ചിലർ ദോഷകരമായി ചോദിക്കുന്നില്ല, എങ്കിലും ദൈവം അവരുടെ പ്രാർത്ഥനകൾക്ക് ഉത്തരം നൽകുന്നില്ല. ഇതിന് കാരണം അവർക്കും ദൈവത്തിനും ഇടയിൽ അടിസ്ഥാനപരമായ ഒരു തടസ്സമുണ്ട്一പാപം. "ഹൃദയത്തിൽ അകൃത്യം കരുതുക" എന്നാൽ എന്താണ് അർത്ഥമാക്കുന്നത്? അതിനർത്ഥം ഒരു പാപത്തെ ഉപേക്ഷിക്കുവാൻ മനസ്സ് വരാതെ ഒരുവൻ അതിനെ തന്റെ ഹൃദയത്തിൽ സൂക്ഷിക്കുക എന്നതാണ്. അത്തരമൊരു വ്യക്തി ഒരു കാര്യം പാപമാണെന്ന് അറിയുന്നുവെങ്കിലും, അവൻ അതിനെ തുടർന്നും പരിലാളിക്കുന്നു. അത് പെരുമാറ്റത്തിലോ ദൃഷ്ടഭാവത്തിലോ ഉള്ള ഒരു ബലഹീനത മാത്രമല്ല, മറിച്ച് ഹൃദയത്തിലെ ഒരു ആസക്തി കൂടിയാണ്. റോമർ 7-ൽ പറയുന്ന വ്യക്തിയിൽ നിന്നും ഇത് വ്യത്യസ്തമാണ്. റോമർ 7-ലെ വ്യക്തി പരാജയപ്പെട്ടുവെങ്കിലും, താൻ ചെയ്യുന്നതിനെ അവൻ വെറുക്കുന്നു. എന്നാൽ ഇവിടെയുള്ള വ്യക്തി തന്റെ ഹൃദയത്തിൽ അകൃത്യം കരുതുന്നു. ഒരു പാപം ഉള്ളിടത്തോളം കാലം, ദൈവം നമ്മുടെ പ്രാർത്ഥനയ്ക്ക് ഉത്തരം നൽകുന്നതിനെ അത് തടയും. നമുക്ക് പ്രിയപ്പെട്ട ഏതെങ്കിലും ഒരു പാപം നാം നമ്മുടെ ഹൃദയത്തിൽ സൂക്ഷിക്കരുത്. നാം എല്ലാ പാപങ്ങളെയും പാപങ്ങളായി സമ്മതിക്കുകയും അവയെ രക്തത്തിൻ കീഴിൽ വയ്ക്കുകയും വേണം. കർത്താവിന് നമ്മുടെ ബലഹീനതയിൽ സഹതപിക്കുവാൻ കഴിയും, എന്നാൽ നമ്മുടെ ഹൃദയത്തിൽ അകൃത്യം കരുതുവാൻ അവൻ നമ്മെ അനുവദിക്കില്ല. നിങ്ങൾ നിങ്ങളുടെ പാപങ്ങൾ ഏറ്റുപറയണം. നിങ്ങൾ കർത്താവിനോട് ഇങ്ങനെ പറയണം, "ഞാൻ എന്റെ ഹൃദയത്തിൽ ഒരു പാപം കരുതിയിരുന്നു. എനിക്കത് ഉപേക്ഷിക്കുവാൻ കഴിയുന്നില്ല. എന്നോട് ക്ഷമിക്കണമെന്ന് ഞാൻ നിന്നോട് അപേക്ഷിക്കുന്നു. എനിക്ക് ഈ പാപം ഉപേക്ഷിക്കണം. ദയവായി ഈ പാപത്തിൽ നിന്ന് എന്നെ വിടുവിക്കണമേ. ഈ പാപം എന്നിൽ അവശേഷിക്കുവാൻ അനുവദിക്കരുതേ. എനിക്ക് അത് വേണ്ട. ഞാൻ അതിനെ നിരസിക്കുവാൻ ആഗ്രഹിക്കുന്നു." നിങ്ങൾ ഇപ്രകാരം കർത്താവിനോട് ഏറ്റുപറയുന്നുവെങ്കിൽ, അവൻ ക്ഷമിക്കും; നിങ്ങൾക്ക് പാപക്ഷമ ലഭിക്കുകയും ചെയ്യും. അപ്പോൾ, നിങ്ങളുടെ പ്രാർത്ഥന കേൾക്കപ്പെടും.