[ഭാഗം 1] നാം പ്രവൃത്തികളുടെ പുസ്തകത്തിലേക്ക് വരുമ്പോൾ, ഈ പുസ്തകവും ലൂക്കൊസിന്റെ സുവിശേഷവും ഒരേ വ്യക്തിയാൽ എഴുതപ്പെട്ടതാണെന്ന് നാം ഗ്രഹിക്കേണ്ടതുണ്ട്. പ്രവൃത്തികളുടെ ആദ്യത്തെ രണ്ട് വാക്യങ്ങൾ ഈ പുസ്തകം ലൂക്കൊസിന്റെ സുവിശേഷത്തിന്റെ തുടർച്ചയാണെന്ന് സൂചിപ്പിക്കുന്നു. ഈ സുവിശേഷത്തിൽ നമുക്ക് മനുഷ്യ-രക്ഷകനുണ്ട്, കൂടാതെ നമ്മുടെ വീണ്ടെടുപ്പുകാരനായ രക്ഷകൻ ദൈവ-മനുഷ്യനാണെന്ന് നാം കാണുന്നു. ലൂക്കൊസ് മനുഷ്യ-രക്ഷകന്റെ ജനനത്തെക്കുറിച്ച് മാത്രമല്ല, അവന്റെ ഗർഭധാരണത്തെക്കുറിച്ചുമുള്ള ഒരു വ്യക്തമായ രേഖ നമുക്ക് നൽകുന്നു. കർത്താവിന്റെ ഗർഭധാരണം, ജനനം, ബാല്യം, ജീവിതം, ശുശ്രൂഷ, മരണം, പുനരുത്ഥാനം, ആരോഹണം എന്നിവയെക്കുറിച്ച് ലൂക്കൊസ് വിവരിക്കുന്നു. മനുഷ്യ-രക്ഷകന്റെ ഗർഭധാരണം സ്വർഗ്ഗങ്ങളിൽ നിന്ന് മാത്രമല്ല, പിതാവായ ദൈവത്തിൽ നിന്നുമുള്ള അവന്റെ ഇറങ്ങിവരവായിരുന്നു എന്ന് നമുക്ക് പറയുവാൻ കഴിയും. അതുപോലെ, അവന്റെ ആരോഹണം സ്വർഗത്തിലേക്ക് മാത്രമല്ല, പിതാവിങ്കലേക്കുമുള്ള അവന്റെ മടങ്ങിപ്പോക്കായിരുന്നു. ഈ വരവിലൂടെയും പോക്കിലൂടെയും കർത്താവായ യേശു ഒരു അത്ഭുതകരമായ ആളത്തമായിത്തീർന്നു. അവന്റെ ഗർഭധാരണത്തിലൂടെയും ജനനത്തിലൂടെയും അവൻ ദിവ്യത്വവും മനുഷ്യത്വവുമുള്ള, സൃഷ്ടാവായ ദൈവവും ഒരു സൃഷ്ടിയായ മനുഷ്യനുമായ ഒരു വ്യക്തിയായിത്തീർന്നു. അങ്ങനെയുള്ള ഒരു അത്ഭുതവാനായ വ്യക്തിയെന്ന നിലയിൽ, കർത്താവായ യേശു ദിവ്യ സദ്ഗുണങ്ങളെ ആവിഷ്കരിക്കുന്ന എല്ലാ മാനുഷിക നന്മകളോടുംകൂടിയ ഒരു മനുഷ്യനായി ഭൂമിയിൽ ജീവിച്ചു. ഇതാണ് അവൻ ജീവിക്കുകയും ശുശ്രൂഷിക്കുകയും ചെയ്ത വഴി. മനുഷ്യ-രക്ഷകൻ മരണത്തിലേക്ക് നടക്കുകയും, മരണത്തിലൂടെ കടന്നുപോകുകയും, മരണത്തിൽ നിന്ന് പുറത്തുവരികയും ചെയ്തുകൊണ്ട് മരണം അനുഭവമാക്കി. മരണത്തിലും പാതാളത്തിലും ഒരു സന്ദർശനം നടത്തിയ ശേഷം, അവൻ പുനരുത്ഥാനത്തിൽ പുറത്തുവന്നു. ആകയാൽ, അവൻ പുനരുത്ഥാനത്തിലേക്ക് പ്രവേശിച്ചു, പുനരുത്ഥാനത്തിൽ അവൻ സ്വർഗത്തിലേക്ക് കയറിപ്പോയി. ഇപ്പോൾ ഈ വ്യക്തി, തേജസ്സ്‌ക്കരിക്കപ്പെട്ട മനുഷ്യ-രക്ഷകൻ, സ്വർഗത്തിലാണ്. ലൂക്കൊസിന്റെ സുവിശേഷത്തിലെ നിർണായക ഉള്ളടക്കങ്ങളുടെ ഒരു ലഘു സംഗ്രഹമാണിത്. [നാളെ തുടരും]