[ഭാഗം 1] [1 തെസ്സ 5] 23-ാം വാക്യമനുസരിച്ച്, വിശുദ്ധീകരിക്കുന്നവൻ സമാധാനത്തിന്റെ ദൈവമാണ്. അവന്റെ വിശുദ്ധീകരണം സമാധാനത്തെ കൊണ്ടുവരുന്നു. നാം ഉള്ളിൽ നിന്ന് പൂർണ്ണമായി അവനാൽ വിശുദ്ധീകരിക്കപ്പെടുമ്പോൾ, നമുക്ക് എല്ലാ വിധത്തിലും അവനുമായി സമാധാനമുണ്ട്. ഇവിടെ "വിശുദ്ധീകരിക്കുക" എന്ന വാക്കിന്റെ അർത്ഥം വേർതിരിക്കപ്പെടുക എന്നാണ്; അതായത് പൊതുവായതോ അശുദ്ധമായതോ ആയ കാര്യങ്ങളിൽ നിന്ന് ദൈവത്തിങ്കലേക്ക് വേർതിരിക്കപ്പെടുക എന്നതാണ്. "സമ്പൂർണ്ണമായി" എന്ന വാക്കിന്റെ അർത്ഥം പൂർണ്ണമായും, സമഗ്രമായി, പരിണതിയോളം എന്നാണ്. നമ്മുടെ ആളത്തത്തിന്റെ ഏതൊരു ഭാഗവും, അതായത് നമ്മുടെ ആത്മാവോ ദേഹിയോ ദേഹമോ, പൊതുവായതോ അശുദ്ധമായതോ ആയി അവശേഷിക്കാതിരിക്കുവാൻ ദൈവം നമ്മെ സമ്പൂർണ്ണമായി വിശുദ്ധീകരിക്കുന്നു. നമ്മുടെ ആത്മാവിനെയും ദേഹിയെയും ദേഹത്തേയും കുറിച്ചുള്ള പൗലോസിന്റെ വചനം മനുഷ്യൻ മൂന്ന് ഭാഗങ്ങൾ ഉള്ളവനാണ് എന്ന് ശക്തമായി സൂചിപ്പിക്കുന്നു: ആത്മാവ്, ദേഹി, ദേഹം. ആത്മാവ് നമ്മുടെ ഏറ്റവും അകത്തെ ഭാഗമാണ്, നമുക്ക് ദൈവവുമായി ബന്ധപ്പെടെണ്ടതിന്നു ദൈവബോധമുള്ള ആന്തരീക അവയവമാണ് (യോഹ. 4:24; റോമ. 1:9). ദേഹി നമ്മുടെ സ്വന്തം സ്വയമാണ് (മത്താ. 16:25; ലൂക്കൊ. 9:25), നമ്മുടെ ആത്മാവിനും ശരീരത്തിനും ഇടയിലുള്ള ഒരു മാധ്യമമാണ്, നമുക്ക് നമ്മുടെ വ്യക്തിത്വമുണ്ടാകേണ്ടതിനു അത് സ്വയബോധമുള്ളതാണ്. ദേഹം നമ്മുടെ ബാഹ്യഭാഗമാണ്, പുറത്തെ അവയവമാണ്, നമുക്ക് ഭൗതിക ലോകവുമായി ബന്ധപ്പെടാൻ കഴിയേണ്ടതിന്നു അത് ലോകബോധമുള്ളതാണ്. ദേഹം ദേഹിയെ ഉൾക്കൊള്ളുന്നു, ദേഹി ആത്മാവിന്റെ പാത്രവുമാണ്. വീണ്ടുംജനിപ്പിക്കപ്പെട്ടവരുടെ ആത്മാവിൽ, ആത്മാവായ ദൈവം വസിക്കുന്നു; ദേഹിയിൽ, നമ്മുടെ സ്വയവും; ദേഹത്തിൽ, ശാരീരിക ഇന്ദ്രിയങ്ങളും വസിക്കുന്നു. [നാളെ തുടരും]