1 തെസ്സലൊനീക്യർ ഒന്നാം അധ്യായത്തിൽ ത്രിയേക ദൈവം വെളിപ്പെടുത്തപ്പെട്ടിരിക്കുന്നു. ഈ അധ്യായത്തിൽ നമുക്ക് ത്രിയേക ദൈവം—പിതാവ്, പുത്രൻ, പരിശുദ്ധാത്മാവ്—ഉണ്ട്. പൗലോസിന്റെ കാലത്ത്, ഏത് സാധാരണ യഹൂദനും "അവന്റെ പുത്രൻ" എന്ന പദപ്രയോഗത്താൽ നീരസപ്പെടുമായിരുന്നു. ഇത് യഹൂദന്മാർക്ക് അപ്രിയമായിരുന്നു, കാരണം അവർ സത്യദൈവത്തിൽ വിശ്വസിച്ചിരുന്നു എങ്കിലും, അവന് ഒരു പുത്രനുണ്ട് എന്ന് അവർ തിരിച്ചറിഞ്ഞിരുന്നില്ല. ഒരു പരിധി വരെ, ദൈവത്തിന് ഒരു ആത്മാവുണ്ട് എന്ന് യഹൂദന്മാർ വിശ്വസിച്ചിരുന്നു. എങ്കിലും, ആത്മാവ് ദൈവം താൻ ആയിരിക്കുന്ന അതേ പദവിയിൽ ആയിരിക്കുന്നുവെന്ന ധാരണ അവർക്കുണ്ടായിരുന്നില്ല. പകരം, ദൈവത്തിന് ഒരു ആത്മാവുണ്ടെന്നും ഈ ആത്മാവ് അവന് കീഴ്‌പ്പെട്ടതാണെന്നും മാത്രമാണ് അവർ വിശ്വസിച്ചിരുന്നത്. ദൈവത്തെ സംബന്ധിച്ച യഹൂദ വിശ്വാസമനുസരിച്ച്, ദൈവം നിസ്തുലനാകുന്നു, എങ്കിലും ഈ നിസ്തുലനായ ദൈവത്തിന് ഒരു ആത്മാവുണ്ട്. ദൈവത്തിന് ഒരു പുത്രനുണ്ട് എന്ന് യഹൂദന്മാർ തീർത്തും വിശ്വസിച്ചിരുന്നില്ല; മാത്രമല്ല ദൈവപുത്രനും ദൈവത്തിന്റെ ആത്മാവും ദൈവത്തിന്റെ അതേ പദവിയിലുള്ളവരാണെന്നും അവർ വിശ്വസിച്ചിരുന്നില്ല. ഇത് യഹൂദ ധാരണയ്ക്ക് തികച്ചും വിരുദ്ധമാണ്. അതിനാൽ, പൗലോസ് പിതാവിനെക്കുറിച്ചും അവന്റെ പുത്രനെക്കുറിച്ചും പരിശുദ്ധാത്മാവിനെക്കുറിച്ചും സംസാരിക്കുന്നത് വളരെ അടിസ്ഥാനപരമായ ഒരു കാര്യത്തെ വ്യക്തമായി ഉച്ചരിക്കുന്നതാണ്.