[ക്രിസ്തുവുമായുള്ള] ഈ ജൈവിക ഐക്യത്തിൽ നാം കർത്താവുമായി ഒന്നാണ്, കാരണം നമുക്ക് അവനുമായി ഒരു ജീവനും ഒരു ജീവിതവുമാണുള്ളത്. നാം ജീവിക്കുമ്പോൾ അവൻ ജീവിക്കുന്നു. അവൻ നമ്മിൽ ജീവിക്കുന്നു, നാം അവനോടുകൂടെ ജീവിക്കുന്നു. നാം അവനാൽ ജീവിക്കുന്നു, അവൻ നമ്മിൽ ജീവിക്കുന്നു. നാം ജീവിക്കുന്നില്ലെങ്കിൽ, അവൻ ജീവിക്കുന്നില്ല, അവൻ ജീവിക്കുന്നില്ലെങ്കിൽ, നമുക്ക് ജീവിക്കുവാൻ കഴിയുകയുമില്ല.

യേശു എന്ന പേരിന്റെ അർഥം 'രക്ഷകനായ യഹോവ' അല്ലെങ്കിൽ 'യഹോവയുടെ രക്ഷ' എന്നാണ്. യഹൂദന്മാർ യഹോവയിൽ വിശ്വസിക്കുന്നു, എന്നാൽ യേശുവിൽ വിശ്വസിക്കുന്നില്ല. ഒരർഥത്തിൽ, അവർക്ക് യഹോവയുണ്ട്, എന്നാൽ അവർക്ക് രക്ഷയോ രക്ഷകനോ ഇല്ല. യഹൂദന്മാർക്കുള്ളതിനേക്കാൾ കൂടുതൽ നമുക്കുണ്ട്, കാരണം നമുക്ക് രക്ഷകനായ യഹോവയും നമ്മുടെ രക്ഷയായ യഹോവയും ഉണ്ട്.

നാം കൃപയെ വിലമതിക്കുന്നു എന്നാൽ കഷ്ടതയെ വിലമതിക്കുന്നില്ല എന്നു നാം പറഞ്ഞാൽ, അത് നാം ദൈവത്തെ സ്നേഹിക്കുന്നു എന്നാൽ യേശുവിനെ സ്നേഹിക്കുന്നില്ല എന്ന് പറയുന്നതുപോലെ ആണ്. എന്നാൽ, യേശുവിനെ നിരസിക്കുന്നത് ദൈവത്തെ നിരസിക്കുന്നതാണ്. അതുപോലെ, കഷ്ടതയെ നിരസിക്കുന്നത് കൃപയെ നിരസിക്കുന്നതാണ്. എന്തിനാണ് ദൈവം ജഡാവതാരം ചെയ്തത്? കാരണം അവൻ നമ്മുടെ അടുക്കൽ വരുവാൻ ആഗ്രഹിച്ചു. ദൈവത്തിന്റെ ജഡാവതാരം അവന്റെ കൃപയുള്ള സന്ദർശനമായിരുന്നു. തീർച്ചയായും ദൈവത്തിൽനിന്നുള്ള അത്തരം ഒരു സന്ദർശനം നാമെല്ലാം ഇഷ്ടപ്പെടുന്നു. അവന്റെ സന്ദർശനത്തെ നാം സ്നേഹിക്കുന്നുവെങ്കിൽ, നാം അവന്റെ ജഡാവതാരത്തെ സ്നേഹിക്കണം. കൃപയും കഷ്ടതയും അതുപോലെയാണ്. നമ്മെ സന്ദർശിക്കുന്ന കൃപയുടെ ജഡാവതാരമാണ് കഷ്ടത. നാം ദൈവകൃപയെ സ്നേഹിക്കുന്നുവെങ്കിലും, നാം കൃപയുടെ ജഡാവതാരമായ കൃപയുടെ മധുര സന്ദർശനമായ കഷ്ടതയെയും ചുംബിക്കണം.

കഷ്ടത വാസ്തവത്തിൽ, ക്രിസ്തുവിന്റെ സമ്പന്നതകളെല്ലാം കൂടിയ കൃപയുടെ ജഡാവതാരം ആണ്. ഇത് യേശുവിലുള്ള ദൈവത്തിന്റെ ജഡാവതാരത്തിന് സമാനമാണ്. പ്രത്യക്ഷത്തിൽ, അവൻ മനുഷ്യനായ യേശു മാത്രമായിരുന്നു; വാസ്തവത്തിൽ അവൻ ദൈവമായിരുന്നു. പ്രത്യക്ഷത്തിൽ നമ്മുടെ സാഹചര്യം കഷ്ടതയാണ്; വാസ്തവത്തിൽ അത് കൃപയാണ്.

നമ്മുടെ സ്വാഭാവികമായ ആളത്തം വിശുദ്ധീകരിക്കപ്പെടുകയും, രൂപാന്തരപ്പെടുകയും, അനുരൂപപ്പെടുകയും ചെയ്യേണ്ടതുണ്ട്. അതുകൊണ്ട്, നമ്മുടെ നന്മയ്ക്കായി ദൈവം ചില കഷ്ടതകളും ക്ലേശങ്ങളും കൊണ്ടുവരുന്നു. നാം അവന്റെ പുത്രന്റെ സ്വരൂപത്തോട് അനുരൂപരാകേണ്ടതിന്, ദൈവം സകലവും നന്മയ്ക്കായി ഒന്നിച്ച് പ്രവർത്തിപ്പിക്കുന്നു എന്ന് പറയുന്ന റോമ. 8:28-29-ൽ ഇത് വ്യക്തമായി വെളിപ്പെടുത്തിയിരിക്കുന്നു. ആകയാൽ, കഷ്ടതയും ക്ലേശവും നമ്മുടെ രൂപാന്തരണത്തിനായുള്ളതാണ്.

ഗലാത്യർ 4:4-ൽ, ക്രിസ്തു ന്യായപ്രമാണത്തിൻ കീഴിൽ ജനിച്ചു എന്നും സ്ത്രീയിൽ നിന്നും ജനിച്ചു എന്നും പൗലൊസ് പറയുന്നു. ക്രിസ്തു വന്നത് ന്യായപ്രമാണം നിവർത്തിക്കുവാൻ വേണ്ടി മാത്രമല്ല, സ്ത്രീയുടെ സന്തതി സർപ്പത്തിന്റെ തലയെ തകർക്കും എന്ന വാഗ്ദത്തം നിവർത്തിക്കുവാൻ കൂടിയാണ്.

പരിശുദ്ധാത്മാവിന്റെ കൂട്ടായ്മ എന്നത് ദൈവം താൻതന്നെ നമ്മിലേക്ക് ഒഴുകിയെത്തുന്നതാണ്. ഒഴുക്ക് മറഞ്ഞിരിക്കുമ്പോൾ അത് സ്നേഹമാണ്. സ്നേഹം പുറത്തേക്ക് ഒഴുകുമ്പോൾ അത് കൃപയാണ്. കൃപ നമ്മിലേക്ക് ഒഴുകിയെത്തുമ്പോൾ അത് കൂട്ടായ്മയാണ്. ഈ കൂട്ടായ്മ ആത്മാവിനാൽ ഉള്ളതാണ്, ഈ ആത്മാവ് നമ്മുടെ ആത്മാവിലുണ്ട്. അതുകൊണ്ട്, നമ്മുടെ ആത്മാവിലേക്ക് തിരിയുവാൻ നാം പഠിക്കണം. നാം നമ്മുടെ ആത്മാവിലേക്ക് പ്രവേശിക്കുമ്പോൾ മാത്രമേ നമുക്ക് കൂട്ടായ്മയുടെ ആത്മാവിനെ ബന്ധപ്പെടുവാൻ കഴിയുകയുള്ളൂ; നാം കൂട്ടായ്മയുടെ ആത്മാവിലായിരിക്കുമ്പോൾ മാത്രമേ കർത്താവിന്റെ കൃപ ആസ്വദിക്കുവാൻ നമുക്ക് കഴിയുകയുള്ളൂ; നാം കർത്താവിന്റെ കൃപയിലായിരിക്കുമ്പോൾ മാത്രമേ ദൈവസ്നേഹം രുചിച്ചറിയുവാൻ നമുക്ക് കഴിയുകയുള്ളൂ.

[2 കൊരി 13:14 പ്രകാരം] കർത്താവിന്റെ കൃപ ആസ്വദിക്കുന്നതിനായി നാം പരിശുദ്ധാത്മാവിന്റെ കൂട്ടായ്മയിലായിരിക്കണം, കർത്താവിന്റെ കൃപ ആസ്വദിക്കുമ്പോൾ, നാം ദൈവസ്നേഹം രുചിച്ചറിയുന്നു. പരിശുദ്ധാത്മാവും കർത്താവായ യേശുവും ദൈവവും മൂന്ന് വേർപെട്ട ദൈവങ്ങളല്ല. അതുപോലെ, ഈ മൂന്നും - സ്നേഹം, കൃപ, കൂട്ടായ്മ - ഒന്നാണ്. ഇന്ന് നാം ക്രിസ്തുവിന്റെ കൃപ ആസ്വദിക്കുവാൻ ആഗ്രഹിക്കുന്നുവെങ്കിൽ, നാം പരിശുദ്ധാത്മാവിന്റെ കൂട്ടായ്മയിലായിരിക്കണം, ക്രിസ്തുവിന്റെ കൃപ ആസ്വദിക്കുമ്പോൾ, നാം സ്വാഭാവികമായി ദൈവസ്നേഹം രുചിച്ചറിയും.

ദൈവത്തിന്റെ രക്ഷയുടെ ലക്ഷ്യം ജീവനാണ്; അതുകൊണ്ട്, നീതീകരണം "ജീവന്റേത് ആകുന്നു." നീതീകരണം അതിൽത്തന്നെ അവസാനിക്കുന്നില്ല; അത് ജീവനുവേണ്ടിയുള്ളതാണ്. ഇപ്പോൾ ദൈവത്തിന് തന്റെ ജീവൻ നമുക്ക് പകർന്നു നൽകുവാൻ സാധിക്കേണ്ടതിന്, നീതീകരണം നമ്മുടെ ബാഹ്യമായ സ്ഥാനത്തിന് മാറ്റം വരുത്തുന്നു; ജീവൻ നമ്മുടെ ആന്തരികമായ സഹജ സ്വഭാവത്തിന് മാറ്റം വരുത്തുന്നു.

സ്നേഹം ജീവനുമായി ബന്ധപ്പെട്ടിരിക്കുന്നു, ജീവൻ വെളിച്ചവുമായും ബന്ധപ്പെട്ടിരിക്കുന്നു. സ്നേഹവും, ജീവനും, വെളിച്ചവും ഒരു ത്രിത്വമാണ്. നിങ്ങൾ എല്ലാറ്റിലും ക്രിസ്തുവിനെ ഒന്നാമനാക്കിയാൽ, നിങ്ങൾക്ക് സ്നേഹമുണ്ട്. നിങ്ങൾക്ക് ഈ സ്നേഹമുണ്ടെങ്കിൽ, നിങ്ങൾക്ക് ജീവനുണ്ടായിരിക്കുകയും, നിങ്ങൾ കർത്താവിനെ ആസ്വദിക്കുകയും ചെയ്യും. നിങ്ങൾക്ക് ജീവനുണ്ടെങ്കിൽ, ഈ ജീവൻ നിങ്ങൾക്ക് വെളിച്ചമായിത്തീരുന്നു.