[ഭാഗം 2] സ്വർഗ്ഗത്തിലേക്കുള്ള ക്രിസ്തുവിന്റെ ആരോഹണത്തിന്റെ ദർശനം അവനിലും, അവന്റെ മരണത്തിലൂടെയും പുനരുത്ഥാനത്തിലൂടെയും അവൻ അവർക്കായി ചെയ്തതിലുമുള്ള ശിഷ്യന്മാരുടെ വിശ്വാസത്തെ ശക്തിപ്പെടുത്തി. അത് ദൈവത്തിന്റെ സ്വർഗ്ഗീയ വ്യവസ്ഥയെക്കുറിച്ചുള്ള അവരുടെ കാഴ്ചപ്പാടിനെ വിശാലമാക്കി, അത് ഭൂമിയിൽ ദൈവത്തിന്റെ പുതിയ നിയമ വ്യവസ്ഥ നടപ്പിലാക്കുന്നതിനായി സ്വർഗത്തിലെ ക്രിസ്തുവിന്റെ ശുശ്രൂഷയോടുള്ള സഹകരണത്തിലേക്ക് അവരെ കൊണ്ടുവന്നിരുന്നു. ക്രിസ്തുവിന്റെ ആരോഹണത്തിന് സാക്ഷ്യം വഹിച്ചപ്പോൾ ശിഷ്യന്മാർ അത്യധികം സ്വാധീനിക്കപ്പെടുകയും വളരെ ആവേശഭരിതരാകുകയും ചെയ്തിരിക്കണം. അവൻ ആരോഹണം ചെയ്യുന്നത് നോക്കിക്കൊണ്ടിരുന്നപ്പോൾ, അവർ തീർച്ചയായും കരയുകയായിരുന്നില്ല. മറിച്ച്, ആശ്ചര്യകരമായ എന്തോ ഒന്ന് തങ്ങൾ കാണുന്നു എന്ന് തിരിച്ചറിഞ്ഞ് അവർ സന്തുഷ്ടരായിരുന്നിരിക്കണം. ശിഷ്യന്മാർ സ്വർഗ്ഗത്തിലേക്ക് ഉറ്റുനോക്കിക്കൊണ്ടിരിക്കുമ്പോൾ, വെള്ളവസ്ത്രം ധരിച്ച രണ്ട് പുരുഷന്മാർ അവരുടെ അരികിൽ നിന്നു. യഥാർത്ഥത്തിൽ ദൂതന്മാരായിരുന്ന ഈ രണ്ട് പുരുഷന്മാർ, സ്വർഗ്ഗത്തിലേക്ക് നോക്കി നിൽക്കുന്നത് എന്തുകൊണ്ട് എന്ന് ശിഷ്യന്മാരോട് ചോദിച്ചു. തുടർന്ന്, തങ്ങളുടെ അടുക്കൽ നിന്ന് സ്വർഗ്ഗത്തിലേക്ക് എടുക്കപ്പെട്ട സാക്ഷാൽ യേശു, അവൻ സ്വർഗ്ഗത്തിലേക്ക് പോകുന്നത് അവർ കണ്ടതുപോലെതന്നെ മടങ്ങിവരും എന്ന് അവർ തുടർന്നു പറഞ്ഞു. കർത്താവായ യേശു ദേഹരൂപമായി ആരോഹണം ചെയ്തതുപോലെതന്നെ, അവൻ ദേഹരൂപമായി മടങ്ങിവരികയും ചെയ്യും എന്ന് ഇത് സൂചിപ്പിക്കുന്നു. മനുഷ്യന്റെ കാഴ്ചയ്ക്ക് ദൃശ്യമായി, ഒരു മേഘത്തിന്റെ മാർഗ്ഗത്തിൽ ക്രിസ്തു സ്വർഗ്ഗത്തിലേക്ക് ആരോഹണം ചെയ്തു, അവൻ മേഘത്തിന്മേൽ മടങ്ങിവരും (മത്താ 24:30). അതിലുപരിയായി, ഒലിവ് മലയുടെ മുകളിൽ നിന്നാണ് അവൻ ആരോഹണം ചെയ്തത്, അവൻ അതേ മലയിലേക്ക് തന്നെ മടങ്ങിവരികയും ചെയ്യും.