ഇനി സഭ കർത്താവായ യേശുക്രിസ്തുവിൽ ആയിരിക്കുക എന്നാൽ എന്താണ് അർത്ഥമാക്കുന്നത് എന്ന് നമുക്ക് തുടർന്ന് പരിഗണിക്കാം. ക്രിസ്തുവിൽ ആയിരിക്കുക എന്നത് ഒരു വലിയ കാര്യമാണ്. ക്രിസ്തുവിൽ ആയിരിക്കുക എന്നുവെച്ചാൽ അവിടെ പാപമോ, ജഡമോ, സ്വയമോ, സ്വാഭാവിക ജീവനോ, പഴയ സൃഷ്ടിയോ, മരണമോ, സാത്താനോ ഇല്ല എന്നാണ് അർത്ഥം. നാം ക്രിസ്തുവിൽ ആണെങ്കിൽ, പ്രതിലോമപരമായ എല്ലാ കാര്യങ്ങളും അവസാനിപ്പിക്കപ്പെട്ടിരിക്കുന്നു. ക്രിസ്തുവിൽ ആയിരിക്കുന്നവർക്ക് ദൈവമല്ലാത്ത മറ്റെല്ലാം അവസാനിപ്പിക്കപ്പെട്ടിരിക്കുന്നു. ക്രിസ്തുവിൽ എന്തെല്ലാം അവസാനിപ്പിക്കപ്പെട്ടിരിക്കുന്നു എന്നത് നാം തിരിച്ചറിഞ്ഞാൽ, സഭകൾ എന്ന് വിളിക്കപ്പെടുന്നവ ചില പേരുകളാൽ തങ്ങളെ അടയാളപ്പെടുത്തുന്നത് ലജ്ജാകരമാണ് എന്ന് നാം മനസ്സിലാക്കും. ഉദാഹരണത്തിന്, ചൈനയിൽ അമേരിക്കൻ പ്രെസ്ബിറ്റീരിയൻ സഭ എന്ന് വിളിക്കപ്പെടുന്ന ഒരു കൂട്ടം ഉണ്ടായിരുന്നു. അടുത്ത കാലത്ത് തെക്കൻ കാലിഫോർണിയയിൽ "ദി ഓറഞ്ച് കൗണ്ടി ചൈനീസ് തായ്‌വാനീസ് സഭ" എന്ന് എഴുതിയ ഒരു ബോർഡ് ഞാൻ കാണുകയുണ്ടായി. സഭയിൽ അങ്ങനെയുള്ള യാതൊരു പേരുകൾക്കോ നിയോഗങ്ങൾക്കോ സ്ഥാനമില്ല. ഇങ്ങനെയുള്ള ഒരു പേര് സ്വീകരിക്കുന്നവർ, തങ്ങൾ കർത്താവായ യേശുക്രിസ്തുവിലുള്ള സഭയല്ല എന്ന് അങ്ങനെ ചെയ്യുന്നതിലൂടെ സൂചിപ്പിക്കുന്നു. അവർക്ക് ഒരു പേരുണ്ട് എന്ന വസ്തുത, അവർക്കിടയിലെ പല കാര്യങ്ങളും അവസാനിപ്പിക്കപ്പെട്ടിട്ടില്ല എന്നതിനെ സൂചിപ്പിക്കുന്നു. സഭ കർത്താവായ യേശുക്രിസ്തുവിലാണ്. സഭയെ സംബന്ധിച്ചിടത്തോളം സ്വാഭാവികമായ എല്ലാം, പ്രതിലോമപരമായ എല്ലാം, പഴയ സൃഷ്ടിയുടെ എല്ലാം അവസാനിപ്പിക്കപ്പെട്ടിരിക്കുന്നു എന്ന് ഇത് സൂചിപ്പിക്കുന്നു. ഇതിനർത്ഥം സഭയിൽ ചൈനക്കാരോ അമേരിക്കക്കാരോ, ജപ്പാൻകാരോ കൊറിയക്കാരോ, ഫ്രഞ്ചുകാരോ ജർമ്മൻകാരോ ഇല്ല എന്നാണ്. സഭയിൽ കർത്താവായ യേശുക്രിസ്തുവിന് മാത്രമേ സ്ഥാനമുള്ളൂ. സഭ കർത്താവായ യേശുക്രിസ്തുവിൽ ആയിരിക്കുന്നതിന്റെ പ്രാധാന്യം ഇതാണ്.