സഹോദരീസഹോദരന്മാരെ, ദൈവം നമ്മെ ഒരു ഉദ്ദേശ്യത്തോടെ സൃഷ്ടിക്കുകയും, ഒരു ഉദ്ദേശ്യത്തോടെ തന്നെ അവൻ നമ്മെ രക്ഷിക്കുകയും ചെയ്തു. നാം അവന്റെ പുത്രന്റെ ജീവനെ ആവിഷ്കരിക്കണമെന്നും അവന്റെ പുത്രന്റെ തേജസ്സിൽ പങ്കുകൊള്ളണമെന്നുമാണ് ദൈവത്തിന്റെ ഉദ്ദേശ്യം. പൂർവകാല നിത്യതയിൽ ദൈവത്തിന് ഒരു ഉദ്ദേശ്യമുണ്ടായിരുന്നു; അവന് ഒരു ഏകജാതനായ പുത്രനെ മാത്രമല്ല, മറിച്ച് അനേകം പുത്രന്മാരെയാണ് വേണ്ടിയിരുന്നത്. അതിനാൽ, റോമ 8:29 ഇപ്രകാരം പറയുന്നു, "എന്തുകൊണ്ടെന്നാൽ അവൻ മുന്നറിഞ്ഞവരെ, തന്റെ പുത്രൻ അനേകം സഹോദരന്മാരിൽ ആദ്യജാതൻ ആകേണ്ടതിന്, അവന്റെ സ്വരൂപത്തോട് അനുരൂപരാകുവാൻ മുൻനിയമിച്ചിരിക്കുന്നു." തന്റെ പുത്രന്റെ സ്വരൂപത്തോടു അനുരൂപരാകുവാൻ ദൈവം നമ്മെ മുൻനിയമിച്ചു. അതിനുശേഷം അവൻ നമ്മെ നേടേണ്ടതിനായ് നമ്മെ വിലയ്ക്കുവാങ്ങുകയും വീണ്ടെടുക്കുകയും ചെയ്തു. ഇതാണ് ഇന്ന് നമ്മുടെ ആത്യന്തിക ലക്ഷ്യം... ദൈവത്തിന് ഒരു നിത്യ വ്യവസ്ഥയുണ്ട്, അത് അവന്റെ പുത്രനിലൂടെയാണ് നിവർത്തിക്കുന്നത്. ഈ വ്യവസ്ഥയ്ക്കായി ദൈവം സകലത്തെയും അവൻ മുഖാന്തരം സൃഷ്ടിച്ചു. വീണ്ടെടുപ്പ് ഈ വ്യവസ്ഥയ്ക്കുവേണ്ടിയാണ്, സാത്താന്റെ തോൽവി ഈ വ്യവസ്ഥയ്ക്കുവേണ്ടിയാണ്, പാപികളുടെ രക്ഷയും ഈ വ്യവസ്ഥയ്ക്കുവേണ്ടിയാണ്. ദൈവം നമ്മിലൂടെ എന്താണോ നിവർത്തിക്കുവാൻ ആഗ്രഹിക്കുന്നത് അത് നിവർത്തിക്കുന്നതിന് മുൻപായി ദൈവത്തിന്റെ നിത്യ വ്യവസ്ഥയെക്കുറിച്ച് നാം അറിയേണ്ടതുണ്ട്. നാം ഇവിടെ ആയിരിക്കുന്നത് കേവലം പാപികളുടെ രക്ഷയ്ക്കുവേണ്ടി മാത്രമല്ല; ദൈവത്തിന്റെ നിത്യ വ്യവസ്ഥയുടെ നിവൃത്തിക്കായാണ് നാം ഇവിടെ ആയിരിക്കുന്നത്. നാം നമ്മെത്തന്നെ സമർപ്പിക്കുന്നില്ല എങ്കിൽ [അതായത് നമ്മെത്തന്നെ ദൈവത്തിന് നൽകുന്നില്ല എങ്കിൽ], ഈ ഹിതം നല്ലതാണെന്ന് നമുക്ക് ഒരിക്കലും ബോധ്യം വരില്ല... ദൈവത്തിന്റെ ഹിതത്തിന്റെ നന്മയെക്കുറിച്ച് നമുക്ക് പാടാം! ദൈവത്തിന്റെ ഹിതത്തിന്റെ നന്മ നിമിത്തം നമുക്ക് ഹാലേലൂയ്യ പറയാം! ദൈവത്തിന്റെ ഹിതം നല്ലതാണ്, അത് ദോഷകരമല്ല. അവന്റെ ഹിതം നമ്മുടെ ലാഭത്തിനായുള്ളതാണ്, അതിൽ ദോഷമില്ല. നാം അത്യന്തം ഹ്രസ്വദൃഷ്ടിയുള്ളവരാണ്. ദൈവത്തിന്റെ ഹിതം നല്ലതാണ്.