വിശുദ്ധസ്ഥലത്തെ ആദ്യത്തെ വസ്തു സാന്നിധ്യത്തിന്റെ അപ്പത്തിന്റെ മേശയാണ്; അപ്പം പ്രദർശിപ്പിച്ചിരുന്ന ഒരു മേശയാണിത്. ഈ അപ്പം നമ്മുടെ ഭക്ഷണമായ ക്രിസ്തുവിന്റെ മുൻകുറിയാണ്, കാരണം അവൻ ജീവന്റെ അപ്പമാകുന്നു (യോഹ 6:35). ക്രിസ്തു നമ്മുടെ ജീവനുള്ള സഹായമാണ്. അവൻ നമ്മുടെ ദൈനംദിന മന്നയാണ്, നാം ദൈവത്തിനുമുമ്പാകെ ജീവിക്കേണ്ടതിന് അവൻ നമ്മെ പരിപോഷിപ്പിക്കുന്നു. ക്രിസ്തുവിനെ നമ്മുടെ പെസഹയായും പരിശുദ്ധാത്മാവിന്റെ വെടിപ്പാക്കുന്ന വേലയായും നാം അനുഭവിച്ചറിഞ്ഞ സ്ഥിതിക്ക്, ക്രിസ്തുവിനെ നമ്മുടെ ദൈനംദിന മന്നയായി അനുഭവിച്ചറിയുവാൻ നാം മുന്നോട്ട് പോയിട്ടുണ്ടോ? പോയിട്ടുണ്ടെങ്കിൽ, സാന്നിധ്യത്തിന്റെ അപ്പത്തിന്റെ മേശയെ നാം സജീവമായ രീതിയിൽ അറിയുന്നു.

[പ്രാകാരത്തിലുള്ള യാഗപീഠവും തൊട്ടിയും] ഇത്രമാത്രമല്ല ഉള്ളത്; ഇത് ക്രിസ്തീയ ജീവിതത്തിന്റെ ബാലപാഠങ്ങൾ മാത്രമാണ്. നാം ഇനിയും മുന്നോട്ട് പോകണം. നാം സമാഗമനകൂടാരത്തിന്റെ പ്രധാന കവാടത്തിലൂടെ പ്രവേശിച്ചു, എന്നാൽ നാം പ്രവേശിക്കേണ്ടതായ മറ്റൊരു തിരശ്ശീല അഥവാ കവാടം അവിടെയുണ്ട്. പ്രാകാരത്തിൽ നിന്ന്, കർത്താവിൽ വിശ്വസിച്ചതിലൂടെ നാം വന്ന ആ സ്ഥലത്തുനിന്ന്, നാം വിശുദ്ധസ്ഥലത്തേക്ക് പ്രവേശിക്കേണ്ടതുണ്ട്.

ഒരിക്കൽ നാം പ്രാകാരത്തിനുള്ളിലായാൽ, നാം ദൈവത്തിന്റെ പരിധിക്കുള്ളിലും മണ്ഡലത്തിലുമാണ്. മറ്റൊരു വിധത്തിൽ പറഞ്ഞാൽ, നാം ദൈവരാജ്യത്തിലാണ്, കാരണം നാം വീണ്ടുംജനിപ്പിക്കപ്പെട്ടവരും വീണ്ടെടുക്കപ്പെട്ടവരും ക്ഷമിക്കപ്പെട്ടവരും ഇപ്പോൾ പരിശുദ്ധാത്മാവിന്റെ വ്യാപാരത്താൽ വെടിപ്പാക്കപ്പെട്ടവരുമാണ്. യാഗപീഠവും തൊട്ടിയും നാം അനുഭവമാക്കിയിട്ടില്ല എങ്കിൽ, നമുക്ക് ഒരിക്കലും ദൈവത്തിന്റെ ഒരു യഥാർത്ഥ മകനായിരിക്കുവാൻ കഴിയില്ല. നാം പുറമെ ക്രിസ്തുമതത്തിൽ പ്രവേശിച്ചിട്ടുണ്ടാകാമെങ്കിലും, ഈ രണ്ട് കാര്യങ്ങളുടെ അനുഭവം ഇല്ല എങ്കിൽ നാം അപ്പോഴും ദൈവരാജ്യത്തിന് പുറത്താണ്.

നാം ക്രൂശിന്റെ യാഗപീഠം അനുഭവമാക്കിയ ഉടൻതന്നെ, തൊട്ടിയാൽ സൂചിപ്പിക്കപ്പെടുന്നതുപോലെ പരിശുദ്ധാത്മാവ് പ്രവർത്തിക്കുവാൻ ആരംഭിച്ചു. ജനം കഴുകപ്പെടുവാനും വെടിപ്പാക്കപ്പെടാനുമുള്ള ഒരിടമാണ് തൊട്ടി. ക്രിസ്തുവിനെ നമ്മുടെ പെസഹയായി കൈക്കൊണ്ടതിനുശേഷം, പരിശുദ്ധാത്മാവ് തന്റെ വെടിപ്പാക്കൽ വേല ഉള്ളിലും പുറത്തും ആരംഭിക്കുന്നു. യിസ്രായേൽജനം സമാഗമനകൂടാരത്തിൽ പ്രവേശിച്ചപ്പോൾ, അവർ പാപയാഗത്തോടും അകൃത്യയാഗത്തോടും കൂടെ യാഗപീഠം കടന്നുപോകണമായിരുന്നു, എന്നാൽ ലൗകികമായ എല്ലാ അഴുക്കും കഴുകിക്കളയുവാൻ അവർ തങ്ങളുടെ കൈകാലുകൾ തൊട്ടിയിൽ കഴുകുകയും വേണമായിരുന്നു. നാം രക്ഷിക്കപ്പെട്ട സമയം മുതലുള്ള നമ്മുടെ ദൈനംദിന നടപ്പിലെ എല്ലാ ലൗകിക അഴുക്കുകളിൽ നിന്നും പരിശുദ്ധാത്മാവ് നമ്മെ വെടിപ്പാക്കുന്നു. നമുക്ക് ഇത്തരത്തിലുള്ള അനുഭവങ്ങൾ ഉണ്ടായിട്ടുണ്ടെങ്കിൽ, നാം രക്ഷിക്കപ്പെട്ടുവെന്നും ഇനി പ്രാകാരത്തിന് പുറത്തല്ലെന്നും അത് അർത്ഥമാക്കുന്നു.

പ്രാകാരത്തിൽ രണ്ടു കാര്യങ്ങളുണ്ടായിരുന്നു: യാഗപീഠവും തൊട്ടിയും. യാഗപീഠം ക്രിസ്തുവിന്റെ ക്രൂശിന്റെ മുൻകുറിയാണെന്നും തൊട്ടി പരിശുദ്ധാത്മാവിന്റെ വേലയുടെ മുൻകുറിയാണെന്നും എല്ലാ ബൈബിൾ വിദ്യാർത്ഥികളും സമ്മതിക്കുന്നു. നാം യാഗപീഠവും തൊട്ടിയും അനുഭവമാക്കിയിട്ടുണ്ടോ? ക്രൂശിൽ ക്രിസ്തു നമ്മുടെ പാപയാഗമായി അർപ്പിക്കപ്പെട്ടു. അവൻ നമ്മുടെ പാപങ്ങൾക്കായി മരിച്ചു, നമുക്കായി ക്രൂശിൽ അവൻ പാപം ആക്കപ്പെടുകയും ചെയ്തു, അതിനാൽ അവൻ നമ്മുടെ പെസഹയാകുന്നു. 1 കൊരി 5:7 ക്രിസ്തു നമ്മുടെ പെസഹയാണെന്ന് വ്യക്തമായി പ്രസ്താവിക്കുന്നു. നമ്മുടെ പാപങ്ങൾക്കുവേണ്ടിയുള്ള അവന്റെ മരണത്തിൽ നാം വിശ്വസിച്ച ദിവസം നമ്മുടെ പെസഹയുടെ ദിവസമായിരുന്നു. ആ ദിവസത്തിലാണ് നാം ക്രിസ്തുവിനെ നമ്മുടെ പെസഹ കുഞ്ഞാടായി ആസ്വദിച്ചത്.

[2 രാജാക്കന്മാർ 2:1-14]-ൽ നാല് യാത്രകളുണ്ട്. ഗില്ഗാലിൽ നിന്നുള്ള പുറപ്പെടൽ, ബേഥേലിലേക്കുള്ള യാത്ര, യെരീഹോവിലേക്കുള്ള യാത്ര, യോർദ്ദാൻ നദി കടക്കൽ എന്നിവയാണ് ഇവ. ഏലീയാവ് സ്വർഗ്ഗത്തിലേക്ക് എടുക്കപ്പെടുന്നതിനും എലീശ പരിശുദ്ധാത്മാവിന്റെ ഇരട്ടി ഓഹരി പ്രാപിക്കുന്നതിനും മുമ്പ് അവർ ഈ നാല് സ്ഥലങ്ങളിലൂടെ കടന്നുപോയി. സ്വർഗ്ഗത്തിലേക്ക് എടുക്കപ്പെട്ട ഏലീയാവിനെപ്പോലെയോ, അല്ലെങ്കിൽ പരിശുദ്ധാത്മാവിന്റെ പുതപ്പ് (അതായത് പരിശുദ്ധാത്മാവ് ഒരു മേലങ്കിപോലെ അവന്റെ മേൽ ഇറങ്ങിവരുന്നത്) പ്രാപിച്ച എലീശയെപ്പോലെയോ ആകുവാൻ നാം ആഗ്രഹിക്കുന്നുവെങ്കിൽ, നാം ഈ നാല് യാത്രകൾ ചെയ്യണം എന്നതാണ് നിർണ്ണായകമായ പാഠം. നാം ഉൾപ്രാപണം ചെയ്യപ്പെടുകയാണെങ്കിലും പരിശുദ്ധാത്മാവിന്റെ ശക്തി പ്രാപിക്കുകയാണെങ്കിലും, നാമെല്ലാവരും ഗില്ഗാലിൽ നിന്ന് പുറപ്പെട്ട് യോർദ്ദാൻ കടക്കുന്നത് വരെ യാത്ര ചെയ്യേണ്ടതുണ്ട്.

ഏലീയാവിന്റെ ഉൾപ്രാപണവും എലീശയുടെ പുതപ്പും (പരിശുദ്ധാത്മാവ്) പ്രാപിക്കുവാൻ നാം ആഗ്രഹിക്കുന്നുവെങ്കിൽ, നാം ഗില്ഗാലിൽ നിന്ന് ആരംഭിച്ച് യോർദ്ദാൻ നദി കടക്കുന്നത് വരെ തുടരണം. പുനരുത്ഥാന ജീവനാൽ നിറഞ്ഞവരുടെ മേൽ മാത്രമേ പരിശുദ്ധാത്മാവിന് ഇറങ്ങിവരാൻ കഴിയൂ. നാം വീണ്ടും ജനിച്ചതുകൊണ്ട് മാത്രം തീർച്ചയായും ഉൾപ്രാപണം ചെയ്യപ്പെടുമെന്ന് നാം വിചാരിക്കരുത്. ഒരുക്കമില്ലാത്തവരെ ദൈവം എടുക്കുകയില്ല. ഏലീയാവ് അന്ന് ചെയ്തതുപോലെ, ഉൾപ്രാപണം ചെയ്യപ്പെടുന്നതിന് മുമ്പ് നാം ഗില്ഗാൽ, ബേഥേൽ, യെരീഹോ, യോർദ്ദാൻ നദി എന്നിവയിലൂടെ കടന്നുപോകണം. നാം ഉൾപ്രാപണം ചെയ്യപ്പെടുമെന്ന് ദൈവം നമ്മോട് പറഞ്ഞിട്ടുണ്ട്. ഇനി നാം നമ്മുടെ പാത പിന്തുടരേണ്ടതുണ്ട്. നാം ഗില്ഗാലിൽ നിന്ന് ആരംഭിച്ച് യോർദ്ദാൻ കടക്കുന്നത് വരെ മുന്നോട്ട് പോകണം. ദൈവം അവിടെ നമുക്കായി കാത്തിരിക്കുകയാണ്!

ഉൾപ്രാപണം ആസന്നമായിരിക്കുന്ന ഈ സമയത്ത്, വിശ്വാസികൾ ജയിക്കേണ്ട അവസാന ശത്രു മരണമാണ്. അത് ശരീരത്തിന്റെ മരണമാകട്ടെ, മനസ്സിന്റെ മരണമാകട്ടെ, അല്ലെങ്കിൽ ആത്മിക ജീവന്റെ മരണമാകട്ടെ, സകലത്തെയും ജയിക്കണം. ഇപ്പോഴത്തെ ലോകം യഥാർത്ഥത്തിൽ മരണത്തിന്റെ അന്തരീക്ഷത്താൽ നിറഞ്ഞിരിക്കുകയാണ്. ഉൾപ്രാപണം ചെയ്യപ്പെടുവാൻ ഒരുങ്ങിക്കൊണ്ടിരിക്കുമ്പോൾ, യോർദ്ദാൻ എങ്ങനെ കടക്കണമെന്നും മരണത്തെ എങ്ങനെ ജയിക്കണമെന്നും വിശ്വാസികൾ പഠിക്കണം.

ചെങ്കടൽ കടക്കുന്നതും യോർദ്ദാൻ നദി കടക്കുന്നതും തമ്മിൽ വ്യത്യാസമുണ്ട്. ചെങ്കടൽ കടക്കുന്നത് ആ സമയത്ത് യിസ്രായേല്യരുടെ മേൽ അടിച്ചേൽപ്പിക്കപ്പെട്ടതായിരുന്നു. ശത്രുക്കൾ പിന്തുടരുന്നതിനാൽ അവർക്ക് കടന്നുപോവുകയല്ലാതെ മറ്റ് മാർഗമില്ലായിരുന്നു. എന്നാൽ യോർദ്ദാൻ നദി കടക്കുന്നത് മനുഷ്യന്റെ സന്നദ്ധതയിൽ നിന്ന് ഉണ്ടാകുന്നതും മനുഷ്യന്റെ സ്വന്തം തിരഞ്ഞെടുപ്പുമാണ്. യോർദ്ദാൻ നദി കടക്കാത്ത ചിലരുണ്ട്. അനേകർ പുനരുത്ഥാനത്തിന്റെ ശക്തി ആഗ്രഹിക്കുന്നില്ല. പൗലോസ് പുനരുത്ഥാനത്തിന്റെ ശക്തിയെ പ്രധാനമായി കണക്കാക്കുകയും അതിനെ പിൻപറ്റുകയും ചെയ്തു (ഫിലി 3:10-12). അനേകം ആളുകൾ കർത്താവിനോടൊപ്പം ഇതിനകം പുനരുത്ഥാനം ചെയ്തിട്ടുണ്ട്, എങ്കിലും അവർ ഇപ്പോഴും കർത്താവിന്റെ പുനരുത്ഥാനത്തിന്റെ ശക്തി അറിയുന്നില്ല.

മിസ്രയീമിൽ ക്ഷാമം ഇല്ലായിരുന്നു. ഒരുപക്ഷേ അവിടെ ഒന്നുണ്ടായിരുന്നെങ്കിൽ തന്നെയും, സംഭരിച്ചു വെച്ചിരുന്ന പഴയ ധാന്യത്തിന്റെ ആശ്വാസം അവിടെ ഉണ്ടായിരുന്നു. എന്നാൽ കനാൻ ദേശത്ത് കൂടെക്കൂടെ ക്ഷാമങ്ങൾ ഉണ്ടായിരുന്നു. ലോകത്തിൽ ക്ഷാമമില്ല എന്ന് ഇത് നമ്മോട് പറയുന്നു. എന്നാൽ, ദൈവത്തോടുള്ള അനുസരണത്തിന്റെ പാതയിൽ ഒഴിവാക്കാനാവാത്ത ക്ഷാമകാലങ്ങൾ ഉണ്ട്. ലോകത്തിൽ പരീക്ഷണങ്ങളില്ല; എന്നാൽ ദൈവത്തോടുള്ള അനുസരണത്തിന്റെ പാത പരീക്ഷണങ്ങൾ നിറഞ്ഞതാണ്. ഉൾപ്രാപണം ചെയ്യപ്പെടുന്നതിനും ശക്തി പ്രാപിക്കുന്നതിനുമായി സഞ്ചരിക്കേണ്ട പാതയാണിത്.