ഇന്നത്തെ ചില ക്രിസ്ത്യാനികൾ ഒരുപക്ഷേ കർത്താവായ യേശുവിന്റെ മനുഷ്യത്വത്തിൽ ശരിയായ രീതിയിൽ വിശ്വസിക്കുന്നുണ്ടാവില്ല. അനേകം വർഷങ്ങൾക്ക് മുൻപ്, സ്വർഗ്ഗത്തിലുള്ളവനായ കർത്താവായ യേശുവിന് ഇപ്പോഴും മനുഷ്യ സ്വഭാവമുണ്ട് എന്ന് താൻ വിശ്വസിക്കുന്നില്ല എന്ന് ഒരു വ്യക്തി എന്നോട് പറഞ്ഞു. തന്റെ പുനരുത്ഥാനത്തിനുശേഷം കർത്താവ് തന്റെ മനുഷ്യത്വത്തെ ഉരിഞ്ഞുകളഞ്ഞു എന്നാണ് ഈ വ്യക്തി ചിന്തിച്ചത്. അങ്ങനെയുള്ള ഒരു വ്യക്തിയോട് നാം യേശുവിന്റെ മനുഷ്യത്വത്തെ പ്രസംഗിക്കേണ്ടതുണ്ട്. പ്രവൃത്തികൾ 7:56-ലെ സ്തെഫാനൊസിന്റെ അനുഭവം, കർത്താവായ യേശു തന്റെ ആരോഹണത്തിൽ പോലും ഇപ്പോഴും ഒരു മനുഷ്യനാണ് എന്ന് തെളിയിക്കുന്നു. സ്തെഫാനൊസ് ആരോഹണം ചെയ്ത കർത്താവിനെ കണ്ടപ്പോൾ, അവൻ അവനെ ഒരു മനുഷ്യനായിട്ടാണ് കണ്ടത്. മത്തായി 26-ൽ മഹാപുരോഹിതനോടുള്ള കർത്താവിന്റെ വാക്ക് അവന് ഇപ്പോഴും മനുഷ്യത്വമുണ്ട് എന്നതിനുള്ള കൂടുതൽ തെളിവാകുന്നു: " ഇനി മുതൽ മനുഷ്യപുത്രൻ ശക്തിയുടെ വലതുഭാഗത്തു ഇരിക്കുന്നതും ആകാശത്തിലെ മേഘങ്ങളിന്മേൽ വരുന്നതും നിങ്ങൾ കാണും," (മത്താ 26:64). കർത്താവായ യേശു ദൈവപുത്രനാണോ എന്ന് മഹാപുരോഹിതൻ അന്വേഷിക്കുകയായിരുന്നു (വാ. 63). തന്റെ ഉത്തരത്തിൽ താൻ ദൈവപുത്രനാണെന്ന് കർത്താവ് സമ്മതിച്ചു, എന്നാൽ തന്റെ ആരോഹണത്തിലും മേഘങ്ങളിന്മേലുള്ള തന്റെ തിരിച്ചുവരവിലും താൻ മനുഷ്യപുത്രനായിരിക്കും എന്ന് അവൻ തുടർന്നു പറഞ്ഞു. അതുകൊണ്ട്, കർത്താവ് തന്റെ ക്രൂശുമരണത്തിന് മുൻപ് ഭൂമിയിൽ മാത്രമല്ല, തന്റെ പുനരുത്ഥാനത്തിനും ആരോഹണത്തിനും ശേഷം ദൈവത്തിന്റെ വലത്തുഭാഗത്ത് സ്വർഗ്ഗത്തിലും ഒരു മനുഷ്യനായിരുന്നു. അപ്പൊസ്തലനായ യോഹന്നാന്റെ കാലത്ത്, യേശുക്രിസ്തു ജഡത്തിൽ വന്നു എന്ന് ചിലർ നിഷേധിച്ചിരുന്നു. ഇതിനെ സംബന്ധിച്ച് യോഹന്നാൻ ഇപ്രകാരം പറഞ്ഞു: " യേശു ക്രിസ്തു ജഡത്തിൽ വന്നു എന്ന് ഏറ്റുപറയുന്ന ഏത് ആത്മാവും ദൈവത്തിൽ നിന്നുള്ളതാകുന്നു, യേശുവിനെ ഏറ്റുപറയാത്ത ഏത് ആത്മാവും ദൈവത്തിൽ നിന്നുള്ളതല്ല; ഇത് എതിർക്രിസ്തുവിന്റെ ആത്മാവാകുന്നു" (1 യോഹ 4:2-3).