ഈ ശക്തി [കൊലൊ. 1:11] ക്രിസ്തുവിന്റെ പുനരുത്ഥാനത്തിന്റെ ശക്തി (ഫിലി. 3:10) മാത്രമല്ല, ക്രിസ്തു താൻതന്നെയാണ്. "അവന്റെ തേജസ്സിന്റെ പ്രഭാവത്തിനൊത്തവണ്ണം" നമ്മെ നിരന്തരം ബലപ്പെടുത്തുന്ന ഒരു ഡൈനാമോ (dynamo) ആയി ക്രിസ്തു നമുക്കുള്ളിലുണ്ട്. ഇത് ദൈവത്തിന്റെ തേജസ്സിനെ ആവിഷ്കരിക്കുന്ന പ്രഭാവമാണ്; ഇത് തന്റെ പ്രഭാവത്തിൽ ദൈവത്തെ മഹത്വീകരിക്കുന്നു. ഈ പ്രഭാവത്താലാണ് നാം ബലപ്പെടുന്നത്. ക്രിസ്തുവിനാൽ നാം "സന്തോഷത്തോടെ സകല സഹിഷ്ണുതയിങ്കലേക്കും ദീർഘക്ഷമയിങ്കലേക്കും" ബലപ്പെടുന്നു. ഈ ആശ്ചര്യകരമായ ശക്തിയാൽ, കഷ്ടപ്പാടുകളിലും നമുക്ക് സന്തോഷമുള്ളവരായിരിക്കുവാൻ കഴിയും. ഈ ശക്തി മുഖാന്തരം നമുക്ക് എന്ത് സംഭവിച്ചാലും അത് സന്തോഷത്തോടെ നേരിടുവാൻ നമുക്ക് സാധിക്കും. പുനരുത്ഥാനം ചെയ്ത ക്രിസ്തു നമുക്കുള്ളിൽ ശക്തിയായി ഉള്ളതിനാൽ നമുക്ക് സന്തോഷിക്കുവാൻ കാരണമുണ്ട്. ക്ലേശങ്ങളുടെ സമയത്ത് നാം സന്തോഷമുള്ളവരാണെങ്കിൽ, നാം ഇത്ര പെട്ടെന്ന് പ്രായമാകുകയില്ല. അതിനുപകരം, നാം നമ്മുടെ പ്രായത്തേക്കാൾ ചെറുപ്പമായി കാണപ്പെടും. കൊലൊസ്സ്യർക്ക് ഏറ്റവും നല്ല ഭർത്താക്കന്മാരെയോ ഭാര്യമാരെയോ, ഏറ്റവും നല്ല വീടുകളെയോ, ഏറ്റവും നല്ല ജോലികളെയോ ലഭിക്കണമെന്ന് അപ്പൊസ്തലനായ പൗലൊസ് പ്രാർത്ഥിച്ചില്ല. കൂടാതെ, കൊലൊസ്സ്യർ കഷ്ടപ്പാടുകളിൽ നിന്ന് കാക്കപ്പെടണമെന്നും അവൻ പ്രാർത്ഥിച്ചില്ല. നേരെമറിച്ച്, അവർ സന്തോഷത്തോടെ സകല സഹിഷ്ണുതയിങ്കലേക്കും ദീർഘക്ഷമയിങ്കലേക്കും ശക്തിയോടെ ബലപ്പെടണമെന്നാണ് അവൻ പ്രാർത്ഥിച്ചത്; അതായത്, സന്തോഷത്തോടെ ദീർഘകാലം കഷ്ടം സഹിക്കുവാനുള്ള പ്രാപ്തി അവർക്കുണ്ടാകണമെന്ന് അവൻ പ്രാർത്ഥിച്ചു. സന്തോഷത്തിൽ ദീർഘമായി കഷ്ടം സഹിക്കുക എന്നത് ക്രിസ്തുവിൽ കഷ്ടത സഹിക്കുക എന്നതാണ്. കഷ്ടപ്പാടുകൾ വാസ്തവത്തിൽ ക്രിസ്തുവിന്റെ വർദ്ധിതമായ ആസ്വാദനം ഉണ്ടാകുവാൻ നമ്മെ സഹായിച്ചേക്കാം. ക്രിസ്തുവാണ് സന്തോഷവും സഹിഷ്ണുതയും ദീർഘക്ഷമയും. അതിനാൽ, പൗലൊസിന്റെ പ്രാർത്ഥന പൂർണ്ണമായും ക്രിസ്തുവിന്റെ അനുഭവത്തിനായുള്ള പ്രാർത്ഥനയാണ്.