തന്റെ വേലയിലും, മരണത്തിലും, പുനരുത്ഥാനത്തിലും, ആരോഹണത്തിലുമുള്ള കർത്താവായ യേശുവിനെ സംബന്ധിച്ച് പൗലോസ് സംസാരിച്ചതിനു ശേഷം, മാനസാന്തരപ്പെടുവാനും, സ്നാനം ഏൽക്കുവാനും, രക്ഷിക്കപ്പെടുവാനും അവൻ ആത്മാവിനാൽ-ചലിപ്പിക്കപ്പെട്ടവരോട് ഉപദേശിക്കുകയും അപേക്ഷിക്കുകയും ചെയ്തു. ഇവിടെ പത്രൊസ് ആദ്യം ജനത്തോട് മാനസാന്തരപ്പെടുവാൻ പറഞ്ഞു. മാനസാന്തരപ്പെടുക എന്നത് പശ്ചാത്താപത്തിൽ പരിണമിക്കുന്ന ഒരു മനംമാറ്റം ഉണ്ടാകുക എന്നാണ്. അക്ഷരാർത്ഥത്തിൽ, മാനസാന്തരപ്പെടുക എന്ന യവന പദത്തിന്റെ അർത്ഥം പിന്നീട് വ്യത്യസ്തമായി ചിന്തിക്കുക, അതായത് ഒരു മനംമാറ്റം ഉണ്ടാകുക എന്നാണ്. മാനസാന്തരപ്പെടുക എന്നത് ഭൂതകാലത്തെക്കുറിച്ചുള്ള ഖേദത്തോടും ഭാവിക്കായുള്ള ഒരു തിരിവോടും കൂടെ മനംമാറ്റം ഉണ്ടാകുക എന്നതാണ്. പ്രതിലോമ വശത്ത്, ദൈവമുമ്പാകെ മാനസാന്തരപ്പെടുക എന്നത് പാപങ്ങളെക്കുറിച്ചും തെറ്റായ പ്രവൃത്തികളെയും കുറിച്ച് മാത്രം മാനസാന്തരപ്പെടുന്നതല്ല, പിന്നെയോ ദൈവം തനിക്കായി ഉണ്ടാക്കിയ മനുഷ്യരെ അപഹരിക്കുകയും ദുഷിപ്പിക്കുകയും ചെയ്യുന്ന ലോകത്തെക്കുറിച്ചും അതിന്റെ ദൂഷ്യത്തെക്കുറിച്ചും മാനസാന്തരപ്പെടുകയും, ഭൂതകാലത്തിൽ ദൈവത്തെ ഉപേക്ഷിച്ചു കളഞ്ഞതായ ജീവിതത്തെക്കുറിച്ച് മാനസാന്തരപ്പെടുക എന്നതുകൂടിയാണ്. അനുലോമ വശത്ത്, മാനസാന്തരപ്പെടുക എന്നത് മനുഷ്യനെ ഉണ്ടാക്കിയതിലുള്ള ദൈവത്തിന്റെ ഉദ്ദേശ്യം നിറവേറ്റുന്നതിനു വേണ്ടി, സകല വിധത്തിലും സകലത്തിലും അവനിലേക്ക് തിരിയുക എന്നതാണ്. അതിനാൽ, അത് ദൈവത്തിങ്കലേക്കുള്ള ഒരു മാനസാന്തരമാകുന്നു.