വാക്യം 14-ൽ പൗലൊസ് തുടരുന്നു, "അവനിൽ നമുക്കു പാപങ്ങളുടെ ക്ഷമയെന്ന വീണ്ടെടുപ്പുണ്ട്;" വാക്യം 13-ലെ വിടുതൽ സാത്താന്റെ ദുഷ്ടശക്തിയെ നശിപ്പിച്ചുകൊണ്ട് നമ്മുടെമേലുള്ള സാത്താന്റെ അധികാരത്തോട് ഇടപെടുന്നു, എന്നാൽ ഈ വാക്യത്തിലെ വീണ്ടെടുപ്പ് ദൈവത്തിന്റെ നീതിയുള്ള നിബന്ധന നിവർത്തിച്ചുകൊണ്ട് നമ്മുടെ പാപങ്ങളോട് ഇടപെടുന്നു. പാപങ്ങളുടെ ക്ഷമ എന്നത് നമുക്ക് ക്രിസ്തുവിലുള്ള വീണ്ടെടുപ്പാണ്. ക്രിസ്തുവിന്റെ മരണം നമ്മുടെ പാപങ്ങളുടെ ക്ഷമയ്ക്കായി വീണ്ടെടുപ്പ് നിവർത്തിച്ചിരിക്കുന്നു. ദൈവത്തിന്റെ സ്നേഹപുത്രനായ ക്രിസ്തുവിൽ നമുക്ക് വീണ്ടെടുപ്പും പാപക്ഷമയുമുണ്ട്. നമ്മുടെ വീണ്ടെടുപ്പുകാരനായ ക്രിസ്തുവിൽ നാം വിശ്വസിച്ചപ്പോൾ, ദൈവം ഉടനടി നമ്മെ അന്ധകാരത്തിന്റെ അധികാരത്തിൽ നിന്ന് വിടുവിക്കുകയും വെളിച്ചത്തിന്റെ രാജ്യത്തിലേക്ക് മാറ്റുകയും ചെയ്തു. ഇവിടെ വെളിച്ചത്തിൽ, വിശുദ്ധന്മാരുടെ ഓഹരിയുടെ പങ്കിനായി നാം യോഗ്യരാക്കപ്പെട്ടിരിക്കുന്നു. ഇതിനർത്ഥം ക്രിസ്തുവിനെ ആസ്വദിക്കുവാൻ നാം യോഗ്യരാക്കപ്പെട്ടിരിക്കുന്നു എന്നാണ്. ഈ യോഗ്യത നിവർത്തിക്കപ്പെട്ട ഒരു വസ്തുതയായതിനാൽ, അതിനായി നാം പ്രാർത്ഥിക്കേണ്ട ആവശ്യമില്ല. നേരെമറിച്ച്, പൗലൊസിനോടൊപ്പം നാം ഇതിനായി പിതാവിന് നന്ദി പറയണം.