[ഭാഗം 2] നാം രക്ഷിക്കപ്പെട്ടശേഷം, എത്രത്തോളം നമ്മുടെ സ്വന്തം ഹിതപ്രകാരം നടക്കുന്നുവോ, അത്രത്തോളം കഷ്ടതയും കുറഞ്ഞ സന്തോഷവുമാണ് നമുക്ക് ലഭിക്കുക. എന്നാൽ എത്രത്തോളം നാം പുതിയ ജീവന് അനുസരിച്ച് നടക്കുകയും ദൈവഹിതത്തെ അനുസരിക്കുകയും ചെയ്യുന്നുവോ, അത്രത്തോളം സമാധാനവും സന്തോഷവും നമുക്ക് ഉണ്ടാകും. ഇതൊരു അത്ഭുതകരമായ മാറ്റമാണ്. നമ്മുടെ സ്വന്തം ഹിതപ്രകാരം നടന്നാൽ നാം സന്തോഷവാന്മാരായിരിക്കുമെന്ന് നാം കരുതരുത്. ക്രിസ്ത്യാനികളായിത്തീർന്ന ശേഷം, സ്വന്തം ഹിതപ്രകാരം നടക്കാതെ ദൈവഹിതത്തിന് കീഴ്‌പ്പെടുവാനും അത് അനുസരിക്കുവാനും പഠിച്ചാൽ നമ്മുടെ പാത സമാധാനവും സന്തോഷവും നിറഞ്ഞതാണെന്ന് നാം കണ്ടെത്തും. ക്രിസ്തീയ സന്തോഷം എന്നത് ദൈവഹിതം അനുസരിക്കുന്നതുമായി ബന്ധപ്പെട്ടതാണ്, അല്ലാതെ സ്വന്തം ഹിതപ്രകാരം നടക്കുന്നതുമായിട്ടല്ല. നാം ക്രിസ്ത്യാനികളായിത്തീർന്നാൽ, ദൈവഹിതം കൈക്കൊള്ളുവാനും അതിനാൽ നിയന്ത്രിക്കപ്പെടുവാനും നാം പഠിക്കേണ്ടതുണ്ട്. ഒരു വ്യക്തിക്ക് ദൈവഹിതത്തിന് താഴ്മയോടെ കീഴ്‌പ്പെടുവാൻ കഴിയുമെങ്കിൽ, അനാവശ്യമായ പല വഴിമാറിപ്പോകലുകളിൽ നിന്നും അവന് സ്വയം ഒഴിവാകുവാൻ സാധിക്കും. പലരും തങ്ങളുടെ സ്വന്തം ഹിതപ്രകാരം നടക്കുന്നത് കൊണ്ട് പരാജയപ്പെടുകയും ജീവനിൽ വളരുന്നത് നിലയ്ക്കുകയും ചെയ്യുന്നു. സ്വന്തം ഹിതപ്രകാരം നടക്കുന്നതിന്റെ ഫലം ദുഃഖവും ദാരിദ്ര്യവുമല്ലാതെ മറ്റൊന്നുമല്ല. ഒടുവിൽ നമുക്ക് ദൈവഹിതപ്രകാരം തന്നെ നടക്കേണ്ടി വരും. കാര്യങ്ങളിലൂടെയും, സാഹചര്യങ്ങളിലൂടെയും, ചുറ്റുപാടുകളിലൂടെയും ദൈവം എപ്പോഴും നമ്മെ കീഴടക്കുന്നു. നാം ദൈവത്താൽ തിരഞ്ഞെടുക്കപ്പെട്ടവരല്ലായിരുന്നുവെങ്കിൽ, നമ്മുടെ ഹിതം പോലെ നടക്കുവാൻ അവൻ നമ്മെ അനുവദിക്കുമായിരുന്നു. എന്നാൽ നാം ദൈവത്താൽ തിരഞ്ഞെടുക്കപ്പെട്ടവരായതുകൊണ്ട്, അവന്റെ വഴിക്കനുസരിച്ച് അനുസരണത്തിന്റെ പാതയിലേക്ക് അവൻ നമ്മെ നയിക്കും. അനുസരണക്കേട് നമുക്ക് അനാവശ്യമായ വഴിമാറിപ്പോകലുകൾ മാത്രമേ നൽകുകയുള്ളൂ. ഒടുവിൽ നമുക്ക് അനുസരിക്കേണ്ടി തന്നെ വരും.