അധർമികളുടെ കയ്യാൽ കർത്താവായ യേശു ക്രൂശിൽ തറയ്ക്കപ്പെടുകയും കൊല്ലപ്പെടുകയും ചെയ്തു എന്ന് പ്രവൃത്തികൾ 2:23 പറയുന്നു. യൂദാ ഈസ്കര്യോത്താവ്, മുഖ്യപുരോഹിതന്മാർ, ദൈവാലയത്തിലെ ഉദ്യോഗസ്ഥന്മാർ, മൂപ്പന്മാർ, മഹാപുരോഹിതനും യഹൂദന്മാരുടെ ന്യായാധിപസംഘവും, പീലാത്തൊസ്, ഹെരോദാവ്, റോമൻ പടയാളികൾ എന്നിവർ ഈ അധർമികളായ മനുഷ്യരിൽ ഉൾപ്പെട്ടിരുന്നു—പ്രധാനമായും യഹൂദ മതഭക്തരും അവരുടെ നിയുക്തരും, ജാതീയ രാഷ്ട്രീയക്കാരും അവരുടെ കീഴുദ്യോഗസ്ഥന്മാരും ആയവർ. യേശു സകല മനുഷ്യവർഗ്ഗത്താലും കൊല്ലപ്പെട്ടു എന്ന് ഇത് സൂചിപ്പിക്കുന്നു. കർത്താവായ യേശു ക്രൂശിൽ തറയ്ക്കപ്പെട്ടു എന്ന് പ്രവൃത്തികൾ 2:23 പറയുന്നു. യഹൂദന്മാരുടെ മരണശിക്ഷ കല്ലെറിഞ്ഞുകൊണ്ടായിരുന്നു. ക്രൂശുമരണം എന്നത് അടിമകളെയും ഘോര കുറ്റവാളികളെയും മാത്രം വധശിക്ഷയ്ക്ക് വിധേയമാക്കുവാൻ റോമാക്കാർ സ്വീകരിച്ച ഒരു ജാതീയ ആചാരമായിരുന്നു. കർത്താവായ യേശുവിന്റെ ക്രൂശുമരണം പഴയ നിയമത്തിന്റെ നിവൃത്തി മാത്രമല്ലായിരുന്നു (ആവ 21:23), മറിച്ച് തന്റെ മരണത്തിന്റെ രീതിയെ സംബന്ധിച്ച കർത്താവിന്റെ സ്വന്തം വചനത്തിന്റെ നിവൃത്തിയും കൂടിയായിരുന്നു (യോഹ 12:32), അത് കല്ലെറിയുന്നതിലൂടെ നിവർത്തിക്കപ്പെടുവാൻ കഴിയുമായിരുന്നില്ല. കർത്താവായ യേശു കൊല്ലപ്പെടുന്നതിന് വളരെ കുറച്ചു കാലങ്ങൾക്ക് മുമ്പ്, മരണശിക്ഷയ്ക്ക് വിധിക്കപ്പെട്ട കുറ്റവാളികളെ ക്രൂശിക്കണം എന്ന് റോമാ സാമ്രാജ്യം നിയമമുണ്ടാക്കിയത് ദൈവത്തിന്റെ സർവാധികാരത്താലായിരുന്നു. ഇത്തരത്തിലുള്ള മരണത്താലാണ് കർത്താവ് കൊല്ലപ്പെട്ടത്.