ദൈവത്തിന്റെ തിരഞ്ഞെടുപ്പുമായി ബന്ധപ്പെട്ടിരിക്കുന്നതിനാൽ കരുണയെയും കൃപയെയും മനസ്സിലാക്കുവാൻ അല്പം പ്രയാസമാണ്. പൂർവകാല നിത്യതയിൽ നാം ദൈവത്താൽ തിരഞ്ഞെടുക്കപ്പെടുകയും മുൻഅറിയപ്പെടുകയും ചെയ്തുവെങ്കിലും, ദൈവം നമ്മെ വിളിക്കുവാൻ വന്നപ്പോൾ, നാം ഒരു പരിതാപകരമായ അവസ്ഥയിലായിരുന്നു, ദൈവത്തിന്റെ കരുണ ആവശ്യമായിരുന്ന ഒരു അവസ്ഥയിലായിരുന്നു. ശത്രുവായ പിശാച് ദൈവത്തോട് ഒരുപക്ഷേ ഇപ്രകാരം പറഞ്ഞിട്ടുണ്ടാകാം, "നിന്റെ തിരഞ്ഞെടുപ്പായ ഇവനെ നോക്കൂ. അവൻ എത്ര പരിതാപകരനാണ്!" അപ്പോൾ ദൈവം സാത്താനോട് ഒരുപക്ഷേ ഇപ്രകാരം പറഞ്ഞിരിക്കാം, "സാത്താനേ, എന്റെ കരുണ കാണിക്കുവാൻ ഇത് എനിക്ക് വളരെ നല്ലൊരു അവസരമാണെന്ന് നീ തിരിച്ചറിയുന്നില്ലയോ? ഇത്രയും പരിതാപകരനായ ഒരു വ്യക്തിയില്ലാതെ, എനിക്ക് എങ്ങനെ എന്റെ കരുണ കാണിക്കുവാൻ കഴിയും? എല്ലാവരും തികഞ്ഞവരും എന്റെ നിലവാരത്തിനൊത്തവരും ആയിരുന്നെങ്കിൽ, കരുണ കാണിക്കുവാൻ എനിക്ക് ആരും ഉണ്ടാകുമായിരുന്നില്ല. സാത്താനേ, ഈ തിരഞ്ഞെടുക്കപ്പെട്ടവൻ എന്റെ കരുണയുടെ വിഷയമായിരിക്കുവാൻ ശരിയായ വ്യക്തിയാണ്." കൃപയെക്കുറിച്ച് എന്താണ്? നാം കണ്ടതുപോലെ, കൃപ എന്നത് നമ്മുടെ ആളത്തത്തിലേക്ക് പണിതുചേർക്കപ്പെട്ട ദൈവത്തിന്റേതായ ഒന്നാകുന്നു. നാം ദൈവത്തിന്റെ കരുണയുടെ വിഷയങ്ങൾ മാത്രമല്ല; നാം അവന്റെ കൃപയുടെ വിഷയങ്ങളുമാകുന്നു. നാം ദൈവത്തിന്റെ കരുണയിൻ കീഴിലാണ്, കൂടാതെ അവന്റെ കൃപ നമ്മിൽ ഉണ്ട്. നാം ഏറ്റവും പരിതാപകരരും ദയനീയരുമായിരുന്നുവെങ്കിലും, ദൈവം ഇടപ്പെട്ട് നമുക്ക് അവന്റെ കരുണ നൽകിയെന്നും നാം മാനസാന്തരപ്പെട്ടുവെന്നും നമുക്കെല്ലാവർക്കും സാക്ഷ്യപ്പെടുത്തുവാൻ കഴിയും. ആ സമയത്തുതന്നെ, ദിവ്യമായ ഒന്ന്—ദൈവത്തിന്റെ കൃപ—നമ്മിലേക്ക് പണിതുചേർക്കപ്പെട്ടു. ഇപ്പോൾ നാം ദൈവത്തിന്റെ കരുണയിൻ കീഴിൽ മാത്രമല്ല; ആത്മാവെന്ന നിലയിൽ ജീവനുള്ള ക്രിസ്തു എന്ന വ്യക്തിയായ അവന്റെ കൃപയും നമ്മിൽ ഉണ്ട്. ഇതാണ് ദൈവത്തിന്റെ തിരഞ്ഞെടുപ്പ്.