ക്രൂശിന്റെ അനുഭവത്തിന് മൂന്ന് വശങ്ങളുണ്ട്:
1) ക്രിസ്തു നിവർത്തിച്ച വസ്തുത (റോമ. 6:6; ഗലാ. 2:20);
2) നിവർത്തിച്ച വസ്തുതയെ നാം പ്രയോഗിക്കുന്നത് (ഗലാ. 5:24);
3) നാം നാൾതോറും ക്രൂശ് വഹിക്കുന്നതിലൂടെ, നാം പ്രയോഗിച്ചതിനെ അനുഭവമാക്കുന്നത് (മത്താ. 16:24; ലൂക്കൊ. 9:23).

പഴയനിയമത്തിൽ, പാപം ചെയ്ത ഒരു യിസ്രായേല്യൻ ന്യായപ്രമാണത്താൽ കുറ്റം വിധിക്കപ്പെടുകയും, പാപക്ഷമ ലഭിക്കേണ്ടതിന് ഒരു അകൃത്യയാഗം അർപ്പിക്കുകയും ചെയ്യണമായിരുന്നു. പാപം ചെയ്ത യിസ്രായേല്യനെ, അകൃത്യയാഗത്താൽ മുൻകുറിക്കപ്പെട്ട, അവന്റെ വീണ്ടെടുപ്പുകാരനായ ക്രിസ്തുവിങ്കലേക്ക് കൊണ്ടുവരുവാൻ ന്യായപ്രമാണം ഒരു പരിപാലകനായി പ്രവർത്തിച്ചു. ന്യായപ്രമാണമില്ലായിരുന്നെങ്കിൽ, യിസ്രായേൽ മക്കളിൽ അധികമാരും അകൃത്യയാഗവുമായി യാഗപീഠത്തിലേക്ക് വരുമായിരുന്നില്ല. ന്യായപ്രമാണം അവരെ തുറന്നുകാട്ടുകയും കുറ്റം വിധിക്കുകയും ചെയ്തതിനാൽ, ആവശ്യമായ യാഗവുമായി യാഗപീഠത്തിലേക്ക് വരേണ്ടതിന്റെ ആവശ്യകത അവർ തിരിച്ചറിഞ്ഞു.

ക്രിസ്തു ദൈവപുത്രനും അബ്രാഹാമിന്റെ പുത്രനുമാണ്. ഒരു വശത്ത്, നാം ഇപ്പോൾ ദൈവപുത്രനായ ക്രിസ്തുവിലായതിനാൽ, നാം ദൈവപുത്രന്മാരാണ്; മറുവശത്ത്, നാം ഇപ്പോൾ അബ്രാഹാമിന്റെ പുത്രനായ ക്രിസ്തുവിലായതിനാൽ, നാം അബ്രാഹാമിന്റെ പുത്രന്മാരാണ്.

റോമർ 8 റോമർ 7-മായി കടുത്ത വിരുദ്ധതയിലാണ്. റോമർ 7-ൽ ബന്ധനമുണ്ട്; റോമർ 8-ൽ സ്വാതന്ത്ര്യമുണ്ട്. റോമർ 7-ൽ ന്യായപ്രമാണമുണ്ട്; റോമർ 8-ൽ ആത്മാവുണ്ട്. റോമർ 7-ൽ നമ്മുടെ ജഡമുണ്ട്; റോമർ 8-ൽ നമ്മുടെ ആത്മാവുണ്ട്. റോമർ 7-ൽ ഉൾവസിക്കുന്ന പാപമുണ്ട്. റോമർ 8 അനുസരിച്ച്, നമ്മിൽ വസിക്കുന്നത് എന്താണ്? അത് ക്രിസ്തുവാണ്, ഉൾവസിക്കുന്ന ക്രിസ്തു. റോമർ 7-ൽ സകല അരിഷ്ടതയുടെയും പ്രധാന ഘടകമായി ഉൾവസിക്കുന്ന പാപം നമുക്കുണ്ട്. റോമർ 8-ൽ സകല അനുഗ്രഹീതാവസ്ഥയുടെയും ഘടകമായി ഉൾവസിക്കുന്ന ക്രിസ്തു നമുക്കുണ്ട്.

ജീവനിലുള്ള നമ്മുടെ വളർച്ചയുടെ തൊണ്ണൂറു ശതമാനത്തിലധികവും നമ്മുടെ സഹജഗുണത്തോടും, സ്വഭാവത്തോടും, പ്രത്യേകതയോടും ഇടപെടുന്നതിനെ ആശ്രയിച്ചിരിക്കുന്നു.

ദൈവം അബ്രാഹാമിന് നൽകിയ അനുഗ്രഹം നമ്മിലേക്ക് വരുമ്പോൾ, അത് കൃപയാണ്; ഈ കൃപ അബ്രാഹാമിന്റെ സന്തതിയാണ്. ക്രിസ്തു ഇപ്പോൾ ആത്മാവായതുകൊണ്ട് (2 കൊരി 3:17), അവൻ വാഗ്ദത്തങ്ങളെ അവകാശമാക്കുന്ന സന്തതി മാത്രമല്ല, നാം അവകാശമാക്കേണ്ട വാഗ്ദത്തങ്ങളുടെ അനുഗ്രഹം കൂടിയാണ്.

വൈദ്യുതിയുമായി ബന്ധിപ്പിക്കാത്ത ഒരു ഇലക്ട്രിക് ഇസ്തിരിപ്പെട്ടിക്ക് ചൂടാകുവാൻ ഒരു വഴിയുമില്ല. എന്നാൽ ഒരിക്കൽ അത് ബന്ധിപ്പിച്ചാൽ, അത് ചൂടാകും. അതുകൊണ്ട്, നാം ബലഹീനരും എഴുന്നേൽക്കുവാൻ കഴിവില്ലാത്തവരുമാണെന്നോ അല്ലെങ്കിൽ നമുക്ക് ജയിക്കുവാനും ഒരു വിശുദ്ധ ജീവിതം നയിക്കുവാനും കഴിയില്ലെന്നോ നാം പറയരുത്. നാം ദൈവത്തിങ്കലേക്ക് വരികയും, അവനുമായി ബന്ധപ്പെടുകയും, അവനോട് അടുത്തുചെല്ലുകയും, അവനെ നോക്കുകയും, അവനെ സ്തുതിക്കുകയും, അവന് നന്ദി പറയുകയും, അവന്റെ സാന്നിധ്യത്തിൽ തങ്ങുവാൻ സമയമെടുക്കുകയും ചെയ്താൽ, അവൻ നമ്മുടെ ആത്മാവിനെ സ്പർശിക്കും. ബലം, എഴുന്നേൽക്കുവാനുള്ള ശക്തി, ജയം എന്നിവ ദൈവത്തിലാണ്. ഒരു അനുഷ്ഠാനത്തിനോ ദൂതിനോ നമ്മെ ജയിക്കുവാൻ പ്രാപ്തരാക്കുവാൻ കഴിയില്ല. ജയം ദൈവമാണ്, ജയിക്കുന്ന ശക്തിയും ദൈവമാണ്. നാം ദിനംപ്രതി ദൈവവുമായി ബന്ധപ്പെടുമ്പോൾ, നാം ഉള്ളിൽ "വൈദ്യുതീകരിക്കപ്പെടുകയും," "ചൂടുള്ളവരായിത്തീരുകയും," അവന്റെ സമ്പത്ത് കൈവശമാക്കുകയും ചെയ്യുന്നു.

ഒരു ഇലക്ട്രിക് സോക്കറ്റിൽ ഘടിപ്പിച്ചിരിക്കുന്ന ഒരു ഇസ്തിരിപ്പെട്ടിക്ക് ചൂടുപിടിക്കുവാൻ കുറഞ്ഞത് രണ്ടോ മൂന്നോ മിനിറ്റും, നന്നായി ചൂടാകുവാൻ കൂടുതൽ സമയവും ആവശ്യമാണ്. ഒരു മിനിറ്റ് നേരത്തേക്ക് അതിന്റെ വൈദ്യുതി ബന്ധം വിച്ഛേദിച്ചാൽ, ഇസ്തിരിപ്പെട്ടിക്ക് പിന്നീട് ചൂടുണ്ടാവുകയില്ല. വൈദ്യുതി ബന്ധം വിച്ഛേദിക്കപ്പെട്ട ഒരു ഇസ്തിരിപ്പെട്ടിക്ക് സംസാരിക്കുവാൻ കഴിഞ്ഞിരുന്നെങ്കിൽ, അത് ബലഹീനവും ഉപയോഗശൂന്യവുമാണെന്ന് പരാതിപ്പെടുമായിരുന്നു. വൈദ്യുതി ബന്ധം വിച്ഛേദിക്കപ്പെട്ട ഒരു ഇസ്തിരിപ്പെട്ടിക്ക് ചൂടില്ല, കാരണം അത് വൈദ്യുതിയിൽ നിന്ന് വിച്ഛേദിക്കപ്പെട്ടിരിക്കുന്നു; അത് വൈദ്യുതിയുമായി നിരന്തരമായ സമ്പർക്കത്തിലല്ല. അതുപോലെ, ഒരാൾ പ്രാർത്ഥിക്കുന്നില്ലെങ്കിൽ, അവൻ ദൈവവുമായി ബന്ധപ്പെടുന്നില്ല, അതിനാൽ അവന് ശക്തനാകുവാൻ കഴിയുകയുമില്ല.

വിശുദ്ധന്മാർ പലപ്പോഴും പറയാറുണ്ട്, "ഞാൻ വളരെ ബലഹീനനാണ്!" നാം ബലഹീനരാണെന്നതിൽ ആശ്ചര്യപ്പെടരുത്, കാരണം നമുക്ക് ഒരിക്കലും ശക്തരാകുവാൻ കഴിയില്ല. നമ്മെ ശക്തരാക്കുവാൻ, ദൈവം നമുക്ക് ശക്തി നൽകുകയില്ല, എന്നാൽ അവൻ അവനെത്തന്നെ നമുക്ക് നൽകും. വൈദ്യുത ശക്തി ഒരു ഫാനിനെ കൂടുതൽ ശക്തമാക്കുകയില്ല; മറിച്ച്, ശക്തിയുണ്ടാകുവാൻ ഫാൻ വൈദ്യുതിയുമായി സമ്പർക്കത്തിലായിരിക്കണം. എപ്പോഴൊക്കെ ഫാൻ വൈദ്യുതിയിൽ നിന്ന് വിച്ഛേദിക്കപ്പെടുന്നുവോ, അപ്പോഴൊക്കെ അത് ശക്തിയില്ലാത്തതായിത്തീരുന്നു. ഫാനിന്റെ ശക്തി വൈദ്യുതിയിലാണ്. അതുകൊണ്ട്, കർത്താവിനെ പിന്തുടരുന്നതിലൂടെ, നാം ശക്തരാകുന്നതുവരെ നമുക്ക് വളരുവാൻ കഴിയുമെന്ന് ചിന്തിക്കുന്നത് കൃത്യമല്ലാത്തതാണ്. നമ്മുടെ ശക്തി ദൈവത്തെ ആശ്രയിച്ചിരിക്കുന്നു; അവനുമായി ബന്ധപ്പെടുന്നതിലൂടെ മാത്രമേ നമുക്ക് ശക്തരാകുവാൻ കഴിയൂ.

ദൈവം തന്റെ ജീവൻ നമുക്ക് നൽകിയിരിക്കുന്നു എന്ന് പുതിയനിയമം പറയുന്നില്ല; മറിച്ച്, "നമ്മുടെ ജീവനായ ക്രിസ്തു" എന്നാണ് അത് പറയുന്നത് (കൊലൊ 3:4). ദൈവത്തെ കൂടാതെ നമുക്ക് ഒന്നുമില്ല. അവൻ തന്റെ കുറച്ച് വെളിച്ചം, രക്ഷ, ശക്തി, അല്ലെങ്കിൽ കൃപ എന്നിങ്ങനെയല്ല നൽകുന്നത്; മറിച്ച്, അവൻ നൽകുന്നത് അവനെത്തന്നെയാണ്. ഉദാഹരണത്തിന്, വൈദ്യുതി ഒരു വിളക്കിലെ വൈദ്യുത വെളിച്ചവും, ഒരു ഇസ്തിരിപ്പെട്ടിയിലെ വൈദ്യുത താപവും, ഒരു ഫാനിലെ വൈദ്യുത ശക്തിയുമാണ്. വൈദ്യുതി ഒരു ആവശ്യം നിറവേറ്റുവാനുള്ള വെളിച്ചവും, മറ്റൊരു ആവശ്യം നിറവേറ്റുവാനുള്ള താപവും, വേറൊരു ആവശ്യം നിറവേറ്റുവാനുള്ള ശക്തിയുമാണ്. അതുപോലെ, വെളിച്ചം ദൈവമാണ്, രക്ഷ ദൈവമാണ്, ശക്തി ദൈവമാണ്, കൃപ ദൈവമാണ്. നമുക്കുള്ള എല്ലാ ആത്മിക ആവശ്യവും ദൈവം തന്നെയാണ്. ദൈവം അവനെയല്ലാതെ മറ്റൊന്നും നമുക്ക് നൽകിയിട്ടില്ല.