേണ്ട ആവശ്യമില്ല." അപ്പൊസ്തലന്മാരുടെ അനുകാരികൾ മറ്റെല്ലാ വിശ്വാസികൾക്കും ഒരു മാതൃകയായിത്തീർന്നു എന്ന് നാം ഇവിടെ കാണുന്നു. അവർ ആ മാതൃകയെ അനുകരിച്ചു, പിന്നീട് അവർ റോമൻ പ്രവിശ്യകളായ മക്കെദോന്യയിലെയും അഖായയിലെയും വിശ്വാസികൾക്ക് ഒരു മാതൃകയായിത്തീർന്നു.