നമ്മുടെ ജീവൻ കേവലം സ്വയത്തിനു വേണ്ടിയുള്ള ജീവനാണ്; അത് ദൈവത്തിനു വേണ്ടിയുള്ള ഒരു ജീവനല്ല. ദൈവത്തിനു വേണ്ടിയുള്ളവരായിരിക്കുവാൻ നാം നമ്മെത്തന്നെ എത്രമാത്രം പരിശീലിപ്പിച്ചാലും, ആത്യന്തികമായി നാം നമുക്ക് വേണ്ടിയുള്ളവർ മാത്രമായിരിക്കും. തത്ത്വത്തിൽ, ഇത് മനുഷ്യനെപ്പോലെ ആഹാരം കഴിക്കുവാൻ പരിശീലിപ്പിക്കപ്പെട്ട ഒരു കുരങ്ങിന് സമാനമാണ്. മനുഷ്യജീവനില്ലാതെ ഒരു കുരങ്ങിന് എങ്ങനെയാണ് മനുഷ്യനെപ്പോലെ പെരുമാറുവാൻ കഴിയുക? അതേപോലെതന്നെ, നമ്മുടെ ജീവൻ സ്വയത്തിനു വേണ്ടിയുള്ള ജീവനാണ്, അല്ലാതെ ദൈവത്തിനു വേണ്ടിയുള്ളതല്ല. എന്നാൽ ഹാലേലൂയ്യ! നമുക്ക് അനുഭവിക്കുവാൻ കഴിയുന്ന മറ്റൊരു ജീവനുണ്ട്. നമ്മുടെ ഹോമയാഗമായ ക്രിസ്തുവിനോട് നമുക്ക് ഒന്നായിത്തീരുവാൻ കഴിയും. അവൻ നമ്മിലുള്ള, പൂർണ്ണമായും ദൈവത്തിനു വേണ്ടിയുള്ള ജീവനാണ്. നമ്മുടെ ജീവൻ സ്വയ-കേന്ദ്രീകൃതമായിരിക്കാം, എന്നാൽ അവന്റെ ജീവൻ ദൈവ-കേന്ദ്രീകൃതമാണ്.

നമ്മൾ ദൈവത്തിന് ഭക്ഷണം നൽകുന്നുണ്ടെന്ന് നമുക്ക് എങ്ങനെ അറിയുവാൻ കഴിയും? നമ്മൾ സംതൃപ്തരാകുമ്പോഴാണ് അത് അറിയുന്നത്. നമ്മൾ സംതൃപ്തരാകുമ്പോൾ, തീർച്ചയായും നമ്മൾ അർപ്പിക്കുന്ന ഭക്ഷണത്താൽ ദൈവവും സംതൃപ്തനാണ്. ദൈവം സംതൃപ്തനല്ലെങ്കിൽ, നമുക്ക് ഒരിക്കലും സംതൃപ്തരാകുവാൻ കഴിയില്ല. ദൈവത്തിന് ഭക്ഷണം ആവശ്യമാണ്, ആ ഭക്ഷണം ഹോമയാഗം മാത്രമാണ്. നമ്മൾ പൂർണ്ണമായും ദൈവത്തിന് വേണ്ടിയുള്ളവരായിരിക്കണം. ക്രിസ്തുവിനെ നമ്മുടെ ഹോമയാഗമായി അർപ്പിക്കുമ്പോൾ, നമ്മൾ സംതൃപ്തരാണെന്ന ആഴമായ ബോധ്യം നമുക്കുണ്ടാകുന്നു; നമ്മുടെ സംതൃപ്തി ദൈവത്തിന്റെ സംതൃപ്തിയുടെ തെളിവാണ്.

സംഖ്യാപുസ്തകം 28:2-ൽ, ഹോമയാഗം ദൈവത്തിന്റെ ഭക്ഷണമാണെന്ന് പറയുന്നു. ദൈവം വിശന്നിരിക്കുന്നു; ദൈവത്തെ തൃപ്തിപ്പെടുത്തുവാൻ അവന് എന്തെങ്കിലും ആവശ്യമാണ്, ആ "എന്തെങ്കിലും" എന്നത് തന്റെ ജനത്താൽ അർപ്പിക്കപ്പെടുന്ന ഹോമയാഗമാണ്. നിങ്ങൾ ദിനംപ്രതി ദൈവത്തെ തൃപ്തിപ്പെടുത്തുന്നുണ്ടോ? എല്ലാ ദിവസവും രാവിലെയും വൈകുന്നേരവും ഹോമയാഗം അർപ്പിക്കുവാൻ ദൈവം ഇസ്രായേൽ മക്കളോട് കൽപ്പിച്ചു. ദൈവത്തിന് ഇത്തരത്തിലുള്ള ഭക്ഷണം ആവശ്യമാണ്. അവന് ഭക്ഷണം ആവശ്യമാണ്.

മുൻകാലങ്ങളിൽ, നമുക്ക് ഒന്നാമതായി ക്രിസ്തുവിനെ നമ്മുടെ അകൃത്യയാഗമായിട്ടാണ് ആവശ്യമെന്നായിരുന്നു എന്നാണ് ഞാൻ കരുതിയിരുന്നത്. എന്നാൽ ഇന്ന് എന്റെ ബോധ്യം മാറിയിരിക്കുന്നു. നമുക്ക് ക്രിസ്തുവിനെ ഒന്നാമതായി നമ്മുടെ ഹോമയാഗമായിട്ടാണ് ആവശ്യമായിരിക്കുന്നത്, കാരണം ദൈവവുമായുള്ള നമ്മുടെ ഒന്നാമത്തെ പ്രശ്നം അകൃത്യങ്ങളുടെ കാര്യമല്ല, മറിച്ച് ദൈവത്തിന് വേണ്ടിയുള്ളവരായിരിക്കാത്തതാണ്. നാം അകൃത്യം ചെയ്താലും ഇല്ലെങ്കിലും, നാം അപ്പോഴും ദൈവത്തിന് വേണ്ടിയുള്ളവരല്ല. നാം തെറ്റായി ഒന്നും ചെയ്തിട്ടുണ്ടാകില്ല, എങ്കിലും നാം ദൈവത്തിന് വേണ്ടിയുള്ളവരല്ല. എനിക്ക് ഈ വ്യക്തിയോടോ ആ വ്യക്തിയോടോ തെറ്റൊന്നുമില്ലായിരിക്കാം, എന്നാൽ ഞാൻ ദൈവത്തോട് തെറ്റുള്ളവനാണ് കാരണം ഞാൻ അപ്പോഴും പൂർണ്ണമായി അവനുവേണ്ടിയുള്ളവനല്ല. അതിനാൽ നമ്മുടെ ഒന്നാമത്തെ ആവശ്യം ഹോമയാഗമായ ക്രിസ്തുവാണ്.

നിങ്ങൾ യഥാർഥത്തിൽ ദൈവത്തിനു വേണ്ടി പൂർണ്ണമായി കരുതുന്നുണ്ടോ? നിങ്ങൾ എന്ത് ചെയ്താലും, എന്ത് പറഞ്ഞാലും, നിങ്ങൾ ആരായിരുന്നാലും അത് നൂറു ശതമാനവും ദൈവത്തിനുവേണ്ടിയാണെന്ന് നിങ്ങൾക്ക് പറയുവാൻ കഴിയുമോ? ഇല്ല, നമ്മളാർക്കും സത്യസന്ധമായി ഇത് പറയുവാൻ കഴിയില്ല. അപ്പോൾ നാം എന്ത് ചെയ്യണം? നാം ക്രിസ്തുവിനെ കൈക്കൊള്ളണം. നമ്മുടെ ഹോമയാഗമായി നമുക്ക് അവനെ ആവശ്യമുണ്ട്. ക്രിസ്തു പൂർണ്ണമായും ദൈവത്തിന് വേണ്ടിയുള്ളവനാണെന്ന് ഹോമയാഗം സൂചിപ്പിക്കുന്നു. നിങ്ങൾ നാല് സുവിശേഷങ്ങൾ വീണ്ടും വായിക്കുകയാണെങ്കിൽ, ഭൂമിയിൽ നൂറു ശതമാനവും ദൈവത്തിനുവേണ്ടി ജീവിച്ച ഒരു മനുഷ്യനെ നിങ്ങൾക്ക് കാണുവാൻ കഴിയും. അവൻ ആരായിരുന്നോ, അവൻ എന്ത് സംസാരിച്ചോ, അവൻ എന്ത് ചെയ്തുവോ അതെല്ലാം പൂർണ്ണമായും ദൈവത്തിനുവേണ്ടിയായിരുന്നു.

ലേവ്യപുസ്തകത്തിൽ, ക്രിസ്തു പലതരം യാഗങ്ങളാൽ മുൻകുറിക്കപ്പെട്ടിരിക്കുന്നത് നാം കാണുന്നു. നമ്മുടെ ഒന്നാമത്തെ സാഹചര്യം നാം ദൈവത്തിന് വേണ്ടിയുള്ളവരല്ല എന്നതാണ്. നിങ്ങൾ പൂർണ്ണമായും ദൈവത്തിന് വേണ്ടിയുള്ളവരാണോ? നമ്മുടെ സാഹചര്യത്തിന്റെ ഒന്നാമത്തെ വശം ഇതാണ്. നാം നല്ലവരായാലും മോശപ്പെട്ടവരായാലും, നാം തീർത്തും ദൈവത്തിന് വേണ്ടിയുള്ളവരല്ല. ഒരാൾ ബാങ്ക് കൊള്ളക്കാരനായിരിക്കാം, മറ്റൊരാൾ ഒരു മാന്യനായിരിക്കാം, എന്നാൽ രണ്ടുപേരും ദൈവത്തിന് വേണ്ടിയുള്ളവരല്ല. ഒരു മാസിക വായിക്കുന്നത് ദൈവത്തിന് വേണ്ടിയുള്ളതാകാത്തതുപോലെ തന്നെ നിങ്ങളുടെ ബൈബിൾ വായന ദൈവത്തിന് വേണ്ടിയുള്ളതാകണമെന്നില്ല.

കർത്താവിന് സ്തോത്രം, നമുക്ക് ക്രിസ്തുവുണ്ട്! ആരാണ് ക്രിസ്തു? ക്രിസ്തു ദൈവത്തിന്റെ നീതിയാണ്, ക്രിസ്തു ദൈവത്തിന്റെ വിശുദ്ധിയാണ്, ക്രിസ്തു ദൈവത്തിന്റെ തേജസ്സുമാണ്. നമുക്ക് ക്രിസ്തു ഉള്ളപ്പോൾ, ദൈവത്തിന്റെ ഈ മൂന്ന് സദ്ഗുണങ്ങളും നമുക്കുണ്ട്. അപ്പോൾ ദൈവത്തിന്റെ സകല നിബന്ധനകളും പാലിക്കുവാൻ നമുക്ക് കഴിയുന്നു. എന്നാൽ അത് നമ്മിൽ തന്നെയല്ല; അത് ക്രിസ്തുവിലും ക്രിസ്തുവിനാലുമാണ്. ഹാലേലൂയ്യ, ക്രിസ്തു നമ്മുടെ നീതിയാണ്! ക്രിസ്തു നമ്മുടെ വിശുദ്ധിയാണ്! ക്രിസ്തു നമ്മുടെ തേജസ്സാണ്! ദൈവം എന്ത് ആവശ്യപ്പെട്ടാലും അത് നമുക്കുണ്ട്, കാരണം നമുക്ക് ക്രിസ്തുവുണ്ട്. അതിനാൽ, ദൈവത്തെ കണ്ടുമുട്ടുവാൻ സമാധാനത്തോടും സന്തോഷത്തോടും കൂടി നമുക്ക് സമാഗമന കൂടാരത്തിലേക്ക് നടന്നുചെല്ലുവാൻ കഴിയും.

ഈ നീതിമാനും വിശുദ്ധനും തേജോമയനുമായ ദൈവത്തെ കണ്ടുമുട്ടുവാൻ നാം അതിവിശുദ്ധസ്ഥലത്ത് പ്രവേശിക്കുന്നുവെങ്കിൽ, അവന്റെ സകല നിബന്ധനകളും നാം പാലിക്കേണ്ടതുണ്ട്. നിങ്ങൾക്ക് അത് സാധിക്കുമെന്ന് നിങ്ങൾ കരുതുന്നുണ്ടോ? നിങ്ങൾക്ക് നീതിയും വിശുദ്ധിയും തേജസ്സും ഉണ്ടോ? നമുക്ക് ക്രിസ്തുവിനെ കൂടാരമെന്ന നിലയിൽ മാത്രമല്ല, യാഗങ്ങളെന്ന നിലയിലും ആവശ്യമാണ്. ഹാലേലൂയ്യ, ക്രിസ്തു സകലവിധ യാഗങ്ങളുമാകുന്നു! ഈ എല്ലാ യാഗങ്ങളിലും, വെളുത്ത ചണത്തിന്റെയും സ്വർണ്ണത്തിന്റെയും കെരൂബുകളുടെയും നിബന്ധനകളെ ക്രിസ്തു പാലിക്കുന്നു. യാഗങ്ങൾ എന്ന നിലയിലുള്ള ക്രിസ്തു, ദിവ്യ നീതി, വിശുദ്ധി, തേജസ്സ് എന്നിവയുടെ എല്ലാ നിബന്ധനകളും പാലിക്കുവാൻ പ്രാപ്തനും യോഗ്യനും സജ്ജനുമാണ്.

സമാഗമനകൂടാരത്തിന്റെ മുകളിൽ മേൽത്തട്ടിൽ കെരൂബുകളുണ്ട്. മുൻകുറിശാസ്ത്രത്തിൽ കെരൂബുകൾ ദൈവത്തിന്റെ തേജസ്സിനെ സൂചിപ്പിക്കുന്നു. അങ്ങനെ, മറ്റൊരു നിബന്ധന കൂടിയുണ്ട്, ദൈവത്തിന്റെ തേജസ്സിൻ്റെ നിബന്ധന. നമുക്ക് ദൈവത്തെ കാണണമെന്നുണ്ടെങ്കിൽ, ഈ മൂന്ന് ദിവ്യ നിബന്ധനകൾ നാം പാലിക്കണം. ദിവ്യ നീതി, ദിവ്യ വിശുദ്ധി, ദിവ്യ തേജസ്സ് എന്നീ നിബന്ധനകളാണവ. ദൈവം ഇപ്പോൾ കൂടാരത്തിൽ ഭൂമിയിലുണ്ട്, എന്നാൽ അവൻ അശ്രദ്ധമായ രീതിയിലാണ് ഭൂമിയിലുള്ളതെന്ന് വിചാരിക്കരുത്. അവൻ തന്റെ നീതിയാലും വിശുദ്ധിയാലും ചുറ്റപ്പെട്ടിരിക്കുന്നു, കൂടാതെ അവൻ തന്റെ തേജസ്സിനാൽ മറയ്ക്കപ്പെടുകയും ചെയ്തിരിക്കുന്നു.

സമാഗമനകൂടാരത്തിനുള്ളിൽ, ഏകദേശം എല്ലാ വശങ്ങളിലും സ്വർണ്ണമുണ്ട്. നാലു വശങ്ങളിലുമുള്ള എല്ലാ പലകകളും സ്വർണ്ണംകൊണ്ട് പൊതിഞ്ഞവയാണ്. അതൊരു സ്വർണ്ണമയമായ ഇടമാണ്. സ്വർണ്ണം ദൈവത്തിന്റെ വിശുദ്ധമായ സ്വഭാവത്തെ സൂചിപ്പിക്കുന്നു. ദൈവത്തിന്റെ നീതി ഒരു നിബന്ധനയാണെന്നു മാത്രമല്ല, അവന്റെ വിശുദ്ധിയും ഒരു നിബന്ധനയാണ്. നമുക്ക് ദൈവത്തെ കാണണമെന്നുണ്ടെങ്കിൽ, അവന്റെ നീതിയുടെ നിബന്ധനയെന്നപോലെ അവന്റെ വിശുദ്ധിയുടെ നിബന്ധനയും നാം പാലിക്കണം.