ജനത്തിന് ഏറിയാൽ, ക്രിസ്തു പ്രവാചകന്മാരിൽ വച്ച് ഏറ്റവും വലിയവൻ ആണെന്ന് മാത്രമേ തിരിച്ചറിയുവാൻ കഴിയുകയുള്ളൂ. സ്വർഗീയ വെളിപാടില്ലാതെ, ആർക്കും അവൻ ക്രിസ്തുവാണെന്നും ജീവനുള്ള ദൈവത്തിൻ്റെ പുത്രനാണെന്നും അറിയുവാൻ കഴിയില്ല. താൻ ആരാകുന്നു എന്നാണ് അവർ ചിന്തിക്കുന്നത് എന്ന് കർത്താവ് തൻ്റെ ശിഷ്യന്മാരോട് ചോദിച്ചശേഷം, ശിമോൻ പത്രോസ് മറുപടി പറഞ്ഞു: "നീ ജീവനുള്ള ദൈവത്തിൻ്റെ പുത്രനായ ക്രിസ്തു ആകുന്നു." ദൈവത്തിൻ്റെ അഭിഷിക്തനെന്ന നിലയിൽ ക്രിസ്തു എന്നത് കർത്താവിൻ്റെ നിയോഗത്തെക്കുറിച്ച് സൂചിപ്പിക്കുന്നു; എന്നാൽ, ത്രിയേക ദൈവത്തിലെ രണ്ടാമനെന്ന നിലയിൽ, ജീവനുള്ള ദൈവത്തിൻ്റെ പുത്രൻ എന്നത്, അവനാകുന്ന വ്യക്തിയെയാണ് സൂചിപ്പിക്കുന്നത്. തൻ്റെ ക്രൂശു മരണത്തിലൂടെയും, പുനരുത്ഥാനത്തിലൂടെയും ആരോഹണത്തിലൂടെയും രണ്ടാം വരവിലൂടെയും, ദൈവത്തിൻ്റെ നിത്യനിർണയം നിർവഹിക്കുക എന്നതാണ് അവൻ്റെ നിയോഗം; എന്നാൽ അവനാകുന്ന വ്യക്തി, ത്രിയേക ദൈവത്തിൻ്റെ പൂർണ്ണ ആവിഷ്കാരത്തിനായി പിതാവിൻ്റെ ദേഹരൂപമായിരിക്കുകയും ആത്മാവിൽ പരിണമിക്കുകയും ചെയ്യുന്നു. ജീവനുള്ള ദൈവം നിർജ്ജീവമായ മതത്തിന് എതിരാണ്. കർത്താവ്, ജീവനുള്ള ദൈവത്തിൻ്റെ ദേഹരൂപമാണ്, അവന് നിർജ്ജീവമായ മതവുമായി യാതൊരു ബന്ധവുമില്ല. ജഡരക്തം എന്നത് ജഡവും രക്തവും കൊണ്ട് നിർമ്മിക്കപ്പെട്ട മനുഷ്യനെയാണ് സൂചിപ്പിക്കുന്നത്. പിതാവ് മാത്രമേ പുത്രനെ അറിയുന്നുള്ളൂ (11:27); അതുകൊണ്ട്, പുത്രനെ നമുക്ക് വെളിപ്പെടുത്തിത്തരുവാൻ അവനു മാത്രമേ സാധിക്കുകയുള്ളൂ.