"യഹോവയിങ്കലെ സന്തോഷം നിങ്ങളുടെ ബലം ആകുന്നുവല്ലോ." ദൈവം നമുക്ക് തന്നിരിക്കുന്ന ജീവൻ സന്തോഷത്തിൽ ആവിഷ്കരിക്കപ്പെടുന്നു. നമ്മുടെ കർത്താവായ യേശു സന്തോഷം, ഉല്ലാസം, സ്തുതി, സ്തോത്രം എന്നിവയുടെ അന്തരീക്ഷത്തിലാണ് ജീവിക്കുന്നത്. കഴിഞ്ഞ ഏതാനും വർഷങ്ങളായി ഞാൻ പഠിച്ച പാഠം ഇതാണ്. മുൻകാലങ്ങളിൽ, ഞാൻ ക്ഷമിക്കപ്പെട്ടുവെന്നും ഞാൻ സഹിച്ചുവെന്നും കർത്താവിന് സമർപ്പിക്കുകയും അനുസരിക്കുകയും ചെയ്തുവെന്നും ഞാൻ അറിഞ്ഞിരുന്നു. എന്നാൽ എനിക്ക് ഒരു പരിധി വരെ കയ്പ് തോന്നിയിരുന്നു, ചില ചെറിയ പരാതികളും ഉണ്ടായിരുന്നു. എനിക്ക് കർത്താവിന് സ്തുതിയും സ്തോത്രവും അർപ്പിക്കുവാൻ കഴിഞ്ഞിരുന്നില്ല. എപ്പോഴെല്ലാം നമുക്ക് അവന് സ്തുതിയും സ്തോത്രവും അർപ്പിക്കുവാൻ കഴിയുന്നില്ലയോ, അപ്പോഴെല്ലാം നാം പരാജയപ്പെടുന്നു. സഹോദരീ സഹോദരന്മാരെ, നമ്മുടെ ജയം കാണപ്പെടുന്നത് നമ്മുടെ സന്തോഷത്തിലാണ്. എപ്പോഴെല്ലാം നാം നമ്മുടെ സന്തോഷവും ഉല്ലാസവും കളയുന്നുവോ, അപ്പോഴെല്ലാം നാം നമ്മുടെ ജയവും കൂടെയാണ് കളയുന്നത്. എപ്പോഴെല്ലാം നാം നമ്മുടെ സന്തോഷവും ഉല്ലാസവും കളയുന്നുവോ, അപ്പോഴെല്ലാം നാം ബന്ധനസ്ഥരായി മാറുന്നു. സന്തോഷം ബലം നൽകുന്നു എന്ന് കഴിഞ്ഞ ഈ ഏതാനും ദിവസങ്ങളിലുണ്ടായതുപോലെ താൻ ഒരിക്കലും ഗ്രഹിച്ചിട്ടില്ലെന്ന് ഒരു സഹോദരൻ സാക്ഷ്യപ്പെടുത്തി. എപ്പോഴെല്ലാം നാം സന്തോഷിക്കുകയും ഉല്ലസിക്കുകയും ചെയ്യുന്നില്ലയോ, അപ്പോഴെല്ലാം നാം വിഷാദത്തിലാകുന്നു. സന്തോഷത്തിലും ഉല്ലാസത്തിലും നാം നമ്മുടെ ജയത്തെ നിലനിർത്തണം. ജയം എന്നത് വെള്ളത്തിൽ സൂക്ഷിക്കേണ്ട ഒരു മീൻ പോലെയാണ്. ജയത്തെ സന്തോഷത്തിലും ഉല്ലാസത്തിലും സൂക്ഷിക്കേണ്ടതുണ്ട്. നാം നമ്മുടെ ജയത്തെ സന്തോഷത്തിലും ഉല്ലാസത്തിലും നിലനിർത്തണം.