പുതിയ യെരൂശലേം മണവാട്ടിയാണ്, അത് എഫെസ്യർ 5 പ്രകാരം സഭയാണ്. അത് ഭരണക്രമത്തെ കുറിച്ച് സംസാരിക്കുന്ന ഒരു നഗരം കൂടിയാണ്, ഈ ഭരണകേന്ദ്രത്തിൽ ദൈവത്തിൻ്റെയും കുഞ്ഞാടിൻ്റെയും സിംഹാസനമുണ്ട്. പുതിയ യെരൂശലേം സഭയെയും രാജ്യത്തെയും സംയോജിപ്പിക്കുന്നു. ഇത് പറയുമ്പോൾ, പുതിയ നിയമത്തിൻ്റെ മുഴുവൻ ഉള്ളടക്കവും ഞങ്ങൾ ഒരു വാക്യത്തിൽ സംഗ്രഹിച്ചിരിക്കുന്നു.

ക്രിസ്തുവിന്റെ ശരീരത്തിന്റെ യാഥാർഥ്യം, സ്വയത്തെ ത്യജിക്കുവാൻ നിരന്തരം അഭ്യസിക്കുന്നതിനാലും, ജീവന്റെ ആത്മാവിന്റെ പ്രമാണമായ, ദിവ്യ ജീവനായ മറ്റൊരു ജീവനാൽ ജീവിക്കുന്നിനാലും പക്വത പ്രാപിച്ച, തികഞ്ഞവരാക്കപ്പെട്ട ദൈവ-മനുഷ്യരുടെ സംഘാത ജീവിതമാണ്. ക്രിസ്തുവിന്റെ ശരീരത്തിന്റെ യാഥാർഥ്യമായ ഇങ്ങനെയുള്ള ജീവിതം ഈ യുഗമായ സഭായുഗത്തെ അവസാനിപ്പിക്കുകയും, രാജ്യയുഗത്തിൽ ഈ ദൈവമനുഷ്യരോടൊപ്പം ഭൂമിയെ ഏറ്റെടുക്കുകയും കൈവശമാക്കുകയും ഭരിക്കുകയും ക്രിസ്തുവിനെ മടക്കിക്കൊണ്ടുവരുകയും ചെയ്യും

സഭയും രാജ്യവും പരസ്പരബന്ധിതമാണെങ്കിലും, അവ തമ്മിൽ ഒരു വ്യത്യാസമുണ്ട്. ഏത് തരത്തിലുള്ള ജീവനും ഒരു രാജ്യമായതിനാൽ, രാജ്യം ജീവൻ തന്നെയാണ്. ഉദാഹരണത്തിന്, മൃഗജീവൻ മൃഗരാജ്യമാണ്, മനുഷ്യജീവൻ മനുഷ്യരാജ്യമാണ്. അതേ തത്വത്തിൽ, ദൈവത്തിൻ്റെ ജീവൻ ദൈവരാജ്യമാണ്. എന്നാൽ സഭ ജീവനല്ല, ജീവൻ സഭയുമല്ല. മറിച്ച്, സഭ ജീവൻ്റെ ഉൽപന്നമാണ്. ദിവ്യ ജീവനാണ് രാജ്യം, ഈ ജീവൻ സഭയെ ഉളവാക്കുന്നു.

സഭ ദൈവത്തിൻ്റെ ഭവനമോ ക്രിസ്തുവിൻ്റെ ശരീരമോ ക്രിസ്തുവിൻ്റെ മണവാട്ടിയോ ആയിരിക്കുന്നതിനുള്ള ആവശ്യകതകൾ, ദൈവരാജ്യമായിരിക്കുന്നതിനുള്ള ആവശ്യകതകളോളം അത്രമേൽ ഉന്നതമല്ല. മത്തായി 5, 6, 7 എന്നിവയിൽ പറഞ്ഞിരിക്കുന്നതിനേക്കാൾ ഉന്നതമായ ആവശ്യകതകളൊന്നും തന്നെ ഇല്ല. രാജ്യത്തിൻ്റെ ആവശ്യകതകൾ ഉന്നതമാണ്, കാരണം സഭ ക്രിസ്തുവിൻ്റെ വാഴ്ചയാണ്, ഒരു രാജാവെന്ന നിലയിൽ ക്രിസ്തുവിൻ്റെ ഭരണമാണ്. സഭ രാജ്യമാണ് എന്നത് നാമെല്ലാവരും തിരിച്ചറിയുകയാണെങ്കിൽ, നമ്മുടെ ജീവിതത്തിൽ ഒരു വലിയ മാറ്റമുണ്ടാകും.

വേരിന്റെ [മറഞ്ഞിരിക്കുന്ന ജീവിതം] വിഷയം വളരെ പ്രധാനപ്പെട്ടതാണ്. പൗലൊസിന്റെ വേല ഉണ്ടായിരിക്കുവാൻ നിങ്ങൾ ആഗ്രഹിക്കുന്നുവെങ്കിൽ, നിങ്ങൾക്ക് പൗലൊസിന്റെ "വേര്" ഉണ്ടായിരിക്കണം; പൗലൊസിന്റെ ബാഹ്യമായ പെരുമാറ്റം ഉണ്ടായിരിക്കുവാൻ നിങ്ങൾ ആഗ്രഹിക്കുന്നുവെങ്കിൽ, നിങ്ങൾക്ക് പൗലൊസിന്റെ ആന്തരിക ജീവൻ ഉണ്ടായിരിക്കണം. പൗലൊസിന്റെ പ്രകടമായ ശക്തി ഉണ്ടായിരിക്കുവാൻ നിങ്ങൾ ആഗ്രഹിക്കുന്നുവെങ്കിൽ, നിങ്ങൾക്ക് പൗലൊസിന്റെ രഹസ്യ അനുഭവം ഉണ്ടായിരിക്കണം. ഇന്നത്തെ ക്രിസ്ത്യാനികളുടെ പ്രശ്‌നം, അവർക്ക് ഒരു ആത്മിക കാര്യമോ ഏതെങ്കിലും പ്രത്യേക അനുഭവമോ വെളിപ്പെടുത്താതെ സൂക്ഷിക്കുവാൻ കഴിയില്ല എന്നതാണ്. ചെറിയ ഒരു അനുഭവം ലഭിച്ചാലുടൻ അത് അവർക്ക് പുറമേ പറയണം... അവർക്ക് ഒട്ടുംതന്നെ വേരില്ല. പൗലോസിൻ്റെ അനുഭവം ദൈവം നമുക്ക് കാണിച്ചുതരട്ടെ.

ഉള്ളിൽ ഒന്നുമില്ലാതെ ബാഹ്യപ്രകടനം ഉള്ളവനാണ് ഒരു കപടഭക്തൻ. അവനുള്ളതെല്ലാം വെറും ബാഹ്യപ്രദർശനം മാത്രമാണ്; ആന്തരികമായ് യാതൊരു യാഥാർത്ഥ്യവുമില്ല. ഇത് ദൈവത്തിൻ്റെ സ്വഭാവത്തിനും അവൻ്റെ മറഞ്ഞിരിക്കുന്ന ജീവനും തികച്ചും വിരുദ്ധമാണ്. ദൈവത്തിന് തന്റെ ഉള്ളിൽ വളരെയധികം ഉണ്ടെങ്കിലും, കുറച്ച് മാത്രമേ പ്രകടമാകുന്നുള്ളൂ. നമ്മുടെ ജീവന് ആഴമില്ലെങ്കിൽ, നമ്മുടെ ഉപരിപ്ലവമായ വേല മറ്റ് ജീവിതങ്ങളെ ഉപരിപ്ലവമായി മാത്രമേ ബാധിക്കുകയുള്ളൂ; "ആഴി ആഴിയെ വിളിക്കുന്നു."

നിങ്ങളുടെ ജീവിതം എപ്രകാരമാണ്? നിങ്ങളുടെ ദൈനംദിന ജീവിതവും ദൈനംദിന നടത്തവും എപ്രകാരമാണ്? നിങ്ങൾ മനുഷ്യരുടെ ദൃഷ്ടിയിൽ വളരെ നല്ലവനായിരിക്കാം, എന്നാൽ കർത്താവിൻ്റെ ദൃഷ്ടിയിൽ നിങ്ങൾ അവൻ്റെ ഭരണത്തിൻ കീഴിലല്ല. അവന് ഇപ്പോഴും നിങ്ങളുടെ ഉള്ളിൽ ഒരു രാജ്യം ഇല്ല. നിങ്ങൾ ധാർമ്മികനായിരിക്കാം, നിങ്ങൾ നല്ലവരായിരിക്കാം, നിങ്ങൾ സൗമ്യതയുള്ളവരായിരിക്കാം, നിങ്ങൾ മതപരമായവരായിരിക്കാം, എന്നാൽ നിങ്ങൾ അവൻ്റെ ജീവന്റെ ഭരണത്തിൻ കീഴിലല്ല. നിങ്ങളുടെ ഉള്ളിൽ കർത്താവായ യേശുവിൻ്റെ രാജ്യം ഇല്ല. നാം രാജ്യം കാണേണ്ടതിന് കർത്താവായ യേശു നമ്മുടെ കണ്ണുകൾ തുറക്കുമെന്ന് ഞാൻ പ്രതീക്ഷിക്കുന്നു. കർത്താവായ യേശു നമ്മിൽ വിതയ്ക്കപ്പെടുകയും, കൊയ്ത്ത് വരെയും, അതായത് രാജ്യത്തിൻ്റെ വെളിപ്പെടൽ വരെയും, നമ്മിൽ വളരുകയും, ഭരിക്കുകയും, നിയന്ത്രിക്കുകയും, വാഴുകയും, പക്വതപ്പെടുകയും ചെയ്യുന്നു.

ദൈവത്തിൻ്റെ ശത്രുവായ സാത്താന് ദൈവത്തിൻ്റെ ലക്ഷ്യം അറിയാം. അതിനാൽ നിങ്ങൾ രാജ്യത്തിനുവേണ്ടിയല്ലാത്തിടത്തോളം കാലം അവൻ നിങ്ങളെ പലതും ചെയ്യുവാൻ അനുവദിക്കും. ഒരു രാജ്യം കെട്ടുപണിയുക എന്നതാണ് ദൈവത്തിൻ്റെ ഉദ്ദേശ്യം; ഈ രാജ്യം നശിപ്പിക്കുക എന്നതാണ് ശത്രുവിൻ്റെ ലക്ഷ്യം. രാജ്യത്തിൽ നിന്ന് അവരെ അകറ്റി നിർത്തുവാൻ കഴിയുന്നിടത്തോളം ശത്രു ജനത്തെ മറ്റെന്തെങ്കിലും കാര്യത്തിലേക്ക് മാറ്റും. അവന് പാപകരമോ ലൗകികമായതോ ആയ കാര്യങ്ങൾ ഉപയോഗിക്കുവാൻ കഴിയുന്നില്ലെങ്കിൽ, അവൻ മതപരമായ കാര്യങ്ങൾ ഉപയോഗിക്കും. നിങ്ങൾ രാജ്യത്തിൽനിന്ന് വ്യതിചലിപ്പിക്കപ്പെടുന്നിടത്തോളം സാത്താൻ സംതൃപ്തനായിരിക്കും.

മലമേലുള്ള കർത്താവായ യേശുവിൻ്റെ കായാന്തരണം, അവന്റെ പ്രകാശിക്കൽ, അധികാരത്തിലുള്ള രാജ്യത്തിൻ്റെ വരവായിരുന്നു! നിങ്ങളുടെ മേൽ പ്രകാശിക്കുന്ന കർത്താവായ യേശുവാണ് രാജ്യം. ഈ വാചകം നിങ്ങളിൽ ആഴത്തിലുള്ള മതിപ്പ് ഉളവാക്കുമെന്ന് ഞാൻ പ്രതീക്ഷിക്കുന്നു: രാജ്യം കർത്താവായ യേശുവിൻ്റെ പ്രകാശിക്കലാണ്, രാജ്യം നിങ്ങളുടെ മേൽ പ്രകാശിക്കുന്നതിലൂടെയുള്ള കർത്താവായ യേശുവിൻ്റെ വ്യാപനമാണ്.

ക്രിസ്തുവിൻ്റെ യാഥാർത്ഥ്യത്തിൻ്റെ സാക്ഷാത്കാരമാണ് രാജ്യം. നാം അന്ധകാരത്തിൽ നിന്ന് ക്രിസ്തുവിൻ്റെ രാജ്യത്തിലേക്ക് മാറ്റപ്പെട്ടിരിക്കുന്നു. എന്നിരുന്നാലും, നമ്മുടെ ദൈനംദിന ജീവിതത്തിൽ, നമുക്ക് രാജ്യത്തിൻ്റെ യാഥാർത്ഥ്യത്തിന്റെ കുറവുണ്ടായിരിക്കാം. രാജ്യത്തിൻ്റെ യാഥാർത്ഥ്യം എന്നത് കർത്താവായ യേശുവിൻ്റെ യാഥാർത്ഥ്യത്തിൻ്റെ സാക്ഷാത്കാരമാണ്. കർത്താവായ യേശുവിൻ്റെ യാഥാർത്ഥ്യത്തിൻ്റെ സാക്ഷാത്കാരം നമുക്കുണ്ടാകുമ്പോൾ, ആ സാക്ഷാത്കാരമാണ് രാജ്യം.