പൗലോസ് പ്രസംഗിച്ച വചനത്തിന്റെ, അതായത് സുവിശേഷത്തിന്റെ ഉള്ളടക്കം നാം ഇപ്പോൾ പഠിക്കേണ്ടതുണ്ട്. പൗലോസ് പ്രസംഗിച്ചത് ത്രിയേക ദൈവത്തെക്കുറിച്ചാണ് എന്നതിൽ യാതൊരു സംശയവുമില്ല. 4-ാം വാക്യത്തിൽ അവൻ പറയുന്നു, "സഹോദരന്മാരെ, ദൈവത്തിന്റെ പ്രിയരേ, നിങ്ങളുടെ തിരഞ്ഞെടുപ്പിനെ അറിയുന്നുവല്ലോ." തിരഞ്ഞെടുപ്പ് എന്നത് പൂർവകാല നിത്യതയിൽ പിതാവിന്റെ വേലയെ സൂചിപ്പിക്കുന്നു. അപ്പോഴാണ് ദൈവം നമ്മെ തിരഞ്ഞെടുത്തത്. 10-ാം വാക്യത്തിൽ നമ്മെ വിടുവിക്കുന്നവൻ എന്ന നിലയിൽ പുത്രനെക്കുറിച്ച് പൗലോസ് സംസാരിക്കുന്നു. പുത്രനാണ് രക്ഷകൻ, വിടുവിക്കുന്നവൻ. 5-ാം വാക്യത്തിൽ പൗലോസ് പറയുന്നത് അവർ പ്രസംഗിച്ച സുവിശേഷം ശക്തിയിലും പരിശുദ്ധാത്മാവിലുമാണ് വന്നത് എന്നാണ്; 6-ാം വാക്യത്തിൽ തെസ്സലൊനീക്യർ പരിശുദ്ധാത്മാവിന്റെ സന്തോഷത്തോടുകൂടെ വചനത്തെ സ്വീകരിച്ചു എന്ന് നാം കാണുന്നു. സുവിശേഷം പരിശുദ്ധാത്മാവിൽ പ്രസംഗിക്കപ്പെട്ടു എന്നത് ദൈവത്തിന്റെ കാര്യങ്ങളെ നമ്മിലേക്ക് പ്രസരണം ചെയ്യുന്നവൻ ആത്മാവാകുന്നു എന്ന് സൂചിപ്പിക്കുന്നു. അങ്ങനെ, പിതാവായ ദൈവം നമ്മെ തിരഞ്ഞെടുത്തു, പുത്രനായ ദൈവം നമ്മെ വിടുവിക്കുവാൻ വീണ്ടെടുപ്പ് നിവർത്തിച്ചു, ആത്മാവായ ദൈവം എല്ലാ ദിവ്യ കാര്യങ്ങളെയും നമ്മിലേക്ക് പ്രസരണം ചെയ്യുന്നു. ഇതാണ് പൗലോസ് സുവിശേഷമായി പ്രസംഗിച്ച വചനത്തിന്റെ ഉള്ളടക്കം. ത്രിയേക ദൈവം വചനത്തിൽ ദേഹരൂപമായിരിക്കുന്നു എന്ന് ഞാൻ പറയുന്നതിനുള്ള കാരണം ഇതാകുന്നു.