കർത്താവിന്റെ ദൂതൻ തടവറയിൽ നിന്ന് അപ്പൊസ്തലന്മാരെ രക്ഷിച്ചപ്പോൾ, അവൻ അവരോട്, "പോയി ദൈവാലയത്തിൽ നിന്ന് ഈ ജീവന്റെ വചനങ്ങളെല്ലാം ജനത്തോട് സംസാരിക്കുവിൻ" എന്ന് പറഞ്ഞു. നാം "ഈ" എന്ന വാക്കിന് ശ്രദ്ധ നൽകേണ്ടതുണ്ട്, കാരണം അത് ഒരു പ്രത്യേക ജീവനെ സൂചിപ്പിക്കുന്നു. ഇവിടെ "വചനങ്ങൾ" എന്ന് വിവർത്തനം ചെയ്തിരിക്കുന്ന യവന വാക്ക് 'റീമ' (rhema) എന്നതാണ്; അത് സ്ഥായിയായ എഴുതപ്പെട്ട വചനത്തെയല്ല, മറിച്ച് ഇപ്പോൾ സംസാരിക്കപ്പെടുന്ന വചനത്തെ കുറിക്കുന്നു. അതിനാൽ, ദൂതൻ അപ്പൊസ്തലന്മാരോട്, "നിങ്ങൾ ചെന്ന് ഈ ജീവന്റെ ഇപ്പോഴത്തെ വചനങ്ങൾ സംസാരിക്കുവിൻ" എന്ന് പറയുകയായിരുന്നു. "ഈ ജീവൻ" എന്നതുകൊണ്ട് ഏത് ജീവനെയാണ് സൂചിപ്പിക്കുന്നത്? യഹൂദ നേതാക്കന്മാരുടെ പീഡനത്തെയും ഭീഷണിയെയും തടവിലാക്കലിനെയും ജയിച്ചതായ, പത്രൊസ് പ്രസംഗിക്കുകയും ശുശ്രൂഷിക്കുകയും ജീവിക്കുകയും ചെയ്തതായ ദിവ്യ ജീവനാകുന്നു അത്. പത്രൊസിന്റെ ജീവിതവും വേലയും അവന്റെ സാഹചര്യത്തിൽ ദിവ്യ ജീവനെ എത്രയോ യാഥാർത്ഥ്യവും സാന്നിധ്യവുമുള്ളതാക്കിത്തീർത്തു എന്ന് ഈ വാക്ക് സൂചിപ്പിക്കുന്നു; ദൂതൻ പോലും അത് കാണുകയും ചൂണ്ടിക്കാണിക്കുകയും ചെയ്തു. ഒരു ഉപദേശപരമായ രീതിയിൽ ദിവ്യ ജീവനെക്കുറിച്ച് സംസാരിക്കുവാനല്ല അപ്പൊസ്തലന്മാരോട് പറഞ്ഞത്. ഇന്ന് ചില ക്രിസ്ത്യാനികൾ ജീവനെക്കുറിച്ച് സംസാരിച്ചേക്കാം, എന്നാൽ അവരുടെ സംസാരം തികച്ചും ഉപദേശപരമാണ്. നാം ദിവ്യ ജീവനെ സംബന്ധിച്ച് സംസാരിക്കുമ്പോഴെല്ലാം, നാം ജീവിക്കുന്ന ആ ജീവന്റെ വചനങ്ങൾ തന്നെ സംസാരിക്കേണ്ടതിന് നാം കർത്താവിങ്കൽ നിന്ന് കരുണയും കൃപയും തേടേണ്ടതുണ്ട്. ഇതിനർത്ഥം ദിവ്യ ജീവൻ നമ്മുടെ ദൈനംദിന ജീവിതമായി മാറുന്നു എന്നാണ്. നാം മറ്റുള്ളവർക്ക് ശുശ്രൂഷിക്കേണ്ടത് ഈ ജീവനെയാകുന്നു.