[ഭാഗം 1] യേശുവിന്റെ ജഡാവതാരം, അവനെ ഒരു മനുഷ്യനാക്കിത്തീർത്തു, ഭൂമിയിലെ അവന്റെ മനുഷ്യജീവിതം, മനുഷ്യന്റെ രക്ഷകനാകുവാൻ അവനെ യോഗ്യനാക്കി, അവന്റെ ക്രൂശുമരണം, മനുഷ്യനുവേണ്ടി പൂർണ വീണ്ടെടുപ്പ് നിവർത്തിച്ചു, അവന്റെ പുനരുത്ഥാനം, അവന്റെ വീണ്ടെടുപ്പിൻ വേലയെ സമർഥിച്ചു, അവന്റെ മഹത്വീകരണം, അവൻ രക്ഷകനായിരിക്കേണ്ടതിന്, ഭരിക്കുന്ന നായകനായി അവനെ സ്ഥാനാരോഹിതനാക്കി. "നായകൻ" എന്ന് വിവർത്തനം ചെയ്തിരിക്കുന്ന യവന വാക്ക് 'ആർക്കെഗോസ്' (archegos) എന്നാണ്; അതിന്റെ അർത്ഥം കാരണഭൂതൻ, ഉത്ഭവം, ഉത്ഭവിപ്പിക്കുന്നവൻ, മുഖ്യനായകൻ, സേനാപതി എന്നാണ്. യെഹൂദ നേതാക്കന്മാർ തിരസ്കരിക്കുകയും കൊല്ലുകയും ചെയ്ത യേശു എന്ന മനുഷ്യനെ, ലോകത്തിന്മേൽ ഭരിക്കുവാനായി പരമോന്നത നായകനായും പ്രഭുവായും രാജാക്കന്മാരുടെ അധിപതിയായും, തിരഞ്ഞെടുക്കപ്പെട്ട ദൈവജനത്തെ രക്ഷിക്കുവാനായി രക്ഷകനായും ദൈവം ഉയർത്തി. നായകൻ എന്നത് അവന്റെ അധികാരത്തോടും, രക്ഷകൻ എന്നത് അവന്റെ രക്ഷയോടും ബന്ധപ്പെട്ടിരിക്കുന്നു. തിരഞ്ഞെടുക്കപ്പെട്ട ദൈവജനത്തിന് അവന്റെ രക്ഷ ലഭിക്കുവാൻ തക്കവണ്ണം പരിതഃസ്ഥിതി അനുയോജ്യമായിരിക്കേണ്ടതിന്, അവൻ തന്റെ അധികാരത്താൽ ഭൂമിയുടെമേൽ സർവാധികാരത്തോടെ ഭരണം നടത്തുന്നു (പ്രവൃ. 17:26-27; യോഹ. 17:2). വെളിപ്പാട് 1:5 അനുസരിച്ച്, അവൻ ഭൂമിയിലെ രാജാക്കന്മാരുടെ ഭരണാധികാരിയാകുന്നു. വളരെ യഥാർത്ഥമായ അർത്ഥത്തിൽ, രാജാക്കന്മാരുടെ ഭരണാധികാരിയായ ക്രിസ്തു എല്ലാ രാജാക്കന്മാരെയും സ്ഥാനഭ്രഷ്ടരാക്കുന്നു. അവൻ മാത്രമാണ് ഭരണാധികാരി. കൂടാതെ, വെളി 19:16 അനുസരിച്ച്, അവൻ രാജാധിരാജാവും കർത്താധികർത്താവുമാകുന്നു. ഭരണാധികാരി എന്ന നിലയിൽ, അവൻ ഭൂമിയെ മുഴുവൻ ഭരിക്കുന്നു. രാജാക്കന്മാരും പ്രസിഡന്റുമാരും ഭൂമിയെ ഭരിക്കുന്നുവെന്നും കർത്താവായ യേശു സിംഹാസനത്തിലല്ലെന്നും തോന്നിയേക്കാം. എന്നിരുന്നാലും, സിംഹാസനത്തിലല്ല എന്ന് തോന്നുന്ന ഈ വ്യക്തി സിംഹാസനസ്ഥരായ എല്ലാവരുടെയും ഭരണാധികാരിയാകുന്നു. ഇന്ന് ലോകം മുഴുവൻ കർത്താവിന്റെ ഭരണത്തിൻ കീഴിലാണ്. അവൻ യഥാർത്ഥത്തിൽ നായകനും, മുഖ്യ ഭരണാധികാരിയുമാകുന്നു. [നാളെ തുടരും]