CNT-യിൽ നിന്നുള്ള ഉദ്ധരണികൾ:

2 കൊരിന്ത്യർ 8:9 സൂചിപ്പിക്കുന്നത്, നമുക്ക് കൃപയുടെ ഘടകമായി ക്രിസ്തുവിനെ അനുഭവിക്കുവാനും ആസ്വദിക്കുവാനും കഴിയും എന്നാണ്. “നമ്മുടെ കർത്താവായ യേശു ക്രിസ്തു സമ്പന്നനായിരുന്നിട്ടും അവന്റെ ദാരിദ്ര്യം നിമിത്തം നിങ്ങൾ സമ്പന്നരാകേണ്ടതിന് നിങ്ങൾ നിമിത്തം ദരിദ്രനായിത്തീർന്ന അവന്റെ കൃപ നിങ്ങൾ അറിയുന്നുവല്ലോ.” അവൻ കൃപയുടെ ഘടകമാണ്, കാരണം അവൻ, സമ്പന്നനായിരുന്നിട്ടും അവന്റെ ദാരിദ്ര്യം നിമിത്തം നാം സമ്പന്നരാകേണ്ടതിന് നമ്മൾ നിമിത്തം അവൻ ദരിദ്രനായിത്തീർന്നു. കൃപയുടെ ഘടകം എന്ന നിലയിൽ, ക്രിസ്തു, സമ്പന്നനായിരുന്നിട്ടും, അവൻ നമുക്ക് കൃപയായിത്തീരുവാൻ, നമുക്കായ് തന്നെത്തന്നെ നൽകേണ്ടതിന് അവൻ ദരിദ്രനായിത്തീർന്നു.

a. അവൻ സമ്പന്നനായിരുന്നിട്ടും നമ്മൾ നിമിത്തം ദരിദ്രനായിത്തീർന്നത് കൃപയാകുന്നു

കർത്താവായ യേശു, സമ്പന്നനായിരുന്നിട്ടും, നമ്മൾ നിമിത്തം ദരിദ്രനായിത്തീർന്നത് കൃപയാകുന്നു. ഇതേ തത്ത്വത്തിൽ, മറ്റുള്ളവർ നിമിത്തം നാം നമ്മുടെ ഭൗതിക സമ്പത്ത് ത്യജിക്കുന്നുവെങ്കിൽ അത് അവർക്ക് ഒരു കൃപയാണ്. പ്രത്യക്ഷത്തിൽ, കർത്താവായ യേശു ദരിദ്രനായിത്തീർന്നത്, ആവശ്യത്തിലിരിക്കുന്ന വിശുദ്ധന്മാർക്ക് ഭൗതിക സഹായം നൽകുന്ന ശുശ്രൂഷയുമായി യാതൊരു ബന്ധവുമില്ല. വാസ്തവത്തിൽ, കർത്താവായ യേശു ദരിദ്രനായിത്തീർന്നിരുന്നില്ലെങ്കിൽ, നമുക്ക് അവനെ നമ്മുടെ കൃപയായി ലഭിക്കുമായിരുന്നില്ല. കർത്താവായ യേശു മനുഷ്യത്വത്തിലേക്ക് വന്നിട്ടേയില്ല എന്ന് കരുതുക. അങ്ങനെയെങ്കിൽ, അവൻ എങ്ങനെ നമ്മുടെ ജീവനാകും? ആവശ്യമുള്ള വിശുദ്ധന്മാർക്ക് ശുശ്രൂഷ ചെയ്യുവാൻ നമ്മെ പ്രേരിപ്പിക്കുകയും, ശക്തിപ്പെടുത്തുകയും, പോഷിപ്പിക്കുകയും ചെയ്തുകൊണ്ട് നമ്മുടെ ഉള്ളിൽ വ്യാപരിക്കുന്ന കൃപയായ് അവന് എങ്ങനെയാകുവാൻ കഴിയുമായിരുന്നു? ഇത് അസാധ്യമായിരിക്കും. ക്രിസ്തുവിന് ഇന്ന് നമ്മിൽ വ്യാപരിക്കുവാൻ കഴിയുന്നത് അവൻ ദരിദ്രനായിത്തീർന്നതുകൊണ്ട് മാത്രമാണെന്ന് നാം തിരിച്ചറിയുന്നത് നിർണായകമാണ്. നമ്മൾ നിമിത്തം അവൻ ദരിദ്രനായിത്തീർന്നത് നമുക്ക് ഒരു ഉദാഹരണമായിരിക്കണം. ഒരു വശത്ത്, അവൻ നമ്മുടെ ഉള്ളിലുള്ള ജീവനാണ്; മറുവശത്ത്, അവൻ പുറമേയുള്ള മാതൃകയാണ്, ഉദാഹരണമാണ്. നമ്മുടെ ഉള്ളിലുള്ള കർത്താവിന്റെ ജീവൻ, സമ്പന്നനായിരുന്നിട്ടും ദരിദ്രനായിത്തീർന്നവന്റെ ജീവനാണ്. നമ്മുടെ ജീവനും മാതൃകയുമായ അങ്ങനെയുള്ളവൻ എന്ന നിലയിൽ, ക്രിസ്തു നമുക്ക് കൃപയാകുന്നു. നാം കർത്താവായ യേശുവിൽ നിന്ന് കൃപ പ്രാപിക്കേണ്ടതുണ്ട്. അപ്പോൾ ഈ കൃപ കർത്താവായ യേശു ചെയ്തത് ചെയ്യുവാൻ നമ്മെ പ്രാപ്തരാക്കും: മറ്റുള്ളവർ നിമിത്തം നാം ദരിദ്രരായിത്തീരുവാൻ. നാം അതിയായ ദാരിദ്ര്യത്തിലായിരിക്കുമ്പോൾ പോലും, ആവശ്യമുള്ള വിശുദ്ധന്മാരുമായി പങ്കുവയ്ക്കുവാൻ നമുക്ക് എന്തെങ്കിലും ഉണ്ടായിരിക്കും. മറ്റുള്ളവർക്കുവേണ്ടി ദരിദ്രരായിത്തീരുവാൻ ഉള്ളിലുള്ള ജീവനും, പിന്തുടരുവാൻ പുറമെയുള്ള മാതൃകയും നമുക്കുണ്ട്. നാം ഈ കൃപ പ്രാപിക്കണം.

b. അവന്റെ ദാരിദ്ര്യം നിമിത്തം നാം സമ്പന്നരാകേണ്ടതിന്

ദരിദ്രനായിത്തീർന്നതിലൂടെ, ക്രിസ്തു തന്നെത്തന്നെ നമ്മുടെ സമ്പത്തായി തീരുവാൻ നൽകി. അവൻ നസറെത്തിൽ ആ ദരിദ്രമായ ചുറ്റുപാടിൽ ഒരു ദരിദ്രനായ തച്ചനായ് ജീവിച്ചിരുന്നില്ലെങ്കിൽ, അവന് എങ്ങനെ നമ്മുടെ സമ്പത്താകുവാൻ കഴിയുമായിരുന്നു? ഇതെല്ലാം കൃപയാണ്. കൃപയാൽ, ക്രിസ്തു നമ്മുവേണ്ടി തന്നെത്തന്നെ താഴ്ത്തി തന്റെ സ്ഥാനം വിട്ടു വന്നു. നാം സമ്പന്നരാകേണ്ടതിന് അവൻ തന്റെ സമ്പത്ത് ഉപേക്ഷിച്ചു. ക്രിസ്തുവിന്റെ കൃപയിലൂടെ മാത്രമേ നമുക്ക് അങ്ങനെയൊരു കാര്യം ചെയ്യുവാൻ കഴിയൂ. അവന്റെ കൃപയെ നാം നമ്മുടെ ആസ്വാദനമായി എടുക്കുകയാണെങ്കിൽ, സ്വാഭാവികമായി നാം ക്രിസ്തു ചെയ്ത അതേ കാര്യം ചെയ്യും—മറ്റുള്ളവർ നിമിത്തം നാം ദരിദ്രരായിത്തീരും. വാസ്തവത്തിൽ, ഇത് ചെയ്യുന്നവർ നമ്മളായിരിക്കില്ല, മറിച്ച് നമ്മിൽ വസിക്കുന്ന ക്രിസ്തുവായിരിക്കും.