നാം ഇത് നോക്കിക്കാണുക മാത്രമല്ല, നാം തന്നെ ഇത് അനുഭവമാക്കുന്ന ഒരു ദിവസം വരുന്നു. നമുക്ക് ഇപ്പോൾ ദിവ്യ സ്വഭാവത്തോടുകൂടിയ ദിവ്യ ജീവൻ നമ്മുടെ ഉള്ളിൽ ഉണ്ട്. എന്നിരുന്നാലും, നമുക്ക് ഇപ്പോഴും നമ്മുടെ പ്രാകൃത മനുഷ്യത്വമുണ്ട്. നാം എത്രയധികം ആത്മികരും വിശുദ്ധരും ആയിരുന്നാലും, നമ്മുടെ മനുഷ്യത്വം ഇപ്പോഴും പ്രാകൃതമാണ്. അത് ഇതുവരെ ദിവ്യ തേജസ്സിനാൽ സാന്ദ്രീകരിക്കപ്പെട്ടിട്ടില്ല. എന്നാൽ രാജ്യത്തിന്റെ പ്രത്യക്ഷതയുടെ സമയത്ത്, നമ്മുടെ ഉള്ളിലുള്ള തേജോമയമായ ദിവ്യത്വം നമ്മുടെ മനുഷ്യത്വത്തെ തേജസ്കരിക്കും. തേജസ്കരിക്കപ്പെടുക എന്നതിനർത്ഥം ദൈവത്തിന്റെ തേജസ്സിനാൽ സാന്ദ്രീകരിക്കപ്പെടുക എന്നാണ്. അത് പുറത്തുനിന്നല്ല, ഉള്ളിൽ നിന്ന് കായാന്തരപ്പെടുക എന്നതാണ്. ഒരു ദിവസം നാം അവിശ്വാസികൾക്ക് ഒരു വലിയ ആശ്ചര്യം ആകും. "ആ നാളിൽ തന്റെ വിശുദ്ധന്മാരിൽ അവൻ മഹത്വപ്പെടുവാനും വിശ്വസിച്ച എല്ലാവരിലും ആശ്ചര്യപ്പെടുവാനും അവൻ വരുമ്പോൾ" എന്ന് 2 തെസ്സലൊനീക്യർ 1:9 പറയുന്നു. നമ്മുടെ തേജസ്കരണം കണ്ട് അവിശ്വാസികൾ ഞെട്ടിപ്പോകും. നമ്മുടെ മനുഷ്യത്വത്തിൽ നാം അവിശ്വാസികളെപ്പോലെ ആയിരിക്കുന്നതിനാൽ, അവർക്ക് നമ്മളും അവരും തമ്മിൽ വ്യത്യസ്തം ഒന്നും കാണുവാൻ കഴിയുന്നില്ല. എന്നാൽ നമ്മുടെ മനുഷ്യത്വം ദിവ്യത്വത്താൽ സാന്ദ്രീകരിക്കപ്പെടുകയും, നാം ഒരു തേജോമയമായ ജനമായിത്തീരുകയും ചെയ്യുന്ന ഒരു തേജോമയമായ വ്യത്യാസം അവർ കാണുവാനുള്ള ഒരു ദിവസം വരുന്നു. നാം വെറുതെ ആത്മികരും, വിശുദ്ധരും, നിർമലരും, ശുദ്ധരുമായിരിക്കുക മാത്രമല്ല ചെയ്യുക. നാം തേജോമയരായിരിക്കും. ഇതാണ് രാജ്യത്തിന്റെ വരവ്. ഇത് സംഭവിക്കുവാൻ നാം കാത്തിരിക്കുന്നു.