വിശ്വസിക്കുക എന്നാൽ [ആത്മിക] വസ്തുതകളെ സാരാംശീകരിക്കുക എന്നാണ്. നാം ഒന്ന് കണ്ടുകഴിഞ്ഞാൽ, നാം അത് സാരാംശീകരിക്കുന്നു. ഒരിക്കൽ വിശ്വസിച്ചാൽ, നാം വസ്തുതകളെ സാരാംശീകരിക്കുകയും, നമുക്ക് അത് ലഭിക്കുകയും ചെയ്യുന്നു... നിങ്ങൾക്ക് വിശ്വാസമില്ലെങ്കിൽ, നിങ്ങൾക്ക് വസ്തുതകളെ സാരാംശീകരിക്കുവാൻ കഴിയില്ല. ഒരു ചിത്രത്തിന്റെ നിറം കണ്ണുകൾ കൊണ്ട് മാത്രമേ സാരാംശീകരിക്കുവാൻ കഴിയൂ, ഒരു ഓർഗന്റെ ശബ്ദം ചെവികൾ കൊണ്ട് മാത്രമേ സാരാംശീകരിക്കുവാൻ കഴിയൂ, ഒരു വസ്തുവിന്റെ ഘടന കൈകൾ കൊണ്ട് മാത്രമേ സാരാംശീകരിക്കുവാൻ കഴിയൂ. അതേപോലെതന്നെ, ദൈവവചനവും അവന്റെ വാഗ്ദാനങ്ങളും വിശ്വാസത്താൽ മാത്രമേ സാരാംശീകരിക്കുവാൻ കഴിയൂ. “കർത്താവേ, എന്റെ ജയമായിരിക്കണമേ, എന്റെ ജീവനായിരിക്കണമേ, എന്റെ വിശുദ്ധീകരണമായിരിക്കണമേ” എന്ന് നാം സംശയത്തോടെ ദൈവത്തോട് പ്രാർത്ഥിക്കേണ്ടതില്ല. പകരം, “ദൈവമേ, നീ എന്റെ ജയമാണ്. നീ എന്റെ ജീവനും എന്റെ വിശുദ്ധീകരണവും ആയതുകൊണ്ട് ഞാൻ നിനക്ക് നന്ദി പറയുകയും സ്തുതിക്കുകയും ചെയ്യുന്നു. ഞാൻ നിനക്ക് നന്ദി പറയുകയും സ്തുതിക്കുകയും ചെയ്യുന്നു!” എന്ന് അവനോട് നാം പറയണം. സഹോദരീസഹോദരന്മാരേ, നാം എപ്പോഴും പരീക്ഷകളെ നേരിടുന്നുണ്ട്. പല പ്രയാസങ്ങളും നമുക്ക് മുന്നിലുണ്ട്, പരുഷമായ വാക്കുകൾ നമ്മുടെ ചെവികളിൽ പതിക്കുന്നു. അവ മറികടക്കുവാൻ ശക്തി നൽകണമേ എന്ന് നാം ദൈവത്തോട് പ്രാർത്ഥിക്കണമോ? വേണ്ട, നാം പറയേണ്ടത് ഇതാണ്: “കർത്താവേ, നീ എന്റെ ജയമായതുകൊണ്ട് ഞാൻ നിനക്ക് നന്ദി പറയുകയും സ്തുതിക്കുകയും ചെയ്യുന്നു! കർത്താവേ, നീ എനിക്ക് വേണ്ടി ജയിച്ചുകൊണ്ടിരിക്കുന്നു. എനിക്ക് വേണ്ടി നീ എല്ലാറ്റിനെയും ചെറുത്തുനിൽക്കുന്നതുകൊണ്ട് ഞാൻ നിനക്ക് നന്ദി പറയുകയും സ്തുതിക്കുകയും ചെയ്യുന്നു. നീ എന്റെ തലയും ഞാൻ നിന്റെ അവയവവുമായതിനായി നന്ദി. നീ മുന്തിരിവള്ളിയും ഞാൻ ശാഖയുമാണ്. നീ എനിക്ക് സകലവും നൽകിക്കൊണ്ടിരിക്കുന്നു.” അവന്റെ വചനപ്രകാരം അവൻ ഇപ്പോൾതന്നെ നമുക്ക് സകലവും നൽകിക്കൊണ്ടിരിക്കുന്നു!