സൃഷ്ടിയുടെ പ്രാരംഭത്തിൽ അല്ല, മറിച്ച് രണ്ടായിരം വർഷങ്ങൾക്ക് മുമ്പ് മാത്രം ജനിച്ച ക്രിസ്തു എങ്ങനെ സകല സൃഷ്ടിയിലും ആദ്യജാതനാകും എന്ന് ചിലർ അത്ഭുതപ്പെട്ടേക്കാം. ഇത് ശരിയായി മനസ്സിലാക്കണമെങ്കിൽ, ദൈവത്തിന് സമയത്തിന്റെ പരിമിതി ഇല്ലെന്ന് നാം തിരിച്ചറിയണം. ഉദാഹരണത്തിന്, നമ്മുടെ സമയ കണക്കുകൂട്ടൽ അനുസരിച്ച്, ക്രിസ്തു ക്രൂശിക്കപ്പെട്ടത് ഏകദേശം രണ്ടായിരം വർഷങ്ങൾക്ക് മുമ്പാണ്. എന്നാൽ വെളിപ്പാടു 13:8 പറയുന്നത് ലോകസ്ഥാപനം മുതൽ ക്രിസ്തു അറുക്കപ്പെട്ടു എന്നാണ്. രണ്ടും ശരിയാണ്. എന്നിരുന്നാലും, നമ്മുടെ കണക്കുകൂട്ടലിനേക്കാൾ ദൈവത്തിന്റെ കണക്കുകൂട്ടലാണ് വളരെ പ്രധാനം. ദൈവത്തിന്റെ ദൃഷ്ടിയിൽ, ലോകസ്ഥാപനം മുതൽ ക്രിസ്തു ക്രൂശിക്കപ്പെട്ടു. പൂർവകാല നിത്യതയിൽ, മനുഷ്യന്റെ വീഴ്ചയെ ദൈവം മുൻകൂട്ടി കണ്ടു. അതിനാൽ, നിത്യതയിൽത്തന്നെ വീണ്ടെടുപ്പ് നിവർത്തിക്കുന്നതിനായുള്ള ഒരുക്കം അവൻ ചെയ്തു. നമ്മുടെ സമയബോധം അനുസരിച്ച്, കർത്താവായ യേശു ഏകദേശം രണ്ടായിരം വർഷങ്ങൾക്ക് മുമ്പ് ബേത്‌ലഹേമിൽ ജനിച്ചു. എന്നാൽ ദൈവത്തിന്റെ ദൃഷ്ടിയിൽ, ലോകസ്ഥാപനത്തിന് മുമ്പ് കർത്താവായ യേശു ജനിച്ചു കഴിഞ്ഞിരുന്നു. ലോകസ്ഥാപനം മുതൽ അവൻ അറുക്കപ്പെട്ടുവെങ്കിൽ, തീർച്ചയായും അതിനുമുമ്പ് അവൻ ജനിച്ചിരിക്കണം. അതിനാൽ, നിത്യതയിലുള്ള ദൈവത്തിന്റെ വീക്ഷണം അനുസരിച്ച്, ക്രിസ്തു പൂർവകാല നിത്യതയിൽ ജനിച്ചു. ഇതാണ് ദൈവത്തിന്റെ വീക്ഷണപ്രകാരം ക്രിസ്തു എല്ലായ്‌പ്പോഴും സകല സൃഷ്ടികളിലും ഒന്നാമനായിരിക്കുന്നതിന്റെ കാരണം. യേശു ബേത്‌ലഹേമിലെ പുൽത്തൊട്ടിയിൽ ജനിക്കുന്ന ദിവസം ദൈവം മുൻകൂട്ടി കാണുകയുണ്ടായി. ക്രിസ്തു സൃഷ്ടികൾക്കിടയിൽ ഒന്നാമൻ ആയതുകൊണ്ട്, സർവവും-ഉൾക്കൊള്ളുന്നവനായവൻ എന്ന നിലയിൽ അവൻ സ്രഷ്ടാവും സൃഷ്ടിയുടെ ഭാഗവുമാണെന്ന് നമുക്ക് പറയാൻ കഴിയും.