3:19-26-ൽ പത്രൊസ് ആരോഹണം ചെയ്തവനും വരുന്നവനുമായ ക്രിസ്തുവിൽ പങ്കുകൊള്ളുവാനും അവനെ ആസ്വദിക്കുവാനും കഴിയേണ്ടതിന് മാനസാന്തരപ്പെടുവാനും തിരിയുവാനും യഹൂദന്മാരെ പ്രബോധിപ്പിക്കുന്നു. ഇവിടെ പത്രൊസ് ഇപ്രകാരം പറയുന്നതായി തോന്നുന്നു, "നിങ്ങൾ വളരെ ഭോഷ്കായ ഒരു കാര്യം ചെയ്തു, എന്നാൽ ആരോഹണം ചെയ്തവനും വരുന്നവനുമായ ക്രിസ്തുവിൽ പങ്കുകൊള്ളുവാനും അവനെ ആസ്വദിക്കുവാനും കഴിയേണ്ടതിന് ഇപ്പോൾ നിങ്ങൾ മാനസാന്തരപ്പെടുകയും തിരിയുകയും ചെയ്യേണ്ടതുണ്ട്. ക്രിസ്തു ദൈവത്തിന്റെ ദാസനും, വിശുദ്ധനും, നീതിമാനും, ജീവന്റെ കാരണഭൂതനുമാകുന്നു. അവൻ സകലവും നിവർത്തിച്ചു, കൂടാതെ അവൻ സകലതും പ്രാപിക്കുകയും നേടുകയും ചെയ്തിരിക്കുന്നു. അവൻ ഇപ്പോൾ സ്വർഗത്തിലാണ്, എന്നാൽ അവൻ മടങ്ങിവരും. ഈ ക്രിസ്തു നിങ്ങളുടെ പങ്കാകുന്നു. അവനിൽ പങ്കാളിയാകുവാനും അവനെ ആസ്വദിക്കുവാനും മാനസാന്തരപ്പെടുക, തിരിയുക, വരിക. നിങ്ങൾ അവന്റെയടുക്കൽ വരികയാണെങ്കിൽ നിങ്ങൾ അവനെ ആസ്വദിക്കും." 3:20-ൽ, "ഉന്മേഷം" എന്നതിനുള്ള യവന വാക്കിന്റെ അക്ഷരാർത്ഥം തണുപ്പിക്കൽ, ചൈതന്യവൽക്കരിക്കൽ എന്നാണ്; അതിനാൽ, ആശ്വാസം നൽകുന്നത്, ഉന്മേഷമുള്ളതാക്കുന്നത്. ഉന്മേഷകാലങ്ങൾ എന്നത് സന്തോഷത്തോടും വിശ്രമത്തോടും കൂടെ സകല കാര്യങ്ങളുടെയും പുനരുജ്ജീവനത്തിന്റെ ഒരു കാലത്തെ കുറിക്കുന്നു. വാസ്തവത്തിൽ, ശരിയായ ഓരോ പരിവർത്തനവും ഒരു ഉന്മേഷകാലമാണ്. യഥാർത്ഥമായ ഓരോ വീണ്ടുംജനനവും ആസ്വാദനത്തിന്റെ ഒരു സമയമാണ്. നാം രക്ഷിക്കപ്പെട്ടപ്പോൾ, നമുക്ക് ആസ്വാദനത്തിന്റെ ഒരു സമയം ഉണ്ടായിരുന്നു. ആ സമയത്ത് നമുക്ക് സന്തോഷവും സമാധാനവും ഉണ്ടായിരുന്നു. നമ്മുടെ സന്തോഷവും സമാധാനവുമായി നാം ക്രിസ്തുവിനെത്തന്നെ ആസ്വദിച്ചു. ഒരു പരിധിവരെ, നാമെല്ലാവരും ഇത് അനുഭവിച്ചിട്ടുണ്ട്. വാസ്തവത്തിൽ, ഉന്മേഷകാലം എന്നത് ക്രിസ്തു തന്നെയാണ്. നാം അവനെ പ്രാപിക്കുമ്പോൾ, നമ്മുടെ ഉന്മേഷമായി നാം അവനെ പ്രാപിക്കുന്നു. അവൻ നമ്മുടെ ആസ്വാദനവും സമാധാനവുമാകുന്നു.