വീണുപോയ മനുഷ്യരെ വീണ്ടെടുത്ത രക്തം ദൈവപുത്രനായ യേശുവിന്റെ രക്തമാകുന്നു. മനുഷ്യർ എന്ന നിലയിൽ, നമ്മുടെ വീണ്ടെടുപ്പിനായി നമുക്ക് യഥാർത്ഥ മനുഷ്യ രക്തം ആവശ്യമാണ്. അവൻ ഒരു മനുഷ്യനായിരുന്നതിനാൽ, കർത്താവായ യേശുവിന് ഈ നിബന്ധന നിവർത്തിക്കുവാൻ കഴിഞ്ഞു. ഒരു മനുഷ്യനായി, വീണുപോയ മനുഷ്യരെ വീണ്ടെടുക്കുവാൻ അവൻ മനുഷ്യ രക്തം ചൊരിഞ്ഞു. കർത്താവ് ദൈവപുത്രനും, സാക്ഷാൽ ദൈവം തന്നെയുമാകുന്നു. അതിനാൽ, അവന്റെ രക്തത്തോടൊപ്പം നിത്യതയുടെ മൂലകം ഉണ്ട്, ഈ മൂലകം അവന്റെ രക്തത്തിന്റെ നിത്യമായ സഫലതയെ ഉറപ്പുവരുത്തുന്നു. ക്രൂശിൽ നിവർത്തിക്കപ്പെട്ട വീണ്ടെടുപ്പ് കേവലം ഒരു മനുഷ്യനാൽ മാത്രമാണ് നിവർത്തിക്കപ്പെട്ടതെങ്കിൽ, ആ വീണ്ടെടുപ്പിന് നിത്യമായി സഫലമായിരിക്കുവാൻ കഴിയുമായിരുന്നില്ല. അത് ഒരു വ്യക്തിയുടെ വീണ്ടെടുപ്പിന് സഫലമായിരിക്കാമെങ്കിലും, ലക്ഷക്കണക്കിന് വിശ്വാസികളുടെ വീണ്ടെടുപ്പിന് സഫലമായിരിക്കുകയില്ല. മനുഷ്യൻ പരിമിതനായതിനാൽ, ഒരു പ്രത്യേക മനുഷ്യന് ദശലക്ഷക്കണക്കിന് മറ്റുള്ളവർക്കായി മരിക്കുവാൻ കഴിയില്ല. എന്നാൽ, മനുഷ്യൻ പരിമിതനാണെങ്കിലും, ദൈവം പരിമിതനല്ല. അതുപോലെ, മനുഷ്യൻ താത്കാലികനാണെങ്കിലും, ദൈവം നിത്യനാകുന്നു. അതിനാൽ, ക്രിസ്തുവിന്റെ വീണ്ടെടുപ്പിൽ ദൈവത്തിന്റെ നിത്യവും അപരിമേയവുമായ മൂലകമുണ്ട്. ഇക്കാരണത്താലാണ് എബ്രായർ 9:12-ൽ ഈ വീണ്ടെടുപ്പിനെ ഒരു നിത്യ വീണ്ടെടുപ്പ് എന്ന് വിളിച്ചിരിക്കുന്നത്. കർത്താവ് ക്രൂശിൽ ചൊരിഞ്ഞ രക്തം ദൈവപുത്രനായ യേശുവിന്റെ രക്തമായിരുന്നു. അത് യേശുവിന്റെ രക്തം മാത്രമല്ലായിരുന്നു; അത് ദൈവപുത്രന്റെ രക്തം കൂടെയായിരുന്നു. ഇക്കാരണത്താൽ, ദൈവ-മനുഷ്യനാൽ, ദൈവത്തോട് ഇഴുകിച്ചേർന്ന ഒരുവനാൽ നിവർത്തിക്കപ്പെട്ട വീണ്ടെടുപ്പ് നിത്യമാകുന്നു.