ഏതു ശക്തിയാൽ അല്ലങ്കിൽ ഏതു നാമത്തിൽ ആണ് ആ മുടന്തനായ മനുഷ്യനെ സൗഖ്യമാക്കിയത് എന്ന് പത്രൊസിനോടും യോഹന്നാനോടും ചോദിച്ചപ്പോൾ, സൗഖ്യദായകനായ ക്രിസ്തുവിനെ സംബന്ധിച്ച് കൂടുതൽ പറയുവാൻ പത്രൊസ് ആ അവസരം ഉപയോഗിച്ചു. മൂന്നാം അധ്യായത്തിൽ അവൻ ഈ സൗഖ്യദായകനെ ആറ് വശങ്ങളിൽ അവതരിപ്പിച്ചു: ദൈവത്തിന്റെ ദാസൻ, വിശുദ്ധൻ, നീതിമാൻ, ജീവന്റെ കാരണഭൂതൻ, പ്രവാചകൻ, ഭൂമിയിലെ സകല കുടുംബങ്ങളും അനുഗ്രഹിക്കപ്പെടുവാനുള്ള സന്തതി. സൗഖ്യദായകന്റെ ഈ എല്ലാ വശങ്ങളും നമ്മുടെ പ്രയോജനത്തിനായുള്ളതാകുന്നു. എന്നാൽ നാലാം അധ്യായത്തിൽ പത്രൊസ് സൗഖ്യദായകന്റെ ഒരു വശത്തെ അവതരിപ്പിക്കുന്നു, അത് വിശേഷാൽ ദൈവത്തിനുള്ളതാകുന്നു; അവൻ ക്രിസ്തുവിനെ ദൈവത്തിന്റെ കെട്ടുപണിക്കായുള്ള കല്ലായി അവതരിപ്പിക്കുന്നു. പ്രവർത്തികൾ 4:12 പലപ്പോഴും സുവിശേഷ പ്രസംഗത്തിൽ ഉപയോഗിക്കാറുണ്ട്. എന്നാൽ 11-ാം വാക്യത്തോട് ബന്ധപ്പെടുത്തി അത് ഉപയോഗിക്കുന്നത് നിങ്ങൾ എപ്പോഴെങ്കിലും കേട്ടിട്ടുണ്ടോ? 11-ാം വാക്യത്തിലെ കല്ല് രക്ഷകനാകുന്നു എന്ന് ഈ വാക്യങ്ങൾ സൂചിപ്പിക്കുന്നു. വീടുപണിയുന്നവർ തള്ളിക്കളഞ്ഞ കല്ല് മൂലക്കല്ലായിത്തീർന്നു, മറ്റൊരു നാമത്തിലും രക്ഷയില്ല. യേശുവിന്റെ നാമത്തിൽ മാത്രമേ നമുക്ക് രക്ഷിക്കപ്പെടുവാൻ കഴിയൂ, യേശു കല്ലാകുന്നു. ഇതർത്ഥമാക്കുന്നത് നമുക്കൊരു കല്ല്-രക്ഷൻ ഉണ്ട് എന്നാണ്. നാല് സുവിശേഷങ്ങളിൽ മത്തായിയിൽ രാജ-രക്ഷകനും, മർക്കൊസിൽ അടിമ-രക്ഷകനും, ലൂക്കൊസിൽ മനുഷ്യ-രക്ഷകനും, യോഹന്നാനിൽ ദൈവ-രക്ഷകനും നമുക്കുണ്ട്. ഇപ്പോൾ പ്രവൃത്തികളുടെ പുസ്തകത്തിൽ നമുക്ക് കല്ല്-രക്ഷൻ ഉണ്ട്. നമ്മുടെ രക്ഷകൻ രാജാവും, അടിമയും, മനുഷ്യനും, ദൈവവും മാത്രമല്ല—അവൻ ദൈവത്തിന്റെ കെട്ടുപണിക്കായുള്ള ഒരു കല്ലുകൂടിയാകുന്നു.