ബൈബിൾ വായനയെക്കുറിച്ച് [മുമ്പത്തെ ഇ-മന്നകളിൽ] നാം സംസാരിച്ചിട്ടുണ്ട്. തീർച്ചയായും, നാം ബൈബിൾ വായിക്കുമ്പോൾ ദൈവം നമുക്ക് വ്യക്തിപരമായ കൃപ നൽകും. എന്നിരുന്നാലും, വചനത്തിന്റെ ചില ഭാഗങ്ങൾ ഒരു വ്യക്തിക്ക് മാത്രമായി തുറക്കപ്പെട്ടു കിട്ടുകയില്ല. നാം യോഗം കൂടുമ്പോൾ, നാം ഒരുമിച്ച് കൂടിവരുമ്പോൾ ദൈവം വെളിച്ചം നൽകുന്നു. അങ്ങനെയുള്ള ഒരു യോഗത്തിൽ, വചനത്തിന്റെ ഒരു പ്രത്യേക ഭാഗം തുറന്നു നൽകുവാൻ ചില സഹോദരന്മാർ നയിക്കപ്പെട്ടേക്കാം. വചനത്തിന്റെ ആ പ്രത്യേക ഭാഗത്തെക്കുറിച്ച് ചിലപ്പോൾ സംസാരമൊന്നും ഉണ്ടായില്ലെന്നു വരാം, എങ്കിൽ പോലും, എല്ലാവരും ഒന്നിച്ചുകൂടിയിരിക്കുന്നു എന്ന വസ്തുത തന്റെ വെളിച്ചം ചൊരിയുവാൻ ദൈവത്തിന് അവസരം നൽകുന്നു. തങ്ങൾ വ്യക്തിപരമായി പഠിക്കുന്നതിനേക്കാൾ അധികം ദൈവവചനം യോഗത്തിൽ വെച്ച് മനസ്സിലാക്കുവാൻ കഴിയുന്നു എന്ന് അനേകം സഹോദരീസഹോദരന്മാർക്കും സാക്ഷ്യപ്പെടുത്തുവാൻ കഴിയും. യോഗത്തിൽ പലപ്പോഴും, വചനത്തിന്റെ ഒരു ഭാഗം വചനത്തിന്റെ മറ്റൊരു ഭാഗത്തിലൂടെ ദൈവം തുറന്നുതരുന്നു. ഒരു വ്യക്തി ഒരു ഭാഗത്തെക്കുറിച്ച് സംസാരിക്കുമ്പോൾ, മറ്റൊരു ഭാഗത്തിന്മേൽ വെളിച്ചം പ്രകാശിക്കുന്നു. ഈ രീതിയിൽ കൂടുതൽ വെളിച്ചം മറ നീക്കപ്പെടുകയും, നമുക്ക് ഒരു സംഘാതമായ രീതിയിൽ കൃപ ലഭിക്കുകയും ചെയ്യുന്നു. നാം മറ്റുള്ളവരുമായി കൂടിവരുന്നില്ല എങ്കിൽ, നമുക്ക് പരമാവധി ലഭിക്കുന്നത് വ്യക്തിപരമായ കൃപ മാത്രമാണ്; സംഘാതമായ കൃപയുടെ വലിയൊരു ഭാഗം നമുക്ക് നഷ്ടപ്പെടും. യോഗത്തിൽ മാത്രമേ ദൈവം നമുക്ക് സംഘാതമായ കൃപ നൽകുകയുള്ളൂ. നാം മറ്റുള്ളവരോടുകൂടെ ഒന്നിച്ചുകൂടുന്നില്ലെങ്കിൽ, നമുക്ക് ഈ കൃപ ലഭിക്കുകയില്ല. അതുകൊണ്ടാണ് നമ്മുടെ കൂടിവരവുകളെ ഉപേക്ഷിക്കരുത് എന്ന് ബൈബിൾ നമ്മോട് അനുശാസിക്കുന്നത്.