[ഭാഗം 2] ഇന്ന് നാം ഇപ്പോഴും പഴയ സൃഷ്ടിയിലാണ്, പുതിയ യെരൂശലേമിൽ അല്ല. ഇതുകൊണ്ടാണ് വിശുദ്ധന്മാരുടെ ഇടയിൽ അനേകം പ്രശ്നങ്ങൾ ഉള്ളത്. എന്റെ അനുഭവപ്രകാരം, നമ്മിൽ ഓരോരുത്തരും മറ്റുള്ളവർക്ക് ഒരു പ്രശ്നമായിരിക്കാം. ഞാൻ നിങ്ങൾക്ക് ഒരു പ്രശ്നമായിരിക്കാം, നിങ്ങൾ എനിക്ക് ഒരു പ്രശ്നമായിരിക്കാം. ഒരുവശത്ത്, നാം സകല വിശുദ്ധന്മാരെയും സ്നേഹിച്ചേക്കാം; മറുവശത്ത്, അവർ നമുക്ക് പ്രശ്നങ്ങൾ ഉണ്ടാക്കിയേക്കാം. ആകയാൽ, നാം എല്ലാവരോടും ദീർഘക്ഷമയുള്ളവരായിരിക്കണം. സഭ ഒരു സാങ്കല്പിക സ്വർഗ്ഗമായിരിക്കുമെന്ന് നാം സ്വപ്നം കാണരുത്. നേരെമറിച്ച്, സഭാ ജീവിതം പ്രശ്നങ്ങൾകൊണ്ട് നിറഞ്ഞതാണ്. ഒരർത്ഥത്തിൽ, സഭ എന്നത് രോഗികളാൽ നിറഞ്ഞ ഒരു ആശുപത്രിയാണ്. ഈ കാരണത്താൽ, നാം സകല വിശുദ്ധന്മാരോടും ദീർഘക്ഷമയുള്ളവരായിരിക്കണം. മറ്റുള്ളവർ പ്രശ്‌നങ്ങളുമായി, ചെറുതും നിസ്സാരവുമെന്ന് തോന്നുന്ന പ്രശ്നങ്ങളുമായിപ്പോലും നിങ്ങളുടെ അടുക്കൽ വരുമ്പോൾ അസ്വസ്ഥരാകരുത്. പ്രത്യേകമായി, ചെറു-ദേഹിയുള്ളവർ ചെറിയ പ്രശ്നങ്ങളുമായി നിങ്ങളുടെ അടുക്കൽ വന്നേക്കാം. അത്ര ചെറിയ കാര്യം നിങ്ങളുടെ അടുക്കൽ കൊണ്ടുവന്നതിന് അവരോട് കോപിക്കുന്നതിന് പകരം, അവരുടെ പ്രശ്നങ്ങളോട് ഇടപെടുവാൻ അവരെ സഹായിക്കുക. മൂപ്പന്മാർ, പ്രത്യേകിച്ചും ബലഹീനരോടും ചെറു ദേഹിയുള്ളവരോടും ദീർഘക്ഷമയുള്ളവരായിരിക്കുവാൻ പഠിക്കുക. എന്നിരുന്നാലും, വാക്യം 14-ലെ പൗലൊസിന്റെ വചനം മൂപ്പന്മാരിലേക്ക് മാത്രമായി പരിമിതപ്പെടുത്തിയിട്ടില്ല; അത് സകല വിശുദ്ധന്മാർക്കുമുള്ള ഒരു വചനമാണ്.